Tuˈugë yetyëjk diˈib kyaj tsyëˈkë

OK IXË tyäˈädë jäˈäyëty tim tukxiknëdë tyäˈädë mixy. ¿Mnijäˈäp pënëˈë? Yëˈë Jeremiiʉs tuˈugë Diosë kyugajpxy.

Waanë nety kujk ja tiempë të nyaxy mä ja Josiiʉs dyajkutëgooytsyondaˈaky ja awinax, ko Jyobaa tˈanmääyë Jeremiiʉs ets tyunët kugajpxy. Perë Jeremiiʉs ta wyinmääjy ko yëˈë tim mutsknëm ets dëˈën tyunët. Jyobaa ta yˈanmääyë ko yëˈë pudëkëyanëp.

Jeremiiʉs ta tˈanmääyë israelitëty ets kyaj tnekytyundëdë axëkˈäjtënë ets ko ja dios diˈib ja naxwinyëdë jäˈäy yˈawdäjttëp kyaj tyëyˈäjtënëty. Per may ja israelitëty niˈigyë tˈawdatandë awinax ets kyaj dyëˈënëtyë Jyobaa, tadë Diosë tëyˈäjtënbë. Ets ko ja Jeremiiʉs tˈanmääytyë ko Dios tukumëdowanëdëp ko axëëk yˈadëˈëtstë, ta jeˈeyë tyukxikëdë.

Nyajxy kanäk jëmëjt ta ja Josiiʉs ojts yˈoˈknë, ets kyum tëgëk poˈo ta ja myäänk Jyoyakim tyëjkë rey. Jeremiiʉs ta tˈanmääyˈadëtsy ja käjpn: Jerusalén käjpn kutëgoyäämp pën kyaj mnayajtëgatsëdë. Ta ja saserdotëty tmäjtstë Jeremiiʉs ets jyënandë: Jeremiiʉs nitëjkëp yˈoogët mët ko të ayoˈon ttuknikäjxpetyë ngäjpnˈäjtëm.

¿Ti net tyuunë Jeremiiʉs? ¡Kyaj tsyëˈkë! Niˈigyë tˈanmääjy niˈamukë jäˈäy: Jyobaa yëˈëjëts të xykyexy etsëts miitsëty dëˈën nˈanëëmëdët. Pën kyaj xyajtëgatstë mjukyˈäjtënë, ta Jyobaa dyajkutëgoyaˈanyë Jerusalén käjpn. Ets ntsojkypyëts xynyijawëdët ko pën xyaˈoˈktëbëts, yëˈë nety myaˈoˈktëp tuˈugë jäˈäy diˈib kyaj ti të ttuundëgoy.

Ta ja wintsëndëjk kyaj dyaˈoˈktë Jeremiiʉs, ets ja israelitëty dëˈënyëm ttuundë axëkˈäjtënë. Ok ta myiinyë Nabukodonosoor ja rey diˈib Babiloñʉ, ets tsyiptuuny mët ja Jerusalén käjpn. Ets ta ja Nabukodonosoor ojts tmënejxy Babiloñʉ milˈamë israelitëty ets jap ttuumbëˈäjt tmosëˈäjttë. ¡Ok pawinmay wiˈix mnayjawëdët ko wiink jäˈäy mënëjxëdët mä tuˈugë käjpn diˈib kyaj xyˈixyˈaty!