Jesús myaytyaˈaky mët tuˈugë samaritanë

JESÚS jamë nety tyuˈubeˈxy Samaaryʉ mä tuˈugë nëgoondakn. Ja yˈëxpëjkpëty të nety nyëjxtë käjpnoty nëjx tjuyäˈändë käˈäy ukënë. Ta myiinyë tadë toxytyëjk nëgoombë diˈib jam mëdë Jesús myaytyaˈaky. Jesús ta tˈanmääyë tadë toxytyëjk: Moogyëts waanë nëë.

Ja toxytyëjk kyaj tnijäˈäjë tidën ko Jesús myëgajxyëty. ¿Mnijäˈäp tiko? Yëˈko Jesús judiyë, etsë tadë toxytyëjk samaritanë. Ets may ja judiyëty kyaj tˈixäˈändë samaritanë. ¡Ni jeˈeyë tkakäjxpoˈxtë! Perë Jesús tsyojkypy niˈamukë jäˈäy. Pääty tˈanmääjy: Koxyëp xyˈoknijawë ko nmëdäjtypyëtsë nëë diˈib yajkypyë jukyˈäjtënë, xyˈamdoopxyëptsë tadë nëë ets nmoopyxyëp.

Ta ja toxytyëjk jyënany: Wintsën, këkë nëdäjny ets kyaj xymyëdaty ti mëdë nëë xyjuudët. ¿Wiˈixtsën mijts xymyoˈoyëdë nëë diˈib yajkypyë jukyˈäjtënë?

Jesús ta yˈatsoojy: Pën mˈukypyë tyäˈädë nëë, ta jatëgokë tëëtsë mbäädäˈänyëty, perë tadë nëë diˈibëts ëjts nyajkypy mbäädë jäˈäy dyajjukyˈaty winë xëë winë tiempë.

Ta ja toxytyëjk jyënany: Wintsën, ¡moogyëtsë tadë nëë! Netëtsë tëtsë kyaj xynyekypyäädët ets ninäˈäts nganekymyinët yä nëgoombë.

Ja toxytyëjk dëˈën wyinmääjy ko Jesús yëˈë myaytyakypyë nëë diˈib yaˈukp. Perë Jesús yëˈë nety myaytyakypy ja tëyˈäjtënë diˈib mä Dios etsë yˈAnaˈamënë, diˈib dëˈën extëmë nëë diˈib yajkypyë jukyˈäjtënë. Jeˈeyë ko yëˈë jukyˈäjtënë diˈib winë xëë winë tiempë.

Jesús ta net tˈanmääjy ja toxytyëjk: Nëjx wowë mnyaˈay.

Ta yˈatsoojy: Kyajts pënë nyaˈay.

Ta Jesús yˈanmääyë: Oy të mˈatsoy, per ja të xymyëdaty mëgoxkë mnyaˈay, etsë tadë yetyëjk diˈib mëët tyam mtsëënë kyaj xynyaˈayëty.

Ta ja toxytyëjk dëˈënyë ojts wyëˈëmë, yëˈko tëyˈäjtën extëm yaˈanmääjy. Per ¿wiˈixë Jesús tnijäˈäjë? Yëˈë Dios tuknijäˈäjë, pes yëˈë nety diˈibë të yajwandaˈaky ko kyëdäˈägäˈäny yä Naxwiiny. Ta jyäjttë Jesusë yˈëxpëjkpëty ets ta dëˈënyë ojts wyëˈëmëdë ko tˈijxtë ja Jesús tam myaytyaˈaky mët ja samaritanë.

¿Ti diˈibë tyäˈädë xytyukniˈijxëm? Ko Jesús oyjyaˈay yˈijty mët oy tyim pënëty. Ëtsäjtëm nandëˈën mbäät njäˈäyˈäjtëm; kyaj mbäät nˈaxëkˈijxëmë jäˈäy mët ko wiink käjpn tsyoony. Jesús tsyojkypy ets niˈamukë jäˈäy tnijawëdë tëyˈäjtënë diˈib xytyukpäädäˈänëmë jukyˈäjtënë winë xëë winë tiempë. Ets ëtsäjtëm nandëˈën mbäät nbudëjkëmë jäˈäyëty ets tjatëdë tëyˈäjtënë.