Josafat myëbëjkë Jyobaa

¿MNIJÄˈÄP mä tyäˈädë jäˈäyëty nyëjxtë ets ti yam tyuundëp? Tsiptuumbë nyëjxtë, ets diˈib jam jawyiin yoˈoytyëp yëˈë diˈib ëëdëp. Per mbäät mnayajtëyëty: ¿Tiko kyaj tmënëjxtë yˈespäädë etsë lyansë diˈib ëëdëp? Min nˈokˈijxëm.

Josafat yëˈë reyˈäjt mä ja majtsk grupë jäˈäy mëdë tyëëmp yˈääts. Ja jyukyˈajty mä netyë rey Akab mëdë Jezabel tˈaneˈemy ja nimäjk grupë jäˈäy mëdë tyëëmp yˈääts. Josafat oy ojts yˈaneˈemy, ets nandëˈënë tyeety Asa̱a̱. Pääty ja jäˈäy diˈib yˈanaˈamdë jotkujk yˈijttë kanäk jëmëjt.

Per tëgok ta tyuktëjkëdë tsëˈëgë. Yëˈko Josafat yaˈawäˈänë ko ta nety nyiminëdë mayë tsiptuumbë diˈib tsoˈondëp Moˈap, Amon ets Seˈir. Ta nimayë israelitë nyaymyujkëdë Jerusalén. Ta ojts nyëjxtë mä ja Diosë tyëjk ets tˈamdoodë Jyobaa nyaybyudëkë. Ta netë Josafat tmënuˈkxtakyë Jyobaa, ets tˈanmääjy: Ay Jyobaa ëjts mijts nDiosˈäjttëp, kyajts nijawëdë tits ndundëp. Kyajts mbäät nmëmadäˈäktë tadë may tsyiptuumbë. Pudëjkëdëtsëk.

Jyobaa myëdoogujkë ja nuˈkxtakën, pääty tˈanmääyë kyäjpn mët yëˈëgyëjxm tuˈugë tyuumbë: Tadë tsip kyaj mijts xyjaˈattë yëˈë Diosë jyaˈa. Kyaj mijts mtsiptunäˈändë. Jeˈeyë xyˈixtët wiˈixë Jyobaa myajnitsoˈogëdë.

Pääty ja kum bomë Josafat tˈanmääjy ja käjpn: ¡Pëjtäˈäktë mëbëjkënë mä Jyobaa! Ta netë Josafat tpëjtaky jëjpˈamë jäˈäyëty diˈib ëëdëp ets twinˈyoˈoyëdët ja tsiptuumbëty, ets mä tyuˈuyoˈotyë ta tkuyˈëwdë Jyobaa. ¿Mnijäˈäp ti tuun jäjtë ko nety kyajäˈttënëm mä ja myëtsip? Yëˈë Jyobaa yajtëjkëdë tsiptuumbë ja myëtsipëty ets nyayaˈoogëdët ak yëˈëjëty. ¡Ta ko ja israelitëty jam jyäjttë, të nety niˈamukë ja myëtsip yˈoˈktäˈäytyë!

Wijˈyë Josafat yˈijty ko tmëbejkyë Dios, ¿këdii? Pën ëtsäjtëm nmëbëjkëm nandëˈënë Dios nëjxëp nandëˈën nˈijtëm wijy.