Panëjkxtë ja kugajpxyëtyë yˈijxpajtën: Jonás
1. ¿Wiˈixë Jonás jyaˈayˈajty?
1 ¿Ti miimp mä mwinmäˈäny ko xyjamyetsyë Jonás? Näägë jäˈäy wyinmaytyë ko Jonás kyaj yˈijty jotmëk ets juunë kyorasoon tmëdäjty. Perë Jonás yajnigëxëˈkë tudaˈakyˈäjtën, jotmëkˈäjtën ets nayojxë mët ko kyaj ttuuny ti yëˈë këˈëm tyukˈoyˈatëp. ¿Wiˈix mbäät nbanëjkxëmë yˈijxpajtën? (Sant. 5:10.)
2. ¿Wiˈix mbäät nbanëjkxëmë Jonásë yˈijxpajtën ko yˈijty tudaˈaky?
2 Tudaˈaky. Ko Jonás yajtuunkmooy, ta kyeky ets ojts nyijkxy wiinktsoo. Ets tam tiko kyeky, pes ja jäˈäyëty diˈib Asiria yaˈixyˈäjttëbë nety ko mëk axëkjäˈäyëty. Etsë Nínive käjpn yaˈixyˈajty extëm “ja käjpn diˈib yajpëyëˈktëbë nëë neˈpyny” (Nah. 3:1-3). Perë Jyobaa jyëjwijtsëmbijtë Jonás, etsë Jonás yajnigëxëˈkë tudaˈakyˈat ko jatëgok tkupëjky ja tuunk (Prov. 24:32; Jon. 3:1-3). Jonás tyuun ti Jyobaa tukˈanaˈamë, oy jawyiin tˈokkugeky (Mat. 21:28-31). Ets ëtsäjtëm, ¿të nbëjtakëmë winmäˈäny parë ngäjpxwäˈkxäˈänëm oy të nyajjëjwijtsëmbijtëm o oyë jäˈäy tkamëdowäˈänët mä ngäjpxwäˈkxëm?
3. ¿Tiko tsyekyëty nˈijtëm jotmëk ets nnayojxëm parë nduˈunëmë Diosë tyuunk?
3 Ijt jotmëk ets nayojxë. Ko Jonás tˈijxy ko axëëgë nety wyimbëtsëmy extëm të yˈadëˈëtsy, ko tpëjtaky oˈkën jëjpˈam ja jyukyˈäjtënë ja barkë yajˈyeˈebyëty, ta tjayoxanyë jyukyˈäjtën (Jon. 1:3, 4, 12). Ko jyajty Nínive, ta ojts nyijkxy käjpn itkujky ets tˈëxtääyë lugäär mä mbäät tnigajpxy ti netyë Jyobaa tyunaampy. Yëˈëyë tuˈugë jäˈäy diˈib jotmëk mbäät duˈun ttuny, kyaj yëˈëjëty diˈib wintseˈkyny (Jon. 3:3, 4). ¿Ti diˈib xytyukniˈˈijxëm? Ko tsojkëp nmënuˈkxtakëmë Dios parë xymyoˈoyëmë jotmëkˈäjtën ets ngäjpxwäˈkxëmë yˈayuk mä jäˈäy xymyëtsipˈäjtëm (Apos. 4:29, 31). Ets ko nan tsojkëp nnayojxëm mä Diosë tyuunk, nyajtuˈunëmë jot mëjää etsë meeny sentääbë (Apos. 20:24).
4. ¿Tiko jyëjpˈamëty nbawinmäˈäyëm ja oybyë ijxpajtën diˈib yajwëˈëmdë kugajpxyëty?
4 Tëgok tëgok ngäjpxëm mä yajnimaytyaˈagyë Diosë kyugajpxyëty, oy ko naybyëjtakëm extëmxyëp ëtsäjtëm duˈun njäjtëm. Ets nnayajtëˈëwëm: “¿Tixyëbëts ojts nduny? ¿Wiˈixëts mbäät niˈˈijxtuˈutyë jyaˈayˈäjtën?” (Eb. 6:11, 12). Mä Wiˈix nduˈunëmë Diosë Tyuunk tmëminäˈäny wiˈix mbäät nbanëjkxëmë yˈijxpajtënë wiinkpë kyugajpxyëty.