Jesus ajotkumonë kyëxëˈky mä ja äjkxmäjtspëty

Näämnëmë netyë Jesus nyaytyukˈixyëty ja yˈapostëlë ko Pedro ojts nyijkxy äjkxmäjtspë mä ja mejny diˈib Galilea. Ets yëˈë mëët ojts nyijkxyë Tomás, Santiago, Juan ets ja wiinkpë ëxpëjkpëty. Tuktsuˈum ojts tjaˈëxtäˈäytyë äjkx, per nituˈuk tkamäjtstë.

Xëënytyaknëbë nety ko tˈijxtë tuˈugë yetyëjk tyanë mejnybyëˈääy. Ets desde jam yajtëëwëdë: “¿Të xymyatstë oy nuˈunën?”. Ta yˈatsoowdë: “Kyaj”. Ja yetyëjk ta yˈanmääyëdë: “Kujëbipëdë ja mˈäjkxmäjtsn aˈoytsyoo”. Ko tkujëbijpëdë, ta ja yˈäjkxmäjtsn yˈujtspejty ets kyaj yˈokmääyëndë tjuuttët. Ta Juan tˈijxy ko ja yetyëjk yëˈëdëmë netyë Jesus, ta jyënany: “¡Yëˈë ja Wintsën!”. Pedro ta netyë kyupujtnäjxy ets ojts nyijkxy nëëbëˈam. Ta ja myëguˈuktëjk ojts pyanëjkxëdë barkoty.

Ko jyäjttë mejnybyëˈääy, ta tˈijxtë ko tamë jëën të myëjë. Ets tamë äjkx yajtsäˈäy ets yˈanyë tsäjpkaaky. Jesus ta tˈanmääy ets tmëmindët tuˈuk majtskë äjkx diˈib të tmatstë parë nanduˈun yajtsäˈäyët. Ta net tˈanmääytyë: “Min mˈajopyˈattë”.

Ko kyaaytyaaytyë, ta Jesus dyajtëëyë Pedro: “¿Xytsyojkpëts niˈigyë ets këdiinëmë tyäˈädë äjkx?”. Pedro ta yˈatsooy: “Duˈun Wintsën, mijts mnijäˈäwëp ko ntsojkypy”. Jesus ta yˈanmääyë: “Pes yajjëˈxëtsë nborreegë”. Ta jatëgokë Jesus yajtëëwë: “Pedro, ¿xytsyojkpëts?”. Pedro ta yˈatsooy: “Wintsën, mijts mnijäˈäwëp ko ntsojkypy”. Jesus ta yˈanmääyë: “Kuentˈatëtsë nborreegë”. Per mä myëdëgëkˈokpë duˈun yajtëëwë, ta Pedro jantsy mon tuk nyayjäˈäwë ets ta yˈatsooy: “Wintsën, mijts wäˈäts xynyijawë, nuˈunën ntsoky”. Jesus ta yˈanmääyë: “Yajjëˈxëtsë nborreegë”. Ta net tˈakˈanmääy: “Pamiinˈadëtskëts”.