Job kyaj tmëduundëgooyë Dios

¿MBÄÄT tuˈugë jäˈäy tmëmëdoy xëmë Dios ko tpäädëdë amay jotmay oy pën wyinmayët ko niwiˈixtsoo tkatukˈoyˈatäˈäny? Tuˈugë jäˈäy diˈib xyëˈäjt Job wyinguwäˈkë duˈumbë jotmay. Min nˈokˈijxëm wiˈix wyimbëtseemy.

Job yëˈë pyamëguˈukˈäjtë Abrään, jam tsyënääy mä tyam txëˈaty Araabyë ets ja jyukyˈajty ko ja israelitëty tsyënääytyë Ejiptë. Tëgokë Jyobaa tmaytyakyë Job ko naty të tyuˈukmuktë mëdë yˈanklës, nan tamë natyë Satanas yajpääty. Jamë Jyobaa ojts tnigajxy ko kyaj pën duˈun myëdunyëty extëmë Job, pes nyijäˈäbë naty ko ninäˈä kyamëduundëgoyaˈanyëty. Perë Satanas ta jyënany ko Job pääty tmëdunyë Dios mët ko tijaty myoˈoyëty ets mët ko kyuentˈatyëty, per pën yajpëjkëtyaapy tijaty myëdäjtypy, myastuˈudëbë Jyobaa.

Jyobaa ta tnasˈijxë etsë Satanas tpëjkëtyaˈayët tijatyë Job myëdäjtypy, ojts dyaˈoˈktääyë yˈuˈunk yˈënäˈk ets ok ta dyajpäˈämbejty. Komë Job kyaj naty tnijawë pën yëˈë Satanas axëktuunëp, pääty kyaj tjaygyujkë tiko Dios tnasˈixë ets duˈun jyat kyëbatët. Per oy tkajaygyujkë, ninäˈä tkamëduundëgooyë Dios.

Ta net nyimiinëdë nidëgëëgë yetyëjk diˈibë naty nayajnäjxëdëp extëmë myëtnaymyaayëbë ets tyëjkëdë abajt kutujkpë. Mä liibrë diˈib xyëˈäjtypy Job, jap kajaa yajkujäˈäyë ko tyäˈädë yetyëjkëty jyatsojktë etsë Job wyinmayët ko päätyë Dios tyëytyunyëty mët ko të ayuˈutsyë pyokytyuny. Axtë jyënandë ko Dios kyaj tmëjpëjtaˈaky pënaty mëduunëp ets ko kyaj tˈawixy etsë naxwinyëdë jäˈäy xëmë myëmëdowëdët. Perë Job kyaj tmëjpëjtaky wiˈix yaˈˈanmääy, niˈigyë jyënany: Axtë naˈoogëdëts ninäˈäts ngamastuˈudëdë Dios.

Job ja kyäjxtëgooy ko jyënany ko niˈigyë yˈoyjyaˈayëty. Ta Eliuu diˈibë naty të tmëdoodäˈäy wiˈix të maytyäˈäktë ttukjaygyujkë Job ko kyaj yˈoyëty extëmë naty të nyaymyëjkugajxyëty, ets ko diˈib mas jëjpˈam yëˈë myëjpëtsëmëdë Diosë xyëë ets ja kutujkën diˈib myëdäjtypy. Ta nanduˈun ojts tmëkmëgajxy ja diˈibë naty nayajnäjxëdëp extëmë Jopë myëtnaymyaayëbë.

Ok, ta këˈëmë Jyobaa ttukjaygyujkë Job mët yëˈëgyëjxmë kyojy pyëjtaˈaky, ets dyajwinmääy ko naxwinyëdë jäˈäy nitii tkatsoojëty ko yaˈijxkijxyë mët ja mëjˈäjtënë diˈib Yëˈë myëdäjtypy. Job kyupëjk extëmë Jyobaa tyukjaygyujkë. Ets mët ko Dios “jyantsy pyaˈˈayoy” ets yˈoyjyaˈayëty, ta jatëgok ojts tkuniˈxyë Job, dyaˈˈagëdaky, tmooy jatëgok nimäjkë yˈuˈunk ets majtsk duˈunën ojts myayë ja jyëyujk yˈanimal (Santya̱ˈa̱gʉ 5:11). Ko Job ninäˈä tkamastutyë Dios, ta yajtukˈijxyë Satanas ko mbäädë naxwinyëdë jäˈäy xëmë tmëdunyë Dios oy ti amay jotmay tpäädët.

(Jap yajnimaytyaˈaky mä Job.)