Kuentˈattë ja mtsënäˈäy mjukyˈäjtën

Ko kasäädë jäˈäy ojts nyaytyukwandäˈägëdë ko ninäˈä kyanaymyastuˈudäˈänëdë Jyobaa yajtsobatypy ets yˈawijxypy tkuytyundët (Mat. 19:5, 6). Mä Diosë kyäjpn, nimayë kasäädë jäˈäy diˈib agujk jotkujk yajpattëp. Per pyäädandëbë jotmay, pes nipën kyawäˈätsjäˈäyëty. Jeˈeyë ko kyaj mbäät wyinmaytyë ko net yˈoyët ja jyotmay ko nyaymyastuˈudëdët o yaˈˈajääywyäˈkxtët. ¿Wiˈix mbäädë kasäädë jäˈäy tkuentˈattë ja tsyënäˈäy jyukyˈäjtën?

Nˈokˈijxëm mëgoxk pëkyë käjpxwijën.

1. Kuentˈat ja mgorasoon ets kyaj xywyinˈit xywyinxonëdë wiink yetyëjk o wiink toxytyëjk, nan kyaj xytyukxondäˈägëdë ixy jawë mä axëëgë jäˈäy yˈit tsyëënëdë. Pes yajjaˈäjtypyë jotmay mä jäˈäy kyasäädëˈaty (Mat. 5:28; 2 Peed. 2:14).

2. Yajkëktëkë ja mnaymyayë mëdë Jyobaa ets jukyˈattë extëmë Dios ttukjotkëdaˈaky (Sal. 97:10).

3. Yajnigëxëˈëktë ja oybyë jäˈäyˈäjtën ets tukˈix ja mjamyëët ko mtsojkypy ko tiigatiity xynyamoˈoyët parë agujk jotkujk mgasäädëˈattët (Kol. 3:8-10, 12-14).

4. Yaˈixëdë ja mayˈäjt wintsëˈkën ets käjpx mmaytyäˈäktë tsuj yajxon (Kol. 4:6).

5. Naytyukˈixëdë ko mnaytsyojkëdëp mä mtsëën mjukyˈattë (1 Kor. 7:3, 4; 10:24).

Ko kasäädë jäˈäy twintsëˈëgëdë pëjk ukën, yëˈë duˈun wyintsëˈkëdëbë Jyobaa, diˈib yajtsondak ja pëjk ukën.

KO NETY TË YAˈIJXTÄˈÄYË BIDEO TSOJKËP NBËYËˈKËM PARË NMËMADAKËM: NˈOKPËYËˈKËM EXTËM TË YAˈˈAWITSY, TA YAˈˈATSOOWËMBITËDË TYÄˈÄDË YAJTËˈËWËN:

• 

  Mbäädë kasäädë jäˈäy oy tjayajtsondäˈäktë jyukyˈäjtën, per ¿tijaty jotmay mbäät tpäättë?

• 

  ¿Wiˈix mbäät pyudëkëdë Biiblyë kyäjpxwijën pënaty jyäˈäwëdëp ko kyaj nyekyjaˈˈatyë tsojkën mä kyasäädëˈattë?

• 

  ¿Ti käjpxwijën Jyobaa myoobyë kasäädë jäˈäy?

• ¿Ti mbäät ttundë kasäädë jäˈäy parë agujk jotkujk kyasäädëˈattët?