Tuˈugë jembyë artikulo parë nyaˈëxpëjktsondakëmë jäˈäy
1. ¿Diˈibë jembyë artikulo minäämp mä La Atalaya diˈib yajmoobyë jäˈäy, ets parë ti të yajtuknibëjktäägë?
1 Eneerë poˈo ja ogäˈän pyëtsëmäˈäny mä La Atalaya diˈib yajmoobyë jäˈäy, tuˈugë jembyë artikulo parë nyaˈëxpëjktsondakëmë jäˈäy. Txëˈaty: “Enseñanzas de la Palabra de Dios”. Seguurë nˈijtëm ko jyantsy kyäjpxandëbë jäˈäy koogoo nëjkx nmoˈoyëm, perë tyäˈädë artikulo të yajtuknibëjktäägë parë nˈëxpëjkëm mëdë jäˈäy.
2. ¿Tijaty myëminaambyë tyäˈädë artikulo?
2 ¿Tijaty myëminaampy? Titulo etsë subtitulo duˈun myiny extëmë yajtëˈëwën parë mbäät nmaytyakëm mëdë jäˈäy. Tadë tekstë diˈib miimp kyaj jam yˈity këxjäˈäy, parë këˈëmë jäˈäy tkäjpxët mä Biiblyë. Kon tuˈuk tuˈugë parrafo tmëminy parë mëdë jäˈäy nˈëxpëjktsondakëm jamyë tyëjkˈagëˈëy. Mä kyexy ja artikulo, ta xykyajxëm mä liibrë ¿Ti tukniˈijxëbë Biiblyë?, duˈuntsoo mbäät këˈëm nˈijxëm näˈä mët ja jäˈäy nˈëxpëjktsondakëm.
3. Ko nëjkxëm tëjkm dëjkm, ¿wiˈix mbäät nyajtuˈunëmë tadë artikulo parë nyaˈëxpëjktsondakëmë jäˈäy tyëjkˈagëˈëy?
3 ¿Wiˈix mbäät nyajtuˈunëm? Ko nˈawäˈänëmë rebistë, oy ko nijäˈäjëm ti ja artikulo myaytyakypy parë net nyajtëˈëjëm ja jäˈäy diˈib yˈoymyëdowëp. Extëm nˈokpëjtakëm, tadë artikulo diˈib 1 de enero yëˈë myaytyakypy tiko jyëjpˈamëty tijatyë Biiblyë myaytyakypy. Mbäät xyˈanëëmë: “¿Mˈijxypyë Biiblyë extëmë Diosë yˈAyuk o waˈan duˈun jeˈeyë xyˈixy extëm tuˈugë oybyë liibrë? [Waˈan tˈatsoojëmbity.] Tyapëts nmëminy tuˈugë rebistë diˈib nyimaytyakypy”. Tukˈix ja tim jawyiimbë yajtëˈëwën diˈib myëmiimpy ja artikulo, ta net xykyäjpxët ja tim jawyiimbë parrafo ets xyˈëxtäˈäyët ja tekstë diˈib jam miimp. Ta net jatëgok xykyäjpxët ja yajtëˈëwën ets waˈan tˈatsoojëmbity. Ix axtë nuˈunën mët ja jäˈäy xyˈëxpëkët, ets duˈun xypyanëjkxët ja yajtëˈëwën extëm myiny. Mä mganayjëgajpxyëty, tukˈixë ja tuˈugë yajtëˈëwën diˈib mˈixandëp ko jatëgok mjëmbitët, ets naygyäjpxëdë näˈä jatëgok mjëmbitäˈäny. Ninëjkx sëmään sëmään ets xyˈëxpëktët ja artikulo axtë ko xymyënëjkxët ja tuˈugë rebistë. Ja tuk peky wiˈix mbäät nduˈunëm, yëˈë ko nˈanmäˈäygyojëm nidëyë pën yˈëxpëkaambyë Biiblyë. Ets mbäät nyajtuˈunëmë tadë artikulo parë ndukˈijxëm wiˈixë jäˈäy nyaˈëxpëjkëm.
4. Ko jatëgok nijëmbijtëmë jäˈäy diˈib ëxpëkäämp, ¿wiˈix mbäät nyajtuˈunëmë tadë jembyë artikulo?
4 Nan mbäät nyajtuˈunëm parë nmëtmaytyakëmë jäˈäy diˈib yˈaxäjëdëbë rebistë koogoo jyemybyëtsemy ets ko jatëgok nijëmbijtëm diˈib ëxpëkäämp. Mbäät xyˈanëëmë: “Tap myiny tuˈugë jembyë artikulo mä tyäˈädë La Atalaya. Min nˈoktukˈixy ti myaytyakypy”. Nmënuˈkxtakëmë Jyobaa ets mët yëˈëgyëjxmë tadë jembyë artikulo diˈib xëmë pëtsëmäämp, mayë jäˈäy tnijawëdët ets “tjaygyukëdët diˈibë dëˈën tëyˈäjtën” (1 Tim. 2:4).