“Këdii mtsëˈëgë”
1. Extëmë Jeremiiës, ¿ti nanduˈun tyam xytsyiptakxëm?
1 Ko Jeremiiës yaˈˈanmääy ets tyunët kugajpxy, ta jyënaˈany ko kyaj tmëmadäˈägäˈäny. Perë Jyobaa ta yˈanmääyë: “Këdii mtsëˈëgë” ets ta jyotmëkmooyë parë ttunët ti naty të ttuknipeky (Jer. 1:6-10). Nanduˈun ëtsäjtëm, waˈan xytsyiptakxëm nduˈunëmë Diosë tyuunk mët ko nwintsoytyuˈunˈäjtëm o ko kyaj nayjäˈäjëm seguurë parë jäˈäy nmëtmaytyakëm. Mbäät xyaˈëxtëkëwäˈkëm ko ntsëˈkëm wiˈix ja jäˈäy nëjx yˈatsoy o wiˈix xyˈijxëm. ¿Ti xypyudëjkëm parë kyaj ntsëˈkëm? ¿Ets wiˈix nëjx ndukˈoyˈäjtëm?
2. Ko kontiempë nˈëxpëjkëm, ¿wiˈix xypyudëjkëm parë kyaj ntsëˈkëm?
2 Nˈokniˈëxpëjkëm kontiempë. Diˈib xypyudëjkëm parë kyaj ntsëˈkëm yëˈë ko niˈëxpëjkëm kontiempë ti nimaytyäˈägäˈänëm. Extëm nˈokpëjtakëm, pën nwinmäˈäyëm wiˈixë jäˈäy xëmë tjëjpkugäjxë ko njamëtmaytyäˈägäˈänëm, mbäädë net nijäˈäjëm wiˈix nˈatsoˈojëmbijtëm (Pro. 15:28). Pääty, mä mDiosˈawdattë mëdë mFamilyë oyxyëp ko xytyuundäˈäktë wiˈix mbäädë jäˈäy xyˈatsoojëmbittë extëm të tjëjpkugäjxëdë Diosë yˈayuk mä eskuelë o mä mgäjxwäˈxtë (1 Peed. 3:15).
3. ¿Tiko jyëjpˈamëty ets nmëbëjkëmë Jyobaa parë kyaj ntsëˈkëm?
3 Ko nmëbëjkëmë Jyobaa. Ko nmëbëjkëm ko Jyobaa xypyudëkëyäˈänëm, yëˈë diˈib yajkekypyë tsëˈëgë. Nitii duˈun seguurë xykyayajnayjäˈäjëm extëmë tyäˈädë (Isa. 41:10-13). Jesus nan xyˈanmäˈäyëm ko Diosë myëjää seguurë xypyudëkëyäˈänëm parë nmëtmaytyakëmë jäˈäy mä kyaj ndimˈawijx dimjëjpˈijxëm (Mar. 13:11). Pääty oy ko xëmë Jyobaa nˈamdoˈojëm myëjää (Luk. 11:13).
4. ¿Wiˈix ndukˈoyˈäjtëm ko duˈunyëm nˈëwäˈx ngäjxwäˈxëm oy xytsyiptakxëm?
4 ¿Wiˈix ndukˈoyˈäjtëm? Ko duˈunyëm nˈëwäˈx ngäjxwäˈxëm oy xytsyiptakxëm, ta niˈigyë njotmëktakëm ets kyaj ti njëjptsëˈkëm, duˈun jyaˈayˈattë pënaty myëdäjttëbë Diosë myëjää (Apos. 4:31). Nan yëˈë nejx xypyudëjkëm parë nmëmadakëmë jotmayë mëjwiin kajaabë. Nëjxëp nanduˈun nmëmadakëm ja tsëˈëgë mëdë Jyobaa nyaybyudëkë ets nëjxëp nmëdäjtëm mëk ja nmëbëjkën ko Jyobaa yëˈë xypyudëkëyäˈänëm (Isa. 33:2). Nan jotkujk njantsy nayjäˈäjëm ko yëˈë Jyobaa nyajxondakëm (1 Peed. 4:13, 14). Pääty nˈokkäjxwäˈxëm amëk jotmëkë Diosë yˈAnaˈam Kyutujkën, kyaj ntsëˈkëm ets nˈokˈijtëm seguurë ko Jyobaa xëmë xypyudëkëyäˈänëm.