Jesús yajkëyäjknë

KO YˈAˈUXˈÄJTÄÄYTYË, ta ja Jesús mëdë yˈapostëlëty ojts nyëjxtë mä ja nëgam diˈib xyëˈäjtypy Jetsemanii, jam ijty xëmë nyejxy. Jesús ta tˈanmääyë yˈapostëlëty ets yˈittët wijy ets nyuˈkxtäˈäktët, ta ojts nyejxy tuk nasˈixë ta nyayjujpë naxkëjxy ets nyuˈkxtaky.

Ok ta Jesús jyëmbijty mä ja yˈapostëlëty. ¿Mnijäˈäp ti nety jam tyuundëp? ¡Jantsy määdëp! Tëgëk okë Jesús yˈanmääyëdë ets kyaj myanaxtët, per tëgok tëgok jyëmbity ak määdëp tpäättë. Jesús ta tˈanmääytyë mä ja myëdëgëkˈokpë jyëmbity, ¿wiˈix ko mäˈä mboˈxtë ets të ja oorë tpääty mäts nyajtukëdëkëyaˈanyë nmëtsipëty?

Ko dëˈën jyënäändääjy ta tmëdoodë may jyaˈay jyantsy myindë. Ta tˈijxmiindë yetyëjkëty mëdë yˈespäädë etsë kyepy ets mëdë tsyinwaty diˈib kudëˈxëdëp. Ko myëwingoonëdë ja may jyaˈay ta tuˈugë jäˈäy tnibëtseemyë Jesús. Ta ojts ttsuˈkxy, extëm yam xyˈixy. ¡Tyäˈädë yetyëjk yëˈë Juudʉs Iskaryotʉ! ¿Tiko ojts ttsuˈkxyë Jesús?

Yëˈë ets ja jäˈäyëty tnijawëdët pënë dëˈën Jesús diˈib yˈëxtääytyëp. Jesús ta dyajtëëyë Juudʉs: ¿Dëˈënëts xykyëyaky mët kots xytsyuˈkxy? Ta ja Jesusë myëtsipëty myëwingoonëdë ets myäjtsëdë. Perë Peedrʉ ta tnitsiptuunyë Jesús ets kyaj yajmënëjxët. Ta tjuˈtyë yˈespäädë ets ttuknibëdeˈky ja yetyëjk diˈibë nety jam wingon. Ets ta ttasktsujktuty. Perë Jesús ta ojts ttoonë ja jäˈäyë tyatsk ets dyaˈagëdaky.

Jesús ta tˈanmääyë Peedrʉ: Pëjkëˈëgë mˈespäädë mä xyaˈity. ¿Ti kyaj xytyijy mbäät nˈamdoytsë ndeety milˈamë anklës ets xypyudëkëdëts? ¡Mbäätxyëp jaˈijty tjaˈamdoojy! Perë Jesús kyaj tˈamdooyë tyeety ets tkaxëdë anklës, yëˈko nyijäˈäbë nety ko të ja tiempë jyaˈty ets ja myëtsipëty myënëjxëdët. Pääty tnaˈijxy ets ja myëtsipëty myatsëdët. Min nˈokˈijxëm wiˈixë netë Jesús jyajty kyëbejty.