Dios yajkojë tsäjp etsë nax

Jyobaa Dios yëˈë ojts xyyajkojëm. Yëˈë tijaty yajkojtääy, duˈun diˈib nˈijxëm ets diˈib kyaj nˈijxëm. Mä nety tkayajkojynyëm diˈib yaˈijxp, ta ojts dyajkojy jantsy nimayë anklës. ¿Mnijäˈäwëp pënatyën yajtijtëp anklës? Yëˈë diˈibë Jyobaa myëduundëp tsäjpotm ets duˈun yˈixˈattë extëm yëˈë. Ëtsäjtëm kyaj mbäät nˈijxëmë Jyobaa ets nan kyaj mbäät nˈijxëmë anklësëty. Ja tim jawyiimbë anklës diˈibë Jyobaa yajkoj, yëˈë diˈib pudëjkë. Ojts mëdë Jyobaa dyajkojˈyë mëtsäˈä ets tukëˈëyë diˈib jaˈäjtp. Tuk pëky diˈib ojts dyajkojtë, yëˈë Naxwinyëdë diˈib jantsy oy këxëˈkp.

Ok, ta Jyobaa ojts dyaˈoyë naxwinyëdë parë mbäät jyukyˈattë jëyujk animal etsë jäˈäy. Ta tpëjtakyë xëëw parë mbäät ttuktëˈkx tukjäjjë naxwinyëdë. Nan ojts dyajkojˈyë tun kopk, mejny etsë mëjnëë.

¿Ets ti net ok akkoj? Jyobaa jyënany: “Minëts nˈokˈyajkojˈyë ääy ujts etsë ääy kepy”. Duˈun ja naxwinyëdë wyindujky mët kexy kaˈpxyë ääy ujts etsë ääytsyäˈäm ujtstsäˈäm ets kanäk naxë pëjy. Jyobaa nan ojts dyajkojy kexy kaˈpxyë jëyujk animal, duˈun diˈib kaagëdijttëp, diˈib nëjoty jukyˈäjttëp ets diˈib naybyawijts naybyaboˈtëp. Ojts dyajkojˈyë mutskatypyë extëmë konejë etsë mëjatypyë extëmë elefantë. ¿Diˈibë jëyujk animal mas mˈoyˈijxypy?

Ta netë Jyobaa tˈanmääy ja tim jawyiimbë anklës: “Nˈokˈyajkojëm tuˈugë yetyëjk”. Naxwinyëdë jäˈäy tëgatsy ojts kyojy mëdë jëyujk animal. Mbäädë nety tijaty dyajkojtë, kyäjpx myaytyäˈäktë, xyiˈik xyondë ets tmënuˈkxtäˈäktë Dios ets tkuentˈattëdë naxwinyëdë etsë jëyujk animal. ¿Pën ja tim jawyiimbë yetyëjk diˈib ojts kyojy? Min nˈokˈijxëm.