Tniwäˈändë ja nax diˈib Kanan

KANÄK mëgoˈpx jëmëjt nyajxy mä Jyobaa tˈanmääyë Abrään ko ja tyëëm yˈääts tjaˈˈatäˈändë ja it naxwinyëdë diˈib Kanan. Ta jyajty ja tiempë parë ja israelitëty tjaˈabëjktë ja Nax diˈib Yajtukwinwäˈänëdë ets yëˈë Joswee diˈib nyigëbäjkˈäjt.

Dios ojts jyënaˈany ko ja jäˈäyëty diˈib tsënääytyëp Kanan nitëjkëbë naty kyutëgooytyaˈayët, pes axëëgë naty jyukyˈattë ets jantsy axëkjäˈäyëty. Pääty yaˈˈanmääytyë ja israelitëty ets dyajkutëgooytyaˈayët tukëˈëyë ja nax käjpn diˈib Kanan.

Kyajnëmë naty tyëkëdë Kanan, ko Joswee tkejxy majtskë käjpn niˈˈijxpë diˈib jäjttë Jerikoo mä Raapë tyëjk. Raap yuˈtsë tyäˈädë yetyëjkëty oyë naty tjanijawë ko israelitëty. ¿Tiko? Yëˈko Raap myëbejkypyë naty ja mëjˈäjtënë diˈibë Jyobaa tyuun ko dyaˈˈawäˈätspëtseemy ja kyäjpn. Pääty tˈanmääy ja käjpn niˈˈijxpëty parë yajtsoˈogëdët mët ja fyamilyë ko naty kyutëgoy ja Jerikoo gäjpn.

Ok, ko ja israelitëty tyëjkëdë mä ja nyaxë Kanan, ta dyajnadujktääytyë Jerikoo gäjpn. Ta Jyobaa dyajjijtääy ja käjpnë nyabots, ta tyëjkëdë mä ja käjpn ets dyajkutëgooytyaay tukëˈëyë, yëˈëyë tsoktë Raap mëdë fyamilyë. Ets tëdujk jëmëjt tsyiptuundë parë tjaˈabëjktääytyë ja Nax diˈib Yajtukwinwäˈänëdë. Taanëmë net ojts dyajwäˈxtë ja it lugäär diˈibë naty të tjaˈabëktë ninuˈun tyuktëëmˈat tyukˈäätsˈattë.

Joswee jekyë Jyobaa tmëduuny, ko naty yˈooganë ta dyajtuˈukmujky ja nax käjpn ets ttukjamyejtsy tijatyë Jyobaa ojts tyukmëdunëdë, ets tˈanmääy parë xëmë tmëdundëdë Dios. Per ko Joswee mët ja myëtnaymyaayëbëty ojts yˈoˈknëdë, ta ja israelitëty ojts tmastutnëdë Jyobaa ets ojts tˈawdäjnëdë wiink dios. Nuˈun nyajxy tëgëk mëgoˈpx jëmëjt, kanäkˈok ja israelitëty tmëdëgooytyë Jyobaa. Ko duˈun yˈadëtstë, ta Jyobaa nyaˈijxëdë ets ja myëtsip yˈaxëktunëdët, extëm ja Filistee jäˈäyëty. Per tëgok tëgokë Jyobaa tˈamdoodë nyaybyudëkë, ta yaˈˈawäˈätspëtsëëmëdë mët yëˈëgyëjxmë fesëty, nimäjmajtsk diˈib duˈun tuundë.

Tijaty ojts tyuny jyatyëty mä tadë tiempë, jap yajnimaytyaktsoony mä tadë liibrë diˈib xyëˈäjtypy Jueces, ko natyë Otniel tyuny fes, ets pën ok akˈyajnimaytyakp yëˈë Sanson ja fes diˈib mas kumëjää ijt. Tijaty yajmaytyakp mä Jueces yëˈë xytyukniˈˈijxëm ko pën nmëmëdoˈojëmë Jyobaa ta nëjx oy njukyˈäjtëm, per pën kyaj, ta nëjx ngumëdoˈojëm.

(Jap yajnimaytyaˈaky mä Josué, Jueces ets mä Levítico 18:24, 25.)