Davit tyëkë rey

TA JATËGOKË Saúl tˈëxtääyë Davit ets tmatsäˈäny. Ja tmëtsoˈony tëgëk milë tsyiptuumbë oyatypyë. Ko dëˈënë Davit tnijäˈäjë, ta tkejxyë jyaˈay ets nëjx tˈixy mä ja tsuˈum dyajnaxäˈänyë Saúl. Ta ko tnijäˈäjë, ta dyajtëëjy nimajtskë tyuumbë: ¿Pënëts xypyanëjxäämp mä jamë Saúl?

Abisay ta yˈatsoojy: Ëjts nëjxäämp. Abisay yëˈë tyääkˈäjtë Seruyaa, myëgaˈaxë Davit. Ta tsyoˈondë Davit mëdë Abisay ets jyäjttë mä nety jamë Saúl mëdë jyaˈayëty myäˈädë, ta tyëjkëdë ayuˈutsyë. Ta ojts tmënëjxëdë ja lyansë Saúl mëdë nyëëduˈts diˈibë nety jam pyëˈääjy. Nipën kyaˈijxëdë ets tkamëdoojy ko tyëjkëdë, yëˈko ak määdëbë nety.

Ok ixë Davit mëdë Abisay mä dibujë. Ojts kyaˈaktë ets ojts nyëjxtë mä tuˈugë kopk. Jamë Davit tkukäjxnäjxyë Abner ja diˈibë nety nyiwintsënˈäjtypyë tsiptuumbëty: Abner, ¿tiko xykyakuentˈaty jamë rey? ¡Ok ix! ¿Mä net ja lyansë ets ja nyëëduˈts?

¿Mˈijxypy mä net yamë Saúl mëdë Abner? Ko ja Saúl ojts myaˈayjotwijy ta dyoˈkmëdooyë Davit ets tˈanmääjy: ¿Mijts Davit?

Davit ta yˈatsoojy: Ëjts wintsën, ¿tikots xypyajëdity? ¿Tits të nduundëgoy? Ix tyam ja mlansë rey. Waˈan pën tniminy.

Ta Saúl jyënany: Axëëgëts të nˈadëˈëtsy kyajts nijawë tits nduumpy. Ta ja Davit ojts nyejxy ets ja Saúl ta jyëmbijty mä tyëjk. Perë Davit ta jyënany: Tsojktsë Saúl xyaˈoogët nek oyëts ko nëjxët mä tsyëënëdë filisteety. Ets dëˈënën ttuuny. Davit ojts twinˈëëny ja filisteety ets ttukmëbejky ko pyuwäˈkëbë nety.

Ta ja tiempë nyajxy ets ja filisteety tnibëdëˈktë ja Israel ets mëët tsyiptuundë. Mä ja tsip, jam yˈoˈkyë Saúl mëdë Jonatan. Ko Davit tnijäˈäjë ta jyantsy jyotmaytyuktëjkë, ets twaˈpy tuˈugë ëy diˈib jënäämp: Extëmëts mijts ndimnimääy ndimnidäjnë mëguˈuk Jonatan. ¡Mëkëtsë nety mijts njantsy tsyoky!

Ko tëgekyë tyäˈädë tyuun jyäjtë, ta Davit jyëmbijty mä ja käjpn diˈib xyëˈäjtypy Ebron. Jam ja jäˈäyëty tsyiptuundë, yëˈko tam diˈib tsyojktë ets tyunët reyë Isboset ja myäängë Saúl, ets tam diˈib yajreyˈatandë Davit. Per yëˈë madaktë ja Davitë jyaˈayëty. Ta Davit tyëjkë rey ko netyë jyëmëjt tmëdaty 30. Jëxtujk jëmëjt ja kujm ojts yˈaneˈemy jam Ebron. Jam myaxuˈunkˈäjttë myäänk diˈib xyëˈäjt Amnon, Absalon etsë Adonias.

Ko tiempë yˈaknäjxy ta Davit mëdë jyaˈayëty ojts tjaˈabëktë Jerusalén käjpn. Joab diˈib nandëˈën tyääkˈäjtë Seruyaa yëˈë diˈib wyooyoˈoy ja tsiptuumbëty. Päätyë Davit pyëjtakë ets tniwintsënˈatëdë tsiptuumbëty. Ta netë Davit ojts tyëjkënë anaˈambë Jerusalén.