“Myaˈkx ja poky kaytyey mëdiˈibë tëëyëp”

Mët yëˈëgyëjxm ko Jesus ojts ttemy dyoky ja nyëë nyeˈpyny, ta yajmeˈkxy ja nbokyˈäjtëm (Éfes. 1:7). Perë Biiblyë jyënaˈany ko “Dios ojts myaˈkxtuky ets myaˈkx ja poky kaytyey mëdiˈibë tëëyëp”, jaˈa njënäˈänëm, määnëm netyë Jesus xykyakuˈoˈkëm (Rom. 3:​25, TNM). Per pënë Jyobaa yëˈë tuˈugë Dios mëdiˈibë tyuumbyë tëyˈäjtën, ¿wiˈixën ojts tmeˈkxy ja poky kaytyey mä kyajnëmë Jesus xykyuˈoˈkëm?

Ko Jyobaa twandaky ko myinäˈäny tuˈugë “tëëmp ääts” mëdiˈibë yaˈˈawäˈätspëtsëmaampy pënaty jam pyëjktaktëp ja myëbëjkën, duˈun dyajnäjxy extëmxyëp të tjuuybyëtsëmy (Gén. 3:15; 22:18). Jyobaa ijtpë nety seguurë ko ja yˈUˈunk kyëyakaambyë jyukyˈäjtën parë tjuuybyëtsëmët ja naxwinyëdë jäˈäy ko ja tiempë tpäädët (Gal. 4:4; Eb. 10:​7-10). Ko Jesus myiiny yä Naxwiiny, yëˈë Dios ojts tkudanë ets mooyë ja kutujkën parë tmaˈkxët ja poky kaytyey oyë nety tkakuˈoogënëm ja naxwinyëdë jäˈäy. Pääty, pënaty pyëjktaktë ja mëbëjkën mä Jesus, ojts tpokymyeˈkxy ets dyaˈˈagëdaky (Mat. 9:​2-6).