Nˈokjëjpkudijëmë relijyonk diˈib kyaj tyëyˈäjtënëty

Satanas mëdë kyaˈoybyëty kyaj ttsoktë ets nmëduˈunëmë Dios. Tyukmastuˈudandëbë jäˈäyë Dios nëˈën tmëmadaˈaky. ¿Wiˈix ttuny? Tuk peky wiˈix myadäˈäktë yëˈë mëdë relijyonk diˈib kyaj tyëyˈäjtënëty (2 Korintʉ 11:13-15). Tuˈugë relijyonk kyaj tyëyˈäjtënëty pën kyaj tyukniˈixë tëyˈäjtënë diˈib mä Biiblyë. Relijyonk diˈib kyaj tyëyˈäjtënëty dëˈën extëmë meenyë agojwinaxypyë: mbäät kyëxuty jantsy meenyën ets kyaj tii ttsooˈatët. Per kyaj yëˈëyëty jeˈeyë, nandëˈën mbäät xymyoˈoyëmë amay jotmay.

Tuˈugë relijyonk diˈib kyaj tyëyˈäjtënëty ninäˈä tkatukjotkëdäˈägëdë Jyobaa, tadë Dios diˈib myëdäjtypyë tëyˈäjtën. Ko Jesus yˈijty yä Naxwiiny, ja wintsëndëjk diˈib mä tuˈugë relijyonk ojts jyayaˈoogäˈänyëty. Yëˈëjëty wyinmaytyë nety ko Dios tˈawdattë mëdë tëyˈäjtën. Jyënandë: «Ëëtsëty nmëdäjttëptsë ndeety tiˈigyë yëˈë Dios». Per ¿waˈandaa Jesus jyënany ko tëyˈäjtën extëm jyënäˈändë? Kyaj. Yëˈë tˈatsoojy: «Miits mëjkuˈu mdeetyˈäjttëp es yëˈë miits mjaˈäjtëdëp» (Fwank 8:41, 44). Mä tyäˈädë tiempë, mayë jäˈäy jyënäˈändë ko tˈawdattë Dios, per tim tëyˈäjtën yëˈën myëduundëbë Satanas mëdë kyaˈoybyëty (1 Korintʉ 10:20).

Dëˈën extëm tuˈugë kepy diˈib kyaj yˈoyëty tëëmpˈäjtp axëëk, nandëˈënë jäˈäy diˈib tyukˈijtëbë relijyonk diˈib kyaj tyëyˈäjtënëty axëëk jyukyˈattë. Tyäˈädë Naxwinyëdë yˈity tuktiky mëdë amay jotmay mët ko jäˈäy ttundë axëkˈäjtënë. Jyaˈatyë maˈtspë, tsip, naytyëytyunë, nayaˈoogë, pyokytyundë yetyëjk toxytyëjk ets jyaˈatyë jäˈäy diˈib aguanë pën myëttsënaapy. Mayë jäˈäy diˈibë tyäˈädë tyuundëp myëdäjttëbë ryelijyonk, perë tadë ryelijyonk kyaj pyudëkëdë ets ttundëdë oybyë. Kyaj mbäät nyaymyayëty mëdë Dios pën kyaj tmastuˈuttë axëkˈäjtën (Matewʉ 7:17, 18).

Mä tadë relijyonk diˈib kyaj tyëyˈäjtënëty yajtukniˈixë jäˈäy tmënuˈkxtäˈägëdë santë. Dios xyˈanmäˈäyëm ko kyaj mbäät nmënuˈkxtakëmë santë. Etsë tyäˈädë yajjaygyujkëbëˈë tiko Dios dëˈën xyˈanmäˈäyëm. ¿Mˈoyjawëp ko pën ninäˈä mgamëgäjxëdët per myëgäjxëbë mrretratë? ¿Mbäädë tadë jäˈäy xyˈoymyëtnaymyaayëbëˈaty? Kyaj, pes kyaj mbäät. Jyobaa tsyojkypy etsë jäˈäy yëˈë myëgäjxëdët, kyaj ttsoky etsë jäˈäy tmëgäjxëdë kuäädrë o potsy diˈib kyaj jyuugyëty (Éxodo 20:4, 5; 1 Korintʉ 8:4).

Mä tadë relijyonk diˈib kyaj tyëyˈäjtënëty yajtukniˈixëdë jäˈäy ko mbäät nyayaˈoogëdë ko tsip tyunyëty. Jesus jyënany ko myëtnaymyaayëbë Dios nyaytsyokäˈänëdë nixim niyam. Kyaj nyaˈoˈkëmë jäˈäy diˈib ntsojkëm (Fwank 13:35). Ets oyxyëp tyim axëkjäˈäyˈäjtpë kyaj mbäät nyaˈoˈkëm. Ko Jesus myäjtsëdë myëtsip, yëˈë kyaj tkupejky etsë yˈëxpëjkpëty nyitsiptunëdët (Matewʉ 26:51, 52).

Mä tadë relijyonk diˈib kyaj tyëyˈäjtënëty yajtukniˈixë jäˈäy ko axëkjäˈäyëty nyëjxtë ayoobë mä ayoodakn. Perë Biiblyë tyukniˈixë ko poky yëˈëdën yajkuˈoˈkëp (Romʉ 6:23). Jyobaa yëˈë tuˈugë Dios diˈib tsojkp. ¿Yaˈayowëbë jäˈäy winë xëë winë tiempë tuˈugë Dios diˈib tsojkp? Pes kyaj. Ko nety ja it Naxwinyëdë të jyëmbity tsuj jeˈeyë jyamˈatäˈäny tuˈugë relijyonk, tadë relijyonk diˈibë Jyobaa kyupejkypy (Diˈibʉ Jatanʉp 15:4). Tëgekyë wiingatypyë relijyonk diˈib tsoˈomp mä yˈanëë Satanas të nety tyëgooytyaˈay.