¿Wiˈix mbäät nyajtsondakëmë maytyaˈaky diˈibë jäˈäy yˈoymyëdowëp?
1. ¿Tiko jyëjpˈamëty ets nwinmäˈäyëm wiˈix ja maytyaˈaky nyajtsondäˈägäˈänëm?
1 Ko kaaky tojkx jantsy jektsy o xuˈkx yˈaxuuky xypyatëmë yuu, nanduˈun jyaty ko oy nyajtsondakëmë maytyaˈaky, mbäädë jäˈäy tˈoymyëdoy. Pääty jyëjpˈamëty ets kontiempë niwinmäˈäyëm wiˈix ja maytyaˈaky nyajtsondäˈägäˈänëm extëm mbäädë jäˈäy tˈoymyëdoy (Prov. 15:28). Per kyaj jeˈeyë tsyekyëty nwinmäˈäyëm ti diˈibë jäˈäy ndukmëtmaytyäˈägäˈänëm, pën yeny o pën kon. ¿Ti mbäät nduˈunëm parë jäˈäy tˈoymyëdowët wiˈix ja maytyaˈaky nyajtsondakëm?
2. ¿Wiˈix mbäät niwinmäˈäyëm wiˈix nyajtsondäˈägäˈänëmë maytyaˈaky diˈibë jäˈäy yˈoymyëdowëp?
2 Diˈib mbäädë jäˈäy tˈoymyëdoy. Pën kyaj oy nyajtsondakëm ja maytyaˈaky, mbäät ja jäˈäy kyaj tˈoymyëdoy ets tjëjpkäjpxtuˈuty. Pääty, oy ko nwinmäˈäyëm tijatyë jäˈäy yˈoymyëdowëp mä ja territooryë. ¿Jyamëdatandëp tuˈugë oybyë gobiernë? ¿Jaˈitandëp agujk jotkujk mëdë fyamilyë? ¿Tsyojktëp ets jyëjptëgoyëdë tsip? Mayë jäˈäy nyigäjpxandëp wiˈix wyinmaytyë, pääty oyxyëp ko ti nyajtëˈëwëm parë tnigäjpxtët wiˈix wyinmaytyë. Nan mbäät nyajtsondakëmë maytyaˈaky extëm myiny mä Wiˈix nduˈunëmë Diosë Tyuunk. ¿Tiko ngatuˈundakëm mä nDiosˈawdäjtëm mëdë Familyë wiˈix nyajtsondäˈägäˈänëmë maytyaˈaky?
3. Ko nbëjkëmë kuentë wiˈixë jäˈäy tmëdatyë kostumbrë ets tijaty myëbëjkypy, ¿wiˈix xypyudëjkëm parë oy nyajtsondakëmë maytyaˈaky?
3 Ja kostumbrë diˈibë jäˈäy myëdäjtypy ets tijaty myëbëjkypy. Ta näägë lugäär mä netyë jäˈäy yaˈˈanëëmëyäˈändë tiko ninëjkxëm. Per nan taa, mä jäˈäy jawyiin ttseky ets nyajtëˈëwëm wiˈix yaˈixy yajpääty ets waanë mëët ngäjpx nmaytyakëm. Nan ta lugäär mä jäˈäy twintsëˈëgëdë Biiblyë, ets mbäät netyë nyajtuˈunëm (Apos. 2:14-17). Per mä jäˈäy kyaj tmëbëktë Jesus o kyaj ttukˈitëdë nituˈugë relijyonk, mas oy ko jaanëm ndukmëtmaytyakëmë Biiblyë ko jatëgok nnijëmbijtëm (Apos. 17:22-31).
4. ¿Ti mbäät nyaˈijtëm winmäˈänyoty ko ja maytyaˈaky nyajtsondakëm?
4 Wiˈix nmaytyaktsoˈonëm. Jëjpˈam ets yajxon nwinmäˈäyëm wiˈix nmaytyäˈägäˈänëm. Ets oy ko naa konaty ets adëyë. Per kyaj jeˈeyë nwinmäˈäyëm ti ja jäˈäy ndukmëtmaytyäˈägäˈänëm, nanduˈunën nˈijxëm wiˈix nmëtmaytyäˈägäˈänëm. Nˈoktukxondakëm ets nˈokwinmäˈäyëm ko oybyëtsëmäämp. Nˈokjamyajtsëm ko mbäädë jäˈäy oy nyayjawëty ko kyaj jeˈeyë wingëˈëy agëˈëy nmëtxik nmëtxoˈonëm. Ko nduˈunëm extëm yä të yajnigajpxy, yëˈë xypyudëkëyäˈänëm parë niwinmäˈäyëm wiˈix mbäädë maytyaˈaky nyajtsondakëm diˈibë jäˈäy mëjämoˈoyëdëp parë tˈaxäjët ja käˈäy ukënë diˈib ijtp mä “[Jyobaa] myeesë” (1 Kor. 10:21).