Tuˈugë jembyë wintsën ets nimajtskë toxytyëjk diˈib ijttë jotmëk

Josué kanäk jëmëjtë Diosë kyäjpn ojts twoowˈyoˈoy ets ja yˈoˈky ko netyë jyëmëjt 110. Nuˈunë Josué jyukyˈajty, ja israelitëty yëˈë yˈawdäjttë Jyobaa. Per ko ojts yˈoˈknë, ta ja israelitëty tˈawdäjttsondaktë ja awinax extëmë nety yˈadëˈëtstë ja jäˈäyëty diˈib Canaán. Kom ja israelitëty kyaj myëdoowdë, ta Jyobaa tnasˈijxë parë yˈaxëktunëdët ja rey Jabín diˈib Canaán. Ta net ja nax käjpn tˈamdooyë Jyobaa nyaybyudëkë. Ta Jyobaa myooyëdë tuˈugë jembyë wintsën diˈib xyëwˈäjt Barac. Yëˈë diˈibë nety pudëkëyanëdëp parë jatëgok tˈawdattëdë Jyobaa.

Tuˈugë kugajpxy diˈib xëwˈäjt Débora ojts tnigaxë Barac parë tˈanëëmëyaˈany extëm netyë Jyobaa të jyënaˈany: “Nëjkx mä yˈajoyë Cisón mët mäjk milë yetyëjk parë nëjkx mtsiptundë mëdë syoldäädëtëjkë Jabín. Japë Sísara xymyëmadäˈägäˈäny, diˈib nyiwintsënˈäjtypyë syoldäädëtëjk”. Barac ta tˈatsooyë Débora: “Nëjkxäämbëts, per net pën xypyanëjkxpëts”. Débora ta yˈatsooy: “Nbanëjkxaampy, per tsojkëp xynyijawët ko mijts, kyaj xyyaˈogäˈänyë Sísara. Jyobaa të jyënaˈany ko yëˈë yaˈooganëp tuˈugë toxytyëjk”.

Débora ta pyatëjkë mëdë Barac ets ja tsyiptuumbëty mä ja kopk diˈib xyëwˈäjtypy Tabor. Ko Sísara tnijäˈäwë, ta mä ajoyˈit dyajtuˈukmujky ja syoldäädëtëjk ets ja kyarrë diˈib mëët tsyiptundë. Débora ta tˈanmääyë Barac: “Tyam, yëˈë Jyobaa myajmadäˈäganëp”. Ta netë Barac mët mäjk milë yetyëjk jyënäjktë kopkëjxy parë tsyiptunäˈändë mët ja syoldäädëtëjkë Sísara.

Ok, ta Jyobaa dyaˈˈabëyëˈkwäˈkxtääy ja mëjnëë diˈib Cisón, ets ta ja Sísara kyarrëty diˈib mëët tsyiptundë myoˈontsjaˈanëtyaay. Ta Sísara ttukjënajky ja kyarrë ets kyeky. Duˈunë Barac mëdë syoldäädëtëjk tmëmadaktë ja Sísara syoldäädëtëjk, per komë Sísara kak, ta ojts nyayuˈutsyëty mä tuˈugë toxytyëjkë wyitëjk diˈib xëwˈäjt Jael. Jap myooyë waanë letsyë ets ta ojts nyipeˈenyëty. Komë Sísara të nety jyantsy anuˈkxë, ta myäädëgooy. Ta Jael oytyaˈagyëˈaampy tmëwingoony, ta tkäjpëˈky tuˈugë kepy jëjptsetsy mä tkuxotsyë wyitëjk ets tkuwojpë mä Sísara kyëbäjk, duˈun dyaˈoˈky.

Ok, ta Barac jyajty, yëˈë nety yˈëxtaabyë Sísara. Jael ta pëyeˈegyë pyëtsëëmy mä wyitëjk ets tˈanmääy: “Nax, yëˈë ndukˈixaampy ja yetyëjk diˈib mˈëxtaapy”. Ta Barac tyëjkë ets tˈijxy ko tap jyëbijpnë ja Sísara, të nety yˈoˈknë. Ta Barac mëdë Débora tkuyˈëëwdë Jyobaa parë tmëjkumääytyë mët ko të nety yajmadäˈägëdë mä ja myëtsip. Taanëm ja israelitëty jyukyˈäjttë agujk jotkujk nuˈun ojts tyuˈuyoˈoy 40 jëmëjt.