¿Mbëjtakypy aduˈugë mˈijxënë mä Diosë tyuunk?

1. ¿Wiˈix nyikejy ko nmëdäjtëm “oy” ja wiin?

¹ Tijaty nˈijxëm yëˈë diˈib nduˈunëm. Päätyë Jesus jyënany: “Pën oy ja mwiin, mduˈuyoˈoyëp yajxon kudeˈxy” (Mat. 6:22). Ko nmëdäjtëm “oy” ja wiin, yëˈë yˈandijpy ko aduˈuk nduˈunëm tijatyë Dios tsyejpy o ko nbëjtakëm jëjpˈamë Diosë tyuunk ets kyaj xyajtuˈudujkëm ko nmëdatäˈänëm mëjwiin kajaa tijaty o ndunäˈänëm diˈib kyaj tyimjëjpˈamëty.

2. ¿Ti mbäät xyajtuˈuwëˈëmëm parë kyaj aduˈugë Diosë tyuunk nduˈunëm, ets ti mbäät xypyudëjkëm?

² ¿Nbëjtakëm jëjpˈamë Diosë tyuunk? Mbäät kyaj aduˈuk nduˈunëmë Diosë tyuunk ko nmëdatäˈänëm tijatyë wiink jäˈäy myëdäjtypy o tijaty yaˈˈawäˈänëm parë nmëdäjtëm. Ko ti ndunäˈänëm o njuyäˈänëm oy ko jawyiin njuˈtëmë kuentë nuˈun tmënëjxäˈänyë meeny sentääbë, xëë tiempë o jot mëjää. Mbäät nayajtëˈëjëm, ¿xypyudëkëbëtsë tyäˈädë parëts niˈigyë nmëdunëdë Jyobaa o waˈantsëdaa niˈigyë xyajtuˈudukët? (Luk. 14:28; Fili. 1:9-11). Oy ko näˈä ganäˈäty nwinmäˈäyëm pën mbäät mas adëyë jukyˈäjtënë nyajnëjxëm parë niˈigyë nduˈunëmë Diosë tyuunk (2 Kor. 13:5; Éfe. 5:10).

3. ¿Ti xytyukniˈˈijxëm ko tuˈugë nmëguˈukˈäjtëm ojts dyajtëgatsy ja tyuunk parë mas adëyë jyukyˈäjtënë ojts dyajnejxy?

³ Tuˈugë nmëguˈukˈäjtëm ojts myëduunˈadëˈëtsy xëëˈam ko tyëjkë tuumbë prekusoora regulaar, oyxyëp tjamëdäjtyë myeeny syentääbë koxyëp jeˈeyë tyuuny tukijkxyëë. Per ok, ta dyajtëgäjtsyë tyuunk ets mas adëyë ja jyukyˈäjtënë ojts dyajnejxy extëm mbäät tyuunˈadëˈëtsy prekusoor. Ok, ta jyënany: “Kyaj mbäät nmëdäjtëm majtskë wintsën. Jeˈeyëtsë net ja nmeeny nsentääbë nyajtuuny mä tijatyëts xytyëgoyˈäjtp, ets kyaj mä tijatyëts jeˈeyë ntsokënyëˈajtypy. Ojtsë nbekyë kuentë ko näjxp ja tsojkën mä tijaty yajmëdäjtp, ets ko jeˈeyëts naty xyaˈˈanuˈxë kots niˈigyë nbaˈoˈktëy”.

4. ¿Tiko jyëjpˈamëty ets mä tyäˈädë tiempë nduˈunëmë aduˈugë Diosë tyuunk?

⁴ Waanë jeˈeyë tiempë yˈakweˈemy, pääty jyëjpˈamëty ets aduˈuk nduˈunëmë Diosë tyuunk. Tuˈuk tuˈugë xëë nyaxy wyingoonˈadëˈëtsy ja tiempë mä jyëjpkëxäˈänyë tyäˈädë jukyˈäjtën ets tsyondäˈägäˈäny ja jembyë (1 Kor. 7:29, 31). Pääty, pën nbëjtakëm jëjpˈamë tyäˈädë tuunk mä ngäjxwäˈxëm, ta nëjx nnitsokëm ets nanduˈun pënaty myëdooˈijtypy (1 Tim. 4:16).