Wiˈix mbäät nyaxy ja reunyonk Wiˈix njukyˈäjtëm ets nDiosmëduˈunëm

Tijaty myëmiimpy

1. Yä yajnigajpxy wiˈix mbäät nyaxy ja reunyonk mä Wiˈix njukyˈäjtëm ets nDiosmëduˈunëm, oy ko nanduˈun xyˈixtët wiˈix mbäät xyajnaxtë ja reunyonk extëm myiny mä Tijaty yaˈëxpëkäämp ets yajtukjayëyäämp. Niˈamukë mbäät yaˈˈanëëmëdë pënaty käjpxwäˈkxtëp parë dyajnaxtëdë yˈasignasyonk. Pënaty jëjwitsë yeˈeynyëdëp reunyonk ets pën kyupëjktëp tijatyë Biiblyë tukniˈˈijxëp mbäät nanduˈun dyajnaxtë. Pën ja pën dyajnaxäˈänyë yˈasignasyonk oyë nety kyatunyëm publikadoor, ja mëdiˈibë yˈijxypy pënaty mbäät dyajnaxtë asignasyonk yëˈë jawyiin yˈixaampy pën kyuytyuumbyë Biiblyë kyäjpxwijën. Mä jam dyajtëwdë oy ko jam nanduˈun yajpäädët ja mëdiˈibë yaˈëxpëjkëp (o niduˈuk ja tyääk tyeety pën Diosmëduundëp). Duˈun mbäät tijaty dyajtëwdë extëmxyëp nyaxäˈäny publikadoor (od-S kap. 8 parr. 8).

ÄÄW AYUK MËDIˈIBË MËËT TSYONDAˈAKY

2. Tuk minutë. Ko nety të yaˈëëwdäˈäy ja ëy ets të yajtunyë nuˈkxtakën, ta ja mëdiˈibë tuump presidente mä reunyonk tnimaytyäˈägët tijaty yaˈëxpëkäämp mëdiˈibë mbäät pyudëkëdë ja nmëguˈukˈäjtëm.

TIJATY YAJPATP MÄ BIIBLYË TSOBATP MËJWIIN KAJAA

3. Diskursë (10 minutë). Mä Tijaty yaˈëxpëkäämp ets yajtukjayëyäämp, myëmiimpy tuˈugë temë ets tuk pëky majtsk pëky mëdiˈibë yajnimaytyäˈägäämp mä ja diskursë. Yäˈädë diskursë yëˈë yajnaxëp ja mëdiˈibë tuump mëjjäˈäy o pyudëjkëbë mëjjäˈäy. Ko yajkäjpxtsondäˈägët tuˈugë jembyë liibrë mä Biiblyë, ta yajpëjktäˈägëdë bideo mëdiˈibë nyimaytyakypy ja liibrë. Ja mëdiˈibë yajnäjxypy, mbäät tnimaytyaˈaky wiˈix nyaymyënëjkxyëty ja bideo mët ja diskursë. Per tsojkëp tˈaknimaytyäˈägët mëdiˈibë miimp mä Tijaty yaˈëxpëkäämp ets yajtukjayëyäämp. Oy ko nanduˈun tnimaytyäˈägët ja dibujë parë mëët tˈakˈyajkäˈpxët ja dyiskursë ets yajxon ja tiempë dyajtunët. Mbäät jam ti tˈaknimaytyaˈaky, per yëˈë mëdiˈibë mëët tyuˈugyë ja temë

4. Nˈokˈëxtäˈäyëmë oorë platë mëdiˈibë ijtp yuˈutsy (10 minutë). Yëˈë yajnaxëp yëˈë yajnaxëp ja mëdiˈibë tuump mëjjäˈäy o pyudëjkëbë mëjjäˈäy. Ja nmëguˈukˈäjtëm tsojkëp dyajtëwët ja majtskpë yajtëˈëwën ets këˈëm mbäät tˈixy pën yajkäjpxp ja tekstë. Ja mbäät jeˈeyë nmëguˈukˈäjtëm kyomentarattë 30 segundë o waanë

5. Yajkajpxyë Biiblyë (4 minutë). Yëˈë yajnaxëp tuˈugë yeˈeytyëjk. Kyaj tnimaytyäˈägët mä dyajtsondaˈaky ets mä dyajkëxy. Ja mëdiˈibë nyikëjxmˈäjtypy mä nyaxyë reunyonk, yëˈë yˈixaampy ets pyudëkëyaampy parë tkäjpxtët oy, wäˈäts, peˈtypy, dyajpat dyajnaktëdë yoˈkn, tkäjpxtët ixtëm kyäjpx myaytyäˈäktë, wyëˈëmdët mä puntë, komë ets tjaygyukëdët mëdiˈibë kyäjpxtëp. Ko yeny myinët mëdiˈibë yajkäjpxäämp, ta ja mëdiˈibë nyikëjxmˈäjtypy Wiˈix njukyˈäjtëm ets nDiosmëduˈunëm tˈixët pën mbäät tmoˈoy ja asignasyonk.

NˈOKˈYAˈËXPËJKËM OYË JÄˈÄY

6. Mäjmokx minutë. Të yajtuknibëjtäägë parë niˈamukë njäjtëm wiˈix mas oy ngäjpxwäˈkxëm ets wiˈixë jäˈäy nyaˈëxpëjkëm. Mbäät nanduˈun dyajnaxtë pënaty tuundëp ansianë. Pënaty yajnäjxtëbë yˈasignasyonk oy ko tˈixtët ti leksion tyundë mä foyetë Wiˈix myaˈëxpëkët ets Ko ntsojkëmë jäˈäy ixtëm myiny mä Wiˈix njukyˈäjtëm ets nDiosmëduˈunëm. Näˈäty yëˈë yajnaxaampy tuˈugë ansianë o siervo ministerial mä dyajtëwäˈäny ets tnimaytyäˈägäˈäny (ixë parrafo 15 mä myiny wiˈix mbäät xynyimaytyaˈaky ets xyajtëy).

7. Wiˈixë jäˈäy nmëtmaytyaktsoˈonëm. Yëˈë yajnaxëp tuˈugë yeˈeytyëjk o tuˈugë toˈoxytyëjk. Jeˈeyë ko ak yeˈeytyëjk dyajnaxtët o ak toˈoxytyëjk, o mët tuˈugë jyëëky myëguˈuk. Mbäät pyoˈkxtë o tyanëdë. (Parë xynyijawët wiˈix xyajnaxäˈäny, ixë parrafo 12 etsë 13).

8. Wiˈixë jäˈäy nnijëmbijtëm. Yëˈë yajnaxëp tuˈugë yeˈeytyëjk o tuˈugë toˈoxytyëjk. Jeˈeyë ko ak yeˈeytyëjk o ak toˈoxytyëjk dyajnaxtët (km-S 5/97 paj. 2). Mbäät pyoˈkxtë o tyanëdë. Ja mëdiˈibë yajnäjxypy oy ko duˈun ttunët ixtëmxyëp jam tmëtmaytyaˈaky ja jäˈäy mëdiˈibë ojts tˈokmëtmaytyakpë. (Parë xynyijawët wiˈix xyajnaxäˈäny, ixë parrafo 12 etsë 13).

9. Wiˈixë jäˈäy nyajtëjkëm ëxpëjkpë. Yëˈë yajnaxëp tuˈugë yeˈeytyëjk o tuˈugë toˈoxytyëjk. Jeˈeyë ko ak yeˈeytyëjk o ak toˈoxytyëjk dyajnaxtët (km-S 5/97 paj. 2). Mbäät pyoˈkxtë o tyanëdë. Duˈun dyajnaxët ixtëm ko të mëët yˈëxpëjktsondaknë. Kyaj tnimaytyäˈägët mä dyajtsondaˈaky ets mä dyajkëxy, per mbäät duˈun ttuny pën duˈun ja leksion jyënaˈany mä tyuny. Kyaj tyim jëjpˈamëty tkäjpxtët ja mëdiˈibë jam yˈëxpëjktëp, per kyaj wiˈixëty ko duˈun ttundët.

10. . Nimaytyäˈäk tijaty mmëbëjkypy. Yëˈë tuˈugë diskursë ets yëˈë yajnaxëp tuˈugë yeˈeytyëjk. Pën jeˈeyë yaˈˈaduunaxäˈäny mbäät yëˈë dyajnaxy tuˈugë yeˈeytyëjk o tuˈugë toˈoxytyëjk o mbäät dyajnaxy mët tuˈugë jyëëky myëguˈuk. Ja nmëguˈukˈäjtëm tsojkëp tnimaytyäˈägët wingëjxy wiˈix yaˈˈatsoowëmbity ja diskursë. Mbäät tnigajpxy ti ëxpëjkpajn duˈun nyimaytyakypy.

11. Diskursë. Yäˈädë diskursë yëˈë yajnaxëp tuˈugë yeˈeytyëjk. Pën jap ja diskursë yajjuuty mä jyënaˈany mëdiˈibë mëët kyaˈpxy 1 mëdiˈibë miimp mä foyetë Ko ntsojkëmë jäˈäy, mbäät tnimaytyaˈaky wiˈixë Biiblyë myiny. Ixtëm nˈokpëjktakëm mbäät tnimaytyaˈaky tiijën yˈandijpy bersikulo, o näˈä mbäät nyajtuˈunëm parë jäˈäy nyajwinmäˈäyëm. Pën jap ja diskursë yajjuuty mä foyetë Ko ntsojkëmë jäˈäy, oy ko yajnimaytyäˈägët wiˈix mbäät nyajtuˈunëm mä ngäjpxwäˈkxëm. Pën mˈijxypy ko mbäät ja nmëguˈukˈäjtëm pyudëkëdë ja ijxpajtën mëdiˈibë miimp mä numero 1 ets ja tekstë, oy ko xynyimaytyäˈägët.

12. Tijaty myëmiimpy. Yäˈädë parrafo ets ja tuˈukpë yëˈë yˈandijpy tijaty naxäämp mä “Wiˈixë jäˈäy nmëtmaytyaktsoˈonëm” ets “Wiˈixë jäˈäy nnijëmbijtëm”. Ja mëdiˈibë yajnaxaampy yëˈë mbäät dyaˈity wyinmäˈänyoty ko yëˈë jäˈäy tyukmëtmaytyäˈägaambyë Biiblyë ets wiˈix mbäät jatëgok mëët myaytyaˈaky. Yëˈë mbäät tnimaytyaˈaky mëdiˈibë jäˈäy yˈoymyëdowëp ets mëdiˈibë mbäät pyudëkëty. Këˈëm mbäät tˈixy pën yˈawanëyaampy tuˈugë ëxpëjkpajn o tyukmëtmaytyäˈägaampy tuˈugë bideo mëdiˈibë miimp mä Tuumbajn parë jäˈäy nyaˈëxpëjkëm. Kyaj mbäät agëbajky tjaty mëdiˈibë jam yajnaxaampy, duˈun mbäät dyajnaxy ixtëm kyajpxy myaytyaˈaky, tsojkëp nanduˈun ttukˈixëdë jäˈäy ko myëjotmaybyatypy.

13. Wiˈixëm mbäät ja jäˈäy nmëtmaytyakëm. Ja nmëguˈukˈäjtëm wiˈixëm mbäät ja jäˈäy tmëtmaytyäˈäktë. Ixtëm nˈokpëjktakëm:

(1) Mä jyëën tyëjk. Yëˈë yˈandijpy ko jäˈäy ninëjkxëm mä jyëën tyëjk ets ndukmëtmaytyakëm ja Diosë yˈayuk (nmëtmaytyakëm mä telefënë o nduknigajxëmë kartë).
(2) Ko jäˈäy nmëtmaytyakëm oytyim määjëty. Yëˈë yˈandijpy ko jäˈäy ndukmëtmaytyakëm ja Diosë yˈayuk mientrës mëët ngäjpx nmaytyakëm ets ndukwingugäjpxëm tuˈugë tekstë ixtëm mä nduˈunëm, mä eskuelë, ja mëjënbäˈä mëdëjkpäˈä o karroty.
(3) Ko ngäjpxwäˈkxëm mä mayjyaˈay yajpääty. Yëˈë yˈandijpy ko ngäjpxwäˈkxëm mä yajnadanë karruˈunk, mä jyuuy tyooktë, nëˈääy tuˈääy, mä parke, mä karrë tsyoony jyaˈty o mä mayjyaˈay yajpäättë.

14. Näˈä mbäät tyunyë bideo etsë ëxpëjkpajn. Ja mëdiˈibë yajnäjxypyë yˈasignasyonk këˈëm mbäät tˈixy pën tyukˈixaampy tuˈugë bideo o myoˈoyaampy tuˈugë ëxpëjkpajn. Pën mä Wiˈix njukyˈäjtëm ets nDiosmëduˈunëm myëmiimpy tuˈugë bideo o ja nmëguˈukˈäjtëm yajtunaampy, kyaj mbäät ttukˈixy per mbäät ttukmëtmaytyaˈaky.

WIˈIX JYUKYˈATYË DIOSMËDUUMBË

15. Yëˈë mëët tsyondaˈaky tuˈugë ëy ets jaˈa nyaxäˈäny 15 minutë. Näˈäty myinäˈäny tuˈuk o majtskë asignasyonk ets yëˈë yajnimaytyäˈägäämp mëdiˈibë mbäät pyudëkëdë nmëguˈukˈäjtëm parë tkuytyundëdë Diosë yˈAyuk. Pën kyaj yajnigajpxy pën yajnaxëp, ta yëˈë dyajnaxët tuˈugë ansianë o siervo ministerial. Per mä ti naybyudëkë tsojkëp mä nduˈukmujkëm, yëˈë mbäät dyajnaxy tuˈugë ansianë. Ko myinët tuˈugë artikulo mëdiˈibë yaˈˈatsoowëmbitäämp mbäät ja nmëguˈukˈäjtëm ttuny ja yajtëˈëwën mëdiˈibë jam miimp o mbäät jam këˈëm ti tˈakˈyajtëy. Ko dyajtsondäˈägët ja dyiskursë waanë mbäät tnimaytyaˈaky net mbäädë tiempë tmëdaty parë tnimaytyäˈägët tijaty miimp ets duˈun ja nmëguˈukˈäjtëm kyomentarattët. Ets pën jënäämp ets tuˈugë nmëguˈukˈäjtëm yaˈentrebistaratët, jam nyaxët mä plataformë, pën mbäät.

16. Yaˈëxpëkyë Biiblyë mä nduˈukmujkëm (30 minutë). Yëˈë yajnaxëp tuˈugë mëjjäˈäy (per pën niwaanë ja nmëguˈukˈäjtëm mëdiˈibë duˈun tuundëp, ta yëˈë dyajnaxëdë ja mëdiˈibë pyudëjkëbë mëjjäˈäy). Ja mëjjäˈäytyëjkëty yëˈë yˈixandëp pën mbäät dyajnaxy. Pënaty të yajwinˈixtë kyaj mbäät dyajniˈigyëdë ja tiempë, yëˈëyë mbäät tnimaytyäˈäktët ja tekstë mëdiˈibë jëjpˈam, duˈun mbäät ja nmëguˈukˈäjtëm tjamyatstë ets nyaytyukpudëkëdë. Parë duˈun ttundët oy ko tkäjpxtëdë rebistë Diˈib Xytyukˈawäˈänëm (w23.04 paj. 24, rekuäädrë). Pën të yajxon yajnimaytyaktäˈäy, mbäät kyexy mä kyakaˈpxynyëm 30 minutë. Pën jam niganäägë nmëguˈukˈäjtëm, mbäät sëmään sëmään nyayajtëgatsëdë ets nanduˈun ja mëdiˈibë kyajpxypy. Ko ja nmëguˈukˈäjtëm yˈanëˈëmxëdët mëdiˈibë nyikëjxmˈäjtypy ja reunyonk parë tsojk dyajkëxët, këˈëm mbäät tˈixy ja tiempë. Ixtëm nˈokpëjktakëm mbäät kyaj yajkäjpxtäˈäy ja parrafo.

ÄÄW AYUK MËDIˈIBË MËËT JYËJPKËXY

17. Tëgëëk minutë. Mëdiˈibë nyikëjxmˈäjtypy dyajnaxëdë reunyonk, yëˈë nyimaytyäˈägaampy tijaty të yaˈëxpëky ets tijaty naxäämp mä ja tuˈukpë sëmään. Pën jamnëmë tiempë mbäät dyajtëy wiˈix të pyudëkëdë tijaty të nyaxy. Mbäät nanduˈun tnigajpxy pënaty yajnaxandëbë demostrasyonk ja tuk sëmään. Ja mëdiˈibë nyikëjxmˈäjtypy dyajnaxëdë reunyonk mbäät nanduˈun dyajnaxy tuˈugë anunsyë o tkajpxyë neky mä kyajëjpkëxynyëm. Per kyaj yajnigäjpxët mä ja plataformë, ixtëm ti oorë nbëtsëmäˈänëm käjpxwäˈkxpë o pënaty patëdëp pyaadëˈëktët, jam yajpëjktäˈägäˈäny mä tableerë. Ets pën kyaj tiempë parë nyaxët tuˈugë anunsyë mëdiˈibë jëjpˈam o yajkäjpxët tuˈugë neky, ta yaˈˈanëmëdët pënaty yajnaxandëp “Wiˈix jyukyˈatyë Diosmëduumbë” parë tsojk dyajkëxtët ja reunyonk (ixë parrafo 16 etsë 19). Ja reunyonk yëˈë mëët kyëxäˈänyë ëy etsë nuˈkxtakën.

KÄJPXWIJËN ETSË ÄÄW AYUK MËDIˈIBË MËJÄÄWMOOPY

18. Ko kyëxët tuˈuk tuˈugë demostrasyonk, ta ja mëdiˈibë nyikëjxmˈäjtypy ja reunyonk tˈanëëmët ja nmëguˈukˈäjtëmëty naa tuk minutën ko jantsy oy të ttuny ets tmoˈoyëdë käjpxwijën ixtëm myiny mä foyetë Wiˈix myaˈëxpëkët. Ko ja mëdiˈibë nyikëjxmˈäjtypyë reunyonk tnigäjpxët pën yajnaxaampy, kyaj mbäät tnigajpxy ti leksion tyuny ja nmëguˈukˈäjtëm. Ko nety të dyajnäjxtäˈäy, ta tˈanëëmët ko oy të dyajnaxy ets mbäädë net tnigajpxy ti leksion të tyuny, mbäät nanduˈun tsuj yajxon tˈanëëmë wiˈix mbäät mas oy dyajnaxy. Mbäät nanduˈun tnigajpxy tijaty mbäät pyudëkëty ja nmëguˈukˈäjtëm mëdiˈibë të dyajnaxy o pënaty jam myëdoowˈijttëp. Ko reunyonk kyëxët, mbäät yajmoˈoyë käjpxwijën ja nmëguˈukˈäjtëm ixtëm myiny mä foyetë Ko ntsojkëmë jäˈäy, Wiˈix myaˈëxpëkët, o mä liibrë Benefíciese mä nety tyuny (mä parrafo 19, 24 etsë 25 jap tnimaytyaˈaky ti tyuumpy ja mëdiˈibë nyikëjxmˈäjtypyë reunyonk Wiˈix njukyˈäjtëm ets nDiosmëduˈunëm ets ja myëmajtskpë käjpxwijpë).

TIEMPË

19. Nipën mbäät tkayaˈˈanaxyë tiempë, (ni yëˈë mëdiˈibë tuump presidente mä reunyonk). Mä Wiˈix njukyˈäjtëm ets nDiosmëduˈunëm nyigajpxypy nuˈun mbäät jyeky tuˈugë asignasyonk, per pën të ja nmëguˈukˈäjtëm yajxon tnimaytyaktäˈäy kyaj tiko ttimytyukpäädët ja tiempë. Ko jam pën dyajniˈigyëdë tiempë, ta ja mëdiˈibë tuump presidente mä reunyonk o ja myëmajtskpë käjpxwijpë pyudëkëyaˈanyë anaytyuˈuk (ixë parrafo 24 ets 25). Ja mbäät jyeky ja reunyonk tuk oorë ets ja 45 minutë mëdë ëy etsë nuˈkxtakën.

KO XYKYUˈIJXËMË SIRKUITË

20. Ko xykyuˈijxëmë sirkuitë, duˈun nyaxäˈäny ja ëxpëjkën ixtëm yajnigajpxy mä Tijaty yaˈëxpëkäämp ets yajtukjayëyäämp, jeˈeyë ko wanaty tyëgatsäˈäny. Yëˈë yajwinguwitsäämp mä “Yaˈëxpëkyë Biiblyë mä nduˈukmujkëm” mëdiˈibë näjxp 30 minutë, mët ja diskursë mëdiˈibë yajnaxaambyë sirkuitë. Mä ja sirkuitë tkayajtsondaˈakynyëm ja dyiskursë, ta ja mëdiˈibë nyikëjxmˈäjtypyë reunyonk tnimaytyäˈägët wanaty tijaty të yaˈëxpëky ets tijaty yaˈëxpëkäämp ja tuk sëmään ets dyajnaxëdë anunsyë, taanëmë net nyaxët ja sirkuitë. Ko ja sirkuitë dyajkëxëdë dyiskursë, ta dyajjëjpkëxët mët ja ëy mëdiˈibë nety të twinˈixy. Mbäät tˈanëëmë tuˈugë nmëguˈukˈäjtëm ets ttunët ja nuˈkxtakën. Mä ja sirkuitë xykyuˈijxëm kyaj nyaxäˈänyë demostrasyonk mä sala b. Ja grupë mëdiˈibë wiink ayuk käjpxp mbäät tmëdattë ryeunyonk mä ja sirkuitë tkuˈixë ja tuˈukmujkën. Per tuˈugyë tmëdoowˈitäˈändë ja diskursë mëdiˈibë ja sirkuitë yajnäjxypy.

KO TPÄÄDËDË ASAMBLEE

21. Ja sëmään mä nmëdäjtëmë asamblee kyaj yajtunäˈänyë reunyonk. Pääty, oy ko ja nmëguˈukˈäjtëm yajtukjamyatstët parë tˈëxpëktët naytyuˈuk o mëdë fyamilyë mëdiˈibë nety naxäämp.

KO NETY YAJJAMYETSYË JESUSË YˈOˈKËN XËËW

22. Pën ja yajjamyatsäˈänyë Jesúsë yˈoˈkën xëëw sëmäängujky, ta kyaj tyunëdët ja reunyonk Wiˈix njukyˈäjtëm ets nDiosmëduˈunëm.

JA MËDIˈIBË YAJKYPYË ASIGNASYONK MÄ WIˈIX NJUKYˈÄJTËM ETS NDIOSMËDUˈUNËM

23. Pënaty tuundëp mëjjäˈäy, yëˈë wyinˈijxtëp tuˈugë nmëguˈukˈäjtëm mëdiˈibë nanduˈun tuump mëjjäˈäy parë duˈun tyunët. Yëˈë patëp tˈixët etsë reunyonk tyuˈuyeˈeyët ixtëm të yajtukniwitsë ets ixtëm yä yajnigajpxy. Tsojkëp nyayˈëw nyaygyäjpxëdët mët ja myëmajtskpë käjpxwijpë. Jantsy jeˈeyë pyëtsëmët Tijaty yaˈëxpëkäämp ets yajtukjayëyäämp, ta ttukniwitsët ets tmoˈoytyët ja yˈasignasyonk pënaty yajnaxandëp mä tyuˈuyeˈeyaˈany majtsk poˈo, ixtëmë demostrasyonk, diskursë ets pënaty nyikëjxmˈättëp ja reunyonk. Yëˈë mbäät dyajnaxtë ja diskursë ets pënaty nyikëjxmˈäjttëp ja reunyonk, pënaty ja mëjjäˈäytyëjkëty të twinˈixtë. (Ixë parrafo 3-16 etsë 24). Ko nety ja nmëguˈukˈäjtëm tˈixy pën yajnaxëbë yˈasignasyonk yëˈë yˈixëp nuˈun ja xyëëw jyëmëjt, nuˈun tijaty tjaty tnijawë ets pën mbäät dyajnaxy. Oy ko ja nmëguˈukˈäjtëm tmoˈoyët ja yˈasignasyonk mä nety tyëgoyˈaty naa tëgëëk sëmäänën. Ko nety yaˈˈasignaraty pënaty yajnaxandëbë demostrasyonk, yëˈë tunäämp ja neky mëdiˈibë xyëwˈäjtypy Ti mbatëp xyajnaxët mä Wiˈix njukyˈäjtëm ets nDiosmëduˈunëm (S-89). Yëˈë nanduˈun nyikëjxmˈäjtypy parë tˈixët ets yajpëjktäˈägët ja programë mä tableerë. Ja mëjjäˈäytyëjkëty mbäät yëˈë tuknipëktë tuˈugë siervo ministerial parë pyudëkëdët. Per yëˈëyë mëjjäˈäytyëjkëty mëdiˈibë mbäät tˈixtë pën yajnaxtëp ja diskursë.

JA MËDIˈIBË TUUMP PRESIDENTE MÄ REUNYONK WIˈIX NJUKYˈÄJTËM ETS NDIOSMËDUˈUNËM

24. Mëdiˈibë tuump ansianë yëˈë tunëp presidente mä reunyonk Wiˈix njukyˈäjtëm ets nDiosmëduˈunëm (pën niwaanë mëjjäˈäytyëjkëty, mbäät nanduˈun tyuny tuˈugë siervo ministerial). Yëˈë nyikëjxmˈataampy parë tˈixët wiˈix dyajtsondäˈägäˈäny ets wiˈix dyajkëxäˈäny. Yëˈë nyigäjpxaampy pënaty naxandëp mä plataformë. Pën kyaj nëgoo mëjjäˈäytyëjkëty, mbäät yëˈë tuk pëky majtsk pëky dyajnaxy ixtëm ko nyaxëdë bideo mëdiˈibë kyaj yajnimaytyaˈaky. Ets ko tnigäjpxët pënaty naxäämp, kyaj nëgoo jeky myaytyäˈägët. Ninuˈun tyundë mëjjäˈäy, yëˈë yˈixandëp pën mbäät tnikëjxmˈaty parë dyajnaxëdë reunyonk ets nnaytyukniwitsëyanëdëp parë dyajnaxtët. Ja mëdiˈibë yajkypyë asignasyonk mä Wiˈix njukyˈäjtëm ets nDiosmëduˈunëm, mbäät yëˈë janäämëty yajwinˈixy parë dyajnaxëdë reunyonk. Pën tuˈugë ansianë mbäät dyajnaxy mä “Yaˈëxpëkyë Biiblyë mä nduˈukmujkëm”, mbäät nanduˈun tnikëjxmˈatyë reunyonk. Ja mëdiˈibë tuump presidente mä reunyonk, oy ko tˈanëëmët pënaty yajnäjxtëbë demostrasyonk etsë diskursë ko jantsy oy të ttundë ets tkäjpxwijët tsuj yajxon ixtëm mbäät pyudëkëdë. Yëˈë nanduˈun yˈixaampy parë tsojk kyëxët ja reunyonk (ixë parrafo 17 etsë 19). Pën jamë lugäär mä plataformë, mbäät yajpëjktaˈaky tuˈugë mikrofënë ets jamyë wyëˈëmët ja mëdiˈibë nyikëjxmˈäjtypyë reunyonk pën tsyojkënyëˈajtypy, myentrës pyat jyënaktë pënaty patëdëp ja diskursë o demostrasyonk. Mbäät nanduˈun yajpëjktaˈaky tuˈugë mesë mëdë siyë ets jamyë yˈuˈunyët ko yajkäjpxëdë Biiblyë ets ko nyaxëdë “Nˈokˈyaˈëxpëjkëmë oyë jäˈäy”.

MYËMAJTSKPË KÄJPXWIJPË

25. Yëˈë nyikëjxmˈäjtypy ets tkäjpxwijët anaytyuˈuk ja mëjjäˈäytyëjkëty etsë siervo ministerial mëdiˈibë yajnäjxtëp Wiˈix jyukyˈatyë Diosmëduumbë, diskursë, rebistë Diˈib Xytyukˈawäˈänëm, “Yaˈëxpëkyë Biiblyë mä nduˈukmujkëm” ets pënaty kyäjpxtëbë parrafo. (Ix mä parrafo 19).

SALA B O C

26. Pën mä ja tuˈukmujkën nimayë nmëguˈukˈäjtëm mëdiˈibë yajnäjxtëp mä Yajkajpxyë Biiblyë etsë demostrasyonk, ta jyaˈˈatët kanäägë sala. Mä tuˈuk tuˈugë sala, oy ko yëˈë tnikëjxmˈatët tuˈugë ansianë o siervo ministerial. Ja mëjjäˈäytyëjkëty yëˈë mbäät tˈixtë pën nyikëjxmˈatëp ja sala b ets pën mbäät ja wiinkpë nmëguˈukˈäjtëm tyukäˈäjëdë. Ja mëdiˈibë nyikëjxmˈäjtypy duˈun mbäät dyajnaxy extëm të yajnigajpxy mä parrafo 18. Ko kyëxëdë “Nˈokˈëxtäˈäyëmë oorë platë mëdiˈibë ijtp yuˈutsy”, ta ja nmëguˈukˈäjtëm yaˈˈanëëmëyäˈändë parë nyaxtët mä sala b pënatyë nety jap tukäˈäjëdëp. Ets ko dyajnajxtäˈädët ja demostrasyonk mbäät jatëgok jyëmbittë mä sala prinsipal.

BIDEO

27. Mä ja reunyonk yaˈixäämp näägë bideo mëdiˈibë miimp mä JW Library® ets mbäät yajdeskargaraty mä telefënë o mä tabletë.

S-38-MX 9/25