Taxkë mixy diˈib kuwijy kuwinmäˈäny

KO JA rey Nabukodonosoor ojts tmënejxyë israelitëty jam Babiloñʉ, ta twinˈijxyë ëxpekyatypyë. Ok ta net ttukwijtstuty nimayë mixyë tsujatypyë etsë wijyˈyatypyë, per yam jeˈeyë xyˈixy nimäjtaxk. Tuˈuk ja txëˈäjty Daniel, etsë tadë nidëgëëkpë ja babilonyëty xyëëmooyëdë Sadrak, Mesak ets Abednego.

Nabukodonosoor yëˈë yaˈëxpëkandë tëgëk jëmëjt ets tyundët mä yëˈë yˈaneˈemy. Ets ko nety të yˈabety tëgëk jëmëjt ta twinˈixäˈäny pënaty diˈib mas wijy ets mbäät pyudëkëty mä ja amay jotmay dyaˈoyë. Nabukodonosoor tsyojk ets ja mixyëty yˈittët oy mëk, pääty ojts tniˈanaˈamë ets ja käˈäy ukënë yajmoˈoytyët diˈib yëˈë mëdë fyamilyë jyëˈxtëp.

Ok ixë netë Daniel. ¿Mnijäˈäp wiˈix jam tˈanëëmë Aspenas, ja diˈib jëjpˈam myëduumbyë Nabukodonosoor? Yëˈë jam yˈanmaapy ko kyaj tjëˈxäˈäny ja diˈibë rey jyeˈxypy. Aspenas ta jyotmaytyuktëjkë ets jyënany: Rey yëˈë diˈib të jyënaˈany ti mjëˈxtëp ets ti mˈuuktëp, yëˈko pën kyaj mgëxëˈëktë oy mëk extëmë wiingatypyë mëguˈuktëjk, tsojktsë tadë rey xyaˈoogët.

Ko dëˈën yaˈatsoojy ja Daniel ta net tmëtmaytyaky ja Aspenasë tyuumbë diˈib kuentˈäjtëdëp ets tˈanmääjy: Nˈokˈijxmäjtsëm mäjk xëë, tukjëˈxtëgëtsë ääjy ujts ets tukˈuktëgëtsë nëë. Tatsë net xyˈijxkijxyëdët mëdë wiinkpë mixyˈënäˈk diˈib jyëˈxtëbë reyë kyaˈay yˈukënë, ets xyˈixët pën mas oy mëk këxëˈkp.

Ja Aspenasë tyuumbë ta tkupejky. Ets ko yˈabejty mäjk xëë, yëˈë Daniel mëdë myëtnaymyaayëbëty diˈib këxëˈktë mas oy mëk ets kyaj dyëˈënëty ja wiingatypyë mixyëty. Pääty ojts yajnaˈixtë ets tjëˈxˈadëˈëtstëdë ääjy ujts.

Ta ko yˈabejty tëgëk jëmëjt ta ojts yajmënëjxtë niˈamukë mä ja rey Nabukodonosoor, ets mëët kyäjx myaytyäˈäktët, ta net ja rey tˈijxy ko Daniel mët ja nidëgëëkpë myëtnaymyaayëbë yëˈë diˈib mas kuwijy kuwinmäˈäny. Pääty yëˈë ja rey winˈijxëdë ets tpudëkëdët mä yˈaneˈemy. Ko ja rey ti dyajtëwäˈäny o tmëdatyë amay jotmay ta tninejxyë Daniel, Sadrak, Mesak etsë Abednego, ets mäjk dëˈënën wyijyˈyatyˈäjttë ets kyaj dyëˈënëty ja saserdotëty ets ni ja wyijy jyaˈayëty.