¿Päätyë Jyobaa tyestiigëty kyäjpxwäˈkxtë tëjkmdëjkm parë tpäädäˈändë nitsokën?

Kyaj. Ëëtsëty nnijäˈäwëdëpts ko kyajts nitsoˈogäˈändë mët kojëts ngäjpxwäˈkxtë tëjkmdëjkm (Éfesʉ 2:8). ¿Tiko?

Nˈokpëjtakëm ko tuˈugë yetyëjk diˈib nyayajkypy tijaty, tˈawanë tuˈugë regalë parë pënaty jäjttëp mä ja lugäär ets ja xëë näˈä yëˈë tnigajpxy. Pën yaˈixyˈäjtp ja yetyëjk ko kyuytyuumpy ja yˈayuk, ¿këdii seguurë ko nëjkxëm? Ets kyaj jeˈeyë ëtsäjtëm, nanduˈun nˈanmäˈäyëm ja nfamilyëˈäjtëm etsë nmëtnaymyaayëbëˈäjtëm parë nanduˈun nyëjkxtët. Per kyaj nyajmoˈoyëm ja regalë mët ko të nduˈunëm extëm ja yetyëjk të jyënaˈany, pes tuˈugë regalë kyaj yajganaraty.

Nanduˈunë Jyobaa tyestiigëty, myëbëjktëp ko Dios kyuytyunaambyë yˈayuk ko të ttukwandaˈagyë jukyˈäjtënë winë xëëbë pënaty mëdoodëp (Romanʉs 6:23). Ets kom ntsojktëbëts parë wiink jäˈäy ttukˈoyˈattët, tajëts ngäjpxwäˈkxtë. Per nnijäˈäwëdëpts ko kyajts nbäädäˈändë nnitsokën mët kojëts ngäjpxwäˈkxtë (Romanʉs 1:17; 3:28). Kyaj mbäät pën ti ttuny parë xynyitëjkëmë tyäˈädë regalë diˈibë Dios yajkypy. Pesë Biiblyë jyënaˈany: “Oj xyajnitsokëm, kyaj mët ko [...] oynëˈënën ti oy nduˈunëm” (Titʉ 3:5).