Ëxpëjkën 7
Wiˈix nmëwingoˈonëmë Dios ko nmënuˈkxtakëm
¿Tiko jyëjpˈamëty xëmë nuˈkxtakëm? (1)
¿Pën diˈib mbäät nmënuˈkxtakëm, ets wiˈix mbäät nduˈunëm? (2, 3)
¿Tijaty mbäät ninuˈkxtakëm? (4)
¿Näˈä mbäät mnuˈkxtaˈaky? (5, 6)
¿Myëdooˈijtypyë Dios tëgekyë nuˈkxtakën? (7)
1. Nuˈkxtakën yëˈë yˈandijpy ko nmëtmaytyakëmë Dios yujy tudaˈaky. Tsojkëp nmënuˈkxtakëmë Dios xëmë. Pën nuˈkxtakëm, nëjxëp njäˈäjëm wingon extëm tuˈugë mëtnaymyaayëbë diˈib mëk ntsojkëm. Oyë Jyobaa jyantsy myëjëty ets kyumëjääjëty, myëdoogujkëp ko nmënuˈkxtakëm. ¿Mënuˈkxtakypyë Dios xëmë? (Salmo 65:2; 1 Tesalónikʉ 5:17.)
2. Tuk peky wiˈix mbäät nyaˈijxëm ko nmëjjäˈäjëmë Dios ja ko nmënuˈkxtakëm. Pääty yëˈëyë naytyuˈugë Jyobaa Dios diˈib mbäät nmënuˈkxtakëm. Ko Jesús yˈijty yä Naxwiiny, yëˈë xëmë myënuˈkxtakë tyeety, kyaj pënë wiinkpë tmënuˈkxtaky. Ëtsäjtëm nandëˈën mbäät nduˈunëm (Matewʉ 4:10; 6:9). Per tsojkëp nuˈkxtakëm xëmë xyëëgëjxmë Jesús. Dëˈëntsoo nety nyaˈijxëm ko nwintsëˈkëm ja kutujkënë diˈib yëˈë myëdäjtypy, ets ko nmëdäjtëmë mëbëjkën ko yëˈë të xykyuˈoˈkëm ets të xyjuˈuybyëtsëˈëmëm (Fwank 14:6; 1 Fwank 2:1, 2).
3. Ko nmënuˈkxtakëmë Dios jap tsyoonëdë tadë ää ayuk mä jot korasoon. Kyaj yˈoyëty agëbajky njäjtëm wiˈix nuˈkxtakëm ets nan kyaj yˈoyëty nbaˈijxëm mä tsäjkajxy nyoky (Matewʉ 6:7, 8). Mbäät nuˈkxtakëm oytyim määty, waˈan tim näˈäty ets oytyim wiˈixëty jeˈeyë ko nduˈunëm mëdë wintsëˈkën. Dios myëdoobyë nuˈkxtakën axtë diˈib nduˈunëm jodoty winmäˈänyoty (1 Samuel 1:12, 13). Ko këˈëm naynyinuˈkxtakëm oy ko nduˈunëm mä tuˈugë lugäärë adëkëtuuybyë mä kyaj pën xyˈijxëm (Markʉs 1:35).
4. ¿Tijaty mbäät xynyinuˈkxtäägë? Tëgekyë diˈib mbäät mˈoytyunyëty parë mëdë Dios mnaymyayëdët (Filipʉs 4:6, 7). Tadë nuˈkxtakën diˈib mä padrenuestro tnigajxy ko tsojkëp ninuˈkxtakëmë Jyobaa xyëë ets diˈib yëˈë tyuknibëjtakëp ttunäˈäny. Nandëˈën mbäät nˈandoˈojëm ets xymyoˈoyëm tijaty xytyëgoyˈäjtxëm, tmaˈxëdë nbokyˈäjt ngaytyeyˈäjtëm ets xypyudëjkëm parë njëjpkudijëmë axëkˈäjtën (Matewʉ 6:9-13). Ko nuˈkxtakëm yëˈë mbäät nˈandoˈojëmë Dios diˈib yëˈë tyukjotkëdakypy ets kyaj yëˈëjëty jeˈeyë diˈib ëtsäjtëm ntsojkëm (1 Fwank 5:14).
5. Mbäät mnuˈkxtaˈaky näˈä tyim jënäˈänyë mjot mgorasoon tmoˈoyaˈanyë dioskujuyëmë Dios o tmëjkumayaˈany (1 Crónicas 29:10-13). Nuˈkxtäˈäk xëmë ko xymyëdatëdë amay jotmay ets ko xyjawëdë mëbëjkënë tyëgoyaˈany (Salmo 120:1; 1 Peedrʉ 5:7). Ko mgayäˈänët nan oy ko mnuˈkxtäˈägët (Matewʉ 14:19). Jyobaa xyˈanmäˈäyëm ets nuˈkxtakëm «oy tyim näˈäty» (Kolosʉ 4:2, OTJ).
6. Pën pokytyuˈunëm mëjwiin kajaa, tsojkëp nmënuˈkxtakëmë Jyobaa waˈan xynyasˈayoˈojëm ets xypyokymyaˈkxëm. Dios ijtpë «listë ets xypyokymyaˈkxäˈänëm» per net ko nmayäjtsëmë nbokyˈäjtëm ets nduˈunëmë mëjää ets kyaj neky tyuˈunëmbijtëm (Salmo 86:5, NM; Proverbios 28:13).
7. Jyobaa yëˈëyë myëdooˈijtypyë oyjyaˈayë nyuˈkxtakën. Parë Jyobaa tmëdoˈitëdë mnuˈkxtakën, tsojkëbë dëˈën xytyunëdë mëjää ets mjukyˈatët dëˈën extëmë Diosë yˈanaˈamënë jyënaˈany (Proverbios 15:29; 28:9). Ko mnuˈkxtäˈägët tsojkëp xytyunët mëdë yujyˈat tudaˈakyˈat (Lukʉs 18:9-14). Ets ta net xykuytyunët diˈibë Dios të xyˈandoy. Dëˈëntsoo xyaˈixëdët ko mëdäjtypyë mëbëjkënë ets ko mnuˈkxtakp amumduˈukjot. Netë Jyobaa tˈatsojëmbitëdë mnuˈkxtakën (Ebreeʉsʉty 11:6).