¿Wiˈix mbäädë tääk teety yˈittë jotkujk mëdë yˈuˈunk yˈënäˈk?

Jyobaa tsyojkypy etsë tääk teety tkuentëˈattët yajxon ja yˈuˈunk yˈënäˈk mët ko yëˈë të ttukumaytyë. Pääty tmoˈoyë ëwij käjpxwijënë wiˈix mbäät dyajˈyaak dyajpattë. Myoopy nanduˈunë ëwij käjpxwijënë ja uˈunk ënäˈk parë yˈittët jotkujk tuk familyë.

1. ¿Ti käjpxwijënë myoobyë Jyobaa ja tääk teety?

Jyobaa tsyojkypy etsë tääk teety ttsoktët ja yˈuˈunk yˈënäˈk, dyajnaxtët mëdë tiempë, tkuentëˈattët këdiibë ti ayoˈon tpäättët ets tˈëwij tkäjpxwijtët extëmë Biiblyë jyënaˈany (Proverbios 1:8). Diosë yˈAyuk yˈanmaapy pënaty nyigëbäjkˈäjttëbë fyamilyë ets ja yˈuˈunk yˈënäˈk “dyajˈyaak dyajpatët mä Jyobaa […] yˈëwij kyäjpxwijën” (käjpxë Efesios 6:4, TNM). Jyobaa jantsy jotkujk nyayjyawëty ko ja tääk teety dyajˈyaak dyajpattë yˈuˈunk yˈënäˈk extëm yëˈë tnëˈëmoˈoy ttuˈumoˈoy ets kyaj ttukmënikaagëdë wiink jäˈäy mëdiˈibë kyaj pyäädëdë.

2. ¿Ti käjpxwijënë Jyobaa myoopy ja uˈunk ënäˈk?

Jyobaa duˈun tˈanëëmë ja uˈunk ënäˈk: “Mëmëdowdë ja mdääk mdeety” (käjpxë Kolosʉ 3:20). Pääty ko tmëmëdowdë tyääk tyeety ets twingutsëˈëgëdë, agujk jotkujk dyajnayjyawëdë ets nanduˈunë Jyobaa (Proverbios 23:22-25). Jesus ojts tpëjktaˈagyë oybyë ijxpajtën, pes ko myutskˈäjty myëmëdoow ja tyääk tyeety ets wyingutsëˈkë oyë nety pokyjyaˈay yajpäättë (Lukʉs 2:51, 52).

3. ¿Ti mbäät ttundë ja familyë parë tmëwingondëdë Jyobaa?

Pën jamë mˈuˈunk mˈënäˈk, seguurë ko mtsojkypy ets nanduˈun ttsoktëdë Jyobaa extëmë miitsëty xytsyoktë. Per ¿ti mbäät xytyundë? Ko xypyanëjkxtëdë yäˈädë käjpxwijën mëdiˈibë yajkypyë Biiblyë: “Tsojkëp janääm jatsojk xynyikäjpxëmbitët [ja Jyobaa yˈääw yˈayuk] mä mˈuˈunk mˈënäˈk ets xytyukmëtmaytyäˈägët ko mˈuˈuny mtsëënët mjënoty mdëgoty ets ko mduˈuyeˈeyët nëˈääy tuˈääy” (Deuteronomio 6:7). Tääk teety nyijäˈäwëdëp ko parë yˈuˈunk yˈënäˈk tjamyatstët tijaty tyukˈaneˈempy, tsojkëp tnikäjpxëmbittët kanäkˈok. Pääty mëdiˈibë yäˈädë tekstë myaytyäˈägaampy, yëˈë ko tsojkëp xyˈixët näˈäjaty mbäät xytyukmëtmaytyaˈagyë mˈuˈunk mˈënäˈk ja Jyobaa yˈayuk mä mëët mxëëwnaxtë. Oy ko nanduˈun xyajnibäädëdët sëmään sëmään parë mDiosˈawdattët tuk familyë. Ets pën mijts kyaj mˈuˈunk mˈënäˈk, mbudëkëyanëp nanduˈun mëjwiin kajaa ko xyˈëxpëkëdë Biiblyë sëmään sëmään.

AK NIJAWË NIˈIGYË

4. Ëwij käjpxwij tsuj yajxon ja mˈuˈunk mˈënäˈk

Mbäät mëjwiin kajaa tsyiptaˈaky xyˈëwij xykyäjpxwijët ja mˈuˈunk mˈënäˈk. Per ¿wiˈix mbäädë Biiblyë mbudëkëty? Käjpxtë Santiago 1:19, 20, TNM ets nimaytyäˈäktë mëdiˈibë yä yajtëëpy:

• Ko ja tääk teety tmëtmaytyäˈäktëdë yˈuˈunk yˈënäˈk, ¿wiˈix mbäät dyajnigëxëˈëktë ko tsyojktëp?

• ¿Tiko ninäˈä mbäädë uˈunkteety tkajëjwijtsëmbityë yˈuˈunk yˈënäˈk mä të jyotˈambëky?a

5. Ijxˈit kuentëˈat ja mˈuˈunk mˈënäˈk

Parë xykyuentëˈatët ja mˈuˈunk mˈënäˈk, jëjpˈam ets niduˈuk niduˈuk xytyukmëtmaytyäˈägët wiˈixë yetyëjk mëdë toxytyëjk yˈit tsyëënëdë. Oy mjatsoytyuny, kuanë ko xytyukmëtmaytyäˈägët. Ixtë BIDEO ets nimaytyäˈäktë mëdiˈibë yä yajtëëpy:

BIDEO: Kuentëˈat ja mˈuˈunk mˈënäˈk mä axëkˈäjtën (2:58)

• ¿Tiko tsyiptaˈaky ets näägë tääk teety ttukmëtmaytyäˈägëdë yˈuˈunk yˈënäˈk wiˈixë yetyëjk mëdë toxytyëjk yˈit tsyëënëdë?

• ¿Ti näägë tääk teety të pyudëkëdë parë yˈuˈunk yˈënäˈk të ttukmëtmaytyäˈäktë?

Tyamë Satanásë jyaˈay mas niˈigyë axëëk jyukyˈäjnëdë extëmë ojts yajnaskäjpxë mä Biiblyë. Käjpxtë 2 Timotee 3:1, 13 ets nimaytyäˈäktë mëdiˈibë yä yajtëëpy:

• Näägë yäˈädë axëkjäˈäyëty mëdiˈibë yajmaytyaktëp mä bersikulo 13, yˈaguanëˈäjttëbë ënäˈkuˈunk. Pääty, ¿tiko jyëjpˈamëty etsë tääk teety ttukmëtmaytyäˈäktëdë yˈuˈunk ënäˈk wiˈixë jäˈäy yˈit tsyëënëdë? ¿Ets wiˈix mbäät tˈijxˈit tkuentëˈattë parë kyaj yaˈˈaguanëˈattët?

¿Mnijäˈäwëp?

Diosë kyäjpn yajpëtsëëmbyë ëxpëjkpajn etsë bideo mëdiˈibë mbäädë tääk teety dyajtundë parë ttukmëtmaytyäˈäktët ja yˈuˈunk yˈënäˈk wiˈixë jäˈäy yˈit tsyëënëdë ets wiˈix mbäät nyaygyuentëˈatëdë ko pën myëttsëënëyäˈänëdët aguanë. Tyää myiny tëgëëk:

• Kuentˈattë ja mˈuˈunk mˈënäˈk (bideo)

• Aprendamos del Gran Maestro, kapitulo 10 etsë 32

• “Wiˈixë mˈuˈunk xytyukmëtmaytyäˈägët ko jäˈäy yˈity tsyëënë” (¡Despertad!, num. 5 2016)

6. Wingutsëˈëgë ja mdääk mdeety

BIDEO: Wiˈix xymyëtmaytyäˈägëdë mdääk mdeety (2:19)

• ¿Tiko jyëjpˈamëty etsë ënäˈktëjk tmëgäjpxtëdë tyääk tyeety mëdë mayˈäjt wintsëˈkën?

• ¿Wiˈix mbäädë ënäˈktëjk dyajnigëxëˈëktë ko wyingutsëˈkëdëp ja tyääk tyeety?

Käjpxtë Proverbios 1:8 ets nimaytyäˈäktë mëdiˈibë yä yajtëëpy:

• ¿Wiˈix mbäädë ënäˈktëjk twinˈix tˈatsowdë ja tyääk tyeety ko yˈanëˈëmxëdët ti mbäät ttundë?

7. Awdattë Jyobaa tuk familyë

Jyobaa tyestiigëty jyuˈttëbë tiempë sëmään sëmään parë Diosˈawdattë tuk familyë. ¿Wiˈix ttundë? Ixtë BIDEO ets nimaytyäˈäktë mëdiˈibë yä yajtëëpy:

BIDEO: Ko nDiosˈawdäjtëm tuk familyë: wiˈix tsyiptaˈaky ets wiˈix xypyudëjkëm (8:04)

• ¿Ti mbäät xypyudëjkëm parë sëmään sëmään nDiosˈawdäjtëm tuk familyë?

• ¿Ti mbäät ttundë tääk teety parë niˈamukë pyudëkëdët ets ttukxondäˈäktët mä Diosˈawdattë tuk familyë? (Ixë dibujë mä tsyondaˈaky).

• Ets mijts, ¿ti mbäät myajnëˈëˈaduky myajtuˈuˈadukyëty parë kyaj mDiosˈawdattët tuk familyë?

Tëëyëp, ojts yajtukˈanaˈamdë ja israelitëty ets xëmë tnimaytyäˈäktët mët ja yˈuˈunk yˈënäˈk ja Diosë yˈAyuk. Käjpxtë Deuteronomio 6:6, 7 ets nimaytyäˈäktë mëdiˈibë yä yajtëëpy:

• ¿Wiˈix mbäät xytyuny extëm jyënaˈanyë yäˈädë tekstë?

¿Tijaty mbäät xyˈëxpëktë ko mDiosˈawdattët tuk familyë?

• Ëxpëktë tijaty naxäämp reunyonk.

• Käjpxtë mä Biiblyë wiˈix jyukyˈajty tuˈugë Diosmëduumbë.

• Pën jamë mˈënäˈkuˈunk, yajjënak o juudë kopyë mëdiˈibë miimp mä jw.org mä jyënaˈany “Tijaty mbäät ttundë ënäˈkuˈunk”.

• Pën jamë mˈuˈunk mˈënäˈk mëdiˈibë yaˈkpëtsëëmp, mbäät xyˈëxpëktë mëdiˈibë miimp mä jw.org parë ënäˈktëjk.

• Aduunaxtë wiˈix jyukyˈajty tuˈugë Diosmëduumbë.

• Ixtë ets nimaytyäˈäktë tuˈugë bideo mëdiˈibë miimp mä jw.org.

TI TË NJÄJTËM

Jyobaa tsyojkypy etsë tääk teety ttsoktët ja yˈuˈunk yˈënäˈk, tˈëwij tkäjpxwijtët ets tˈijxˈit tkuentëˈattët; ets ja uˈunk ënäˈk twingutsëˈëgëdët ja tyääk tyeety ets tmëmëdowdët. Duˈun tˈawdattëdë Jyobaa tuk familyë.

Ajamyatsë

• ¿Wiˈix mbäädë tääk teety tˈëwij tkäjpxwijtë yˈuˈunk yˈënäˈk ets tˈijxˈit tkuentëˈattë?

• ¿Wiˈix mbäädë uˈunk ënäˈk twingutsëˈëgëdë ja tyääk tyeety?

• ¿Wiˈix ttukˈoyˈattë ja familyë ko tjuuttë tiempë sëmään sëmään parë Diosˈawdattë?

AK PAYEˈEY

¿Tijaty mbäät xytyukniˈˈixë mˈuˈunk mˈënäˈk mëdiˈibë nëjkx pyudëkëty ko nety yaˈkˈabajnëdë?

“Tëdujk pëky mëdiˈibë mbäät xytyukniˈˈixë ja mˈuˈunk mˈënäˈk” (¡Despertad!, num. 2 2019)

Nijawë tijaty käjpxwijënë yajmooytyëp pënaty kyuentëˈäjttëbë tyääk tyeety mëdiˈibë të myëjjäˈäyënë.

“¿Tsyojkypyë Dios ets nguentëˈäjtëmë tääk teety ko myëjjäˈäyënë?” (Myiny mä jw.org)

Nijawë ti pudëjkë tuˈugë yetyëjk parë tsuj yajxon dyajˈyeˈky ja yˈuˈunk yˈënäˈk.

Jyobaa yëˈëts xytyukniˈˈijxëdë wiˈixëts nyajˈyaaktëdë nˈuˈunk nˈënäˈk 5:58

Nijawë ti mbäät ttunyë uˈunkteety parë oy yˈitët mët ja yˈuˈunk yˈënäˈk.

“¿Ti mbäät ttunyë uˈunkteety parë kyaj tmëjagamgaˈagëdë yˈuˈunk?” (Myiny mä Diˈib Xytyukˈawäˈänëm)