Dios kyunuˈxë Abrään mëdë fyamilyë

JYOBAA nyijäˈäbë naty ko jäˈtäämp ja tiempë mä yˈUˈunk yˈayowäˈäny ets yˈoogäˈäny. Pes duˈun ojts yajjaygyukë diˈib yajnaskäjxë mä Génesis 3:15. Parë naxwinyëdë jäˈäy tnijawëdët wiˈixë natyë Jyobaa dyajnaxäˈänyë jäj jëmuˈumën ko ja yˈUˈunk yˈoogët, ta dyajkujäˈäyë mä Biiblyë ti tuun jäjtë ko tˈanmääyë Abrään ets ja yˈuˈunk diˈib mas tsyejpy tyukwintsëˈëgëdët.

Nˈokjamyajtsëm ko Dios të naty tˈanëëmë Abrään ko ja Yajnitsokpë myinäˈäny mä Isää tyëëm yˈääts, pääty ko yaˈˈanmääy dyaˈoogëdë yˈuˈunk myëbëjk ko Dios mbäät dyajjukypyekyë Isää. Abrään myëmëdoojë Dios ets ta ttukwintsëˈëgëyany ja yˈuˈunk, per mä naty jam dyaˈooganë ta Jyobaa netyë tkejxyë yˈanklës parë kyaj dyaˈoogët. Jyobaa myëjkumääyë Abrään mët ko tmëdäjty mëk ja mëbëjkën ets ta jatëgok tnikäjxëmbijty ti naty të tˈoktukwinwäˈänëbë.

Ko ja tiempë nyajxy ta Isää majtskë yˈuˈunk myaxuˈunkˈäjty, Esäˈuu mëdë Jakoob, per yëˈë Jakoob diˈib myëjjäˈäjë tijatyë Dios jyaˈäjtypy, pääty ojts yajkuniˈxy. Ok, ta Dios xyëëmooyë Israel ets ja nimäjmajtskpë yˈuˈunk yëˈë diˈibë net nyigëbäjkˈäjt ja nimäjmajtskpë tëëm ääts. Per ¿wiˈixë tyäˈädë familyë jyëmbijty mëj nasionk? Min jawyiin nˈokˈijxëm tijaty tuun jäjtë.

Ja Josee yˈajtsyëty mëk tjäˈäjëdë naywyinaxë, pääty axtë toˈkëdë extëmë tuumbë mosë. Ta ojts yajmënëjxnë Ejiptë mä dyajnäjxyë amay jotmay. Perë Dios ta tpudëjkë tyäˈädë mixy diˈib xëmë mëmëdoojë ets diˈib yaˈijxë jotmëkˈäjtën. Ko ja tiempë nyajxy, ta faraˈon diˈib anaˈamp Ejiptë myooyë ja kutujkën. Pääty ko myiinyë yuu ta tpudëjkë fyamilyë ko ja myëgaˈaxëty jyäjttë parë tjuyäˈändë jeˈxy peky, pes yëˈë natyë Josee diˈibë nyikëjxmˈäjtypy ja jeˈxy peky. Ko nyaybyatëdë mëdë myëgaˈaxëty diˈibë naty të jyodëmbittë, ta ojts tpokymyeˈxy ets tnigajxë parë jyäjtäˈäyët ja fyamilyë. Ja faraˈon ta myooyëdë oybyë nax ets jam ja fyamilyë ojts myayë. Josee ta tjaygyujkë ko Jyobaa naty të tnasˈixë ets duˈun tyun jyatëdët parë yˈadëwët diˈibë naty të twandaˈaky.

Jakoob jam tsyënääy Ejiptë mëdë fyamilyë axtë ko ojts yˈoˈknë. Ko naty yˈooganë ta ojts tnaskäjxë ko ja Yajnitsokpë myinäˈäny mä Judaa tyëëm yˈääts ets ko yˈitäˈäny rey diˈib myëdäjtypyë mëkˈäjtën. Ko ja tiempë yˈaknäjxy, ta Josee ojts tnaskäjxë ko Dios yajpëtsëmaambyë naty jap Ejiptë ja fyamilyë Jakoob.

(Jap yajnimaytyaˈaky mä Génesis kapitulo 20-50 ets mä Ebreeʉsʉty 11:17-22.)