Ja Jerusalén käjpn yajnabotsy

¡OK IXTË tadë israelitëty mëk jam tyundë! Yëˈë jam nyabojtstëbë Jerusalén käjpn. Pes tam nyëjxnë naa 152 jëmëjt mä ja Nabukodonosoor tjijtääjy ja potsy ets tnoˈktääjy ja käjpndëjkˈää. Ko ja israelitëty jyäjttë jatëgok jam Jerusalén kyaj netyë tnabojtstë ja käjpn.

¿Wiˈixëdaa nyayjäˈäjëdë ja israelitëty ko tsyënääytyë Jerusalén ets kyaj nyabotsyëty? Kyaj nyayjäˈäjëdë seguurë, yëˈko mbäät pojënë ja myëtsip nyidëkëdë. Per ok ix yam tuˈugë tyäˈädë yetyëjk diˈib pyudëjkëbë israelitë mä ja potsy pyety, ja txëˈäjty Neˈemiyës. ¿Mnijäˈäp pën Neˈemiyësˈäjt?

Neˈemiyës yëˈë tuˈugë israelitë diˈib tsoˈon mä ja käjpn diˈib xyëˈäjtypy Susa. Mä tsyënääyë Mardokeo mëdë Ester. Waˈanë Neˈemiyës nyaymyaayëdë mët yëˈëjëty. Biiblyë jyënaˈany ko Neˈemiyës yëˈë myëduun ja rey diˈib xyëˈäjt Artajerjes.

Jamyats ko Artajerjes oyjyaˈay, yëˈë diˈib nyamoojy tijaty ja Esdras ets tmënëjxët Jerusalén ets dyaˈoyët ja Jyobaa tyëjk. Perë Esdras kyaj tnabojtsyë käjpn. Min nˈokˈijxëm wiˈixë Neˈemiyës dyajpëdeˈky ja potsy.

Neˈemiyës yëˈë nety yajnäjxëp ja kyopë rey, tˈadaˈamë byinë ets tˈixy pën kyaj tmëdatyë benenë. Mëj ja tuunk diˈib nyikëjxmˈäjt. Ko dëˈën ja Neˈemiyës tyuuny ja nety kujk nyaxy mäjktëgëk jëmëjt mä ja Artajerjes tmooyë Esdras meeny ets dyaˈoyët ja Jyobaa tyëjk.

Tuˈugë xëë ja Neˈemiyës ojts kyuˈixyëty ja myëgaˈax diˈib xyëˈäjt Ananii ets mëdë wiingatypyë jäˈäy diˈibë tsoˈondëp Jerusalén. Ta tyukmëtmaytyakëdë ti jotmayë nety myëdäjttëbë israelitëty, ets ko ja käjpn nawäˈätsë nety yajpääty. Neˈemiyës ta jyotmaytyuktëjkë, ets tmënuˈkxtakyë Jyobaa.

Tuˈugë xëë ta rey tˈijxy ko ja Neˈemiyës jotmayˈoˈkp, ta dyajtëëjy: ¿Tiko mjotmayˈooky? Neˈemiyës ta yˈatsoojy: Yëˈko Jerusalén käjpn kyaj oy yajpääty ets ko nawäˈäts jam yˈity. Ta ja rey yajtëëjë: ¿Ets ti mtsojkypy etsëts ndunët?

Ta ja Neˈemiyës yˈatsoojy: Kajxkëts Jerusalén, etsëts nëjx nabotsyë käjpn. Ja Artajerjes kom oyjyaˈay, ta tˈanmääjy ko mbäät nyejxy, ets ta tmooyë kepy diˈib yajtunëp mä ja potsy dyajpatäˈäny. Ta ko ja Neˈemiyës jyajty Jerusalén, ta ttukmëtmaytyaky ja käjpn ti nety tyunaampy. Ja israelitëty ta tˈoymyëdoojy, ets ta jyënandë: Min nˈoknabojtstsondakëmë tyäˈädë käjpn.

Ta ko ja israelitëtyë myëtsip tˈijxtë ko tam dyajpattë ja potsy ta jyënandë: Nˈoknijoˈomëm ets nyaˈoˈktäˈäyëm ets nyajtuˈuwëˈëmëmë tadë tyuunk. Ko dëˈënë Neˈemiyës tnijäˈäjë ta tmooytyë ja tuumbëtyë espäädë etsë lansë ets tˈanmääjy: Katë mtsëˈëgëdë. Nitsiptundë mjiiky mëguˈuk, mˈuˈunk mˈënäˈk, mˈuˈunk mnëdoˈoxy etsë mjëën mdëjk.

Ja israelitë ak jotmëk nyaybyëjtakëdë. Ets xëëny koots tmëdäjttë listë ja yˈespäädë etsë lyansë ets niˈigyë ja potsy dyajpajtˈadëtstë. Pääty kyum 52 xëë ta dyaˈabajttë potsy. Taanëm ja käjpn yˈijty seguurë. Etsë Esdras mëdë Neˈemiyës ttukˈëxpëjktë ja israelitëtyë Diosë yˈanaˈamën ta nyayjäˈäjëdë agujk jotkujk.

Per oy ja käjpn jyaˈijty seguurë kyaj nety nyekydyëˈënëty extëm mä kyayajmënëjxtënëm Babiloñʉ. Yëˈko yëˈë anaˈamëdëp ja rey diˈib Persia, ets yëˈëjëty kuanë ko tmëduundë. Perë Jyobaa ta twandaky ko kyaxaampy tuˈugë rey, ets yëˈë diˈib yajjaˈataambyë tuˈugyëˈäjtënë mä ja nax käjpn. ¿Pënë dëˈënë tyäˈädë? ¿Wiˈixë dëˈënë tuˈugyëˈäjtënë dyajnaxkëdäˈägäˈäny yä Naxwiiny? Ja nyajxy 450 jëmëjt ets yajnijäˈäjë pënë dëˈën tyäˈädë rey. Mä ja tuˈugë maytyaˈaky tyëkëyaˈany nijawëyäˈänëm wiˈix myaxuˈunkˈäjtyë tyäˈädë rey.