Kupëk ko Jyobaa të mbokymyeˈkxyëty

1, 2. ¿Ti Jyobaa tyuumpy ko nˈajëmbijt njodëmbijtëm ets wiˈix xyajnayjyäˈäwëm? (Ix nanduˈunë dibujë mëdiˈibë miimp mä rebistë nyiˈak).

JA REY David nëgooyë ojts tmëkjäˈäwënë ti nety të ttuundëgoy (Sal. 40:12; 51:3; mä tsyondaˈaky). Per ko yˈajëmbijty jyodëmbijty amumduˈukjot, ta Jyobaa pyokymyaˈkxë (2 Sam. 12:13). Ko David tnijäˈäwë ko të netyë Jyobaa pyokymyeˈkxyëty, agujk jotkujk jyantsy nyayjyäˈäwë (Sal. 32:1).

² Ëjtsäjtëm, mbäät nanduˈun nnayjyäˈäwëm ixtëmë David. Jotkujk nnayjyäˈäwëm ko Jyobaa myaˈkxaampy ja poky kaytyey axtë pën të ndëgoˈoyëm mëjwiin kajaa, per net pën jodëmbijtëm winë ääw winë jot, pën nnigäjpxëm ti të nduˈunëm ets pën kyaj nekytyuunëmbijtëm (Prov. 28:13; Apos. 26:20; 1 Fwank 1:9). Ko Jyobaa tmeˈkxy ja poky kaytyey, pyoˈtaapy jyoˈtstaapy ets duˈunxyëp ixtëm kyaj të ndimypyokytyuˈunëm. Ko duˈun nnijäˈäwëm, agujk jotkujk xyajnayjyäˈäwëm (Ezeq. 33:16).

3, 4. ¿Wiˈix nyayjyäˈäwë Jennifer? ¿Ti nˈixäˈänëm mä yäˈädë artikulo?

³ Per näˈäty, kyaj nmëbëkäˈänëm ko Jyobaa të xypyokymyaˈkxëm, duˈun jyajtyë Jennifer. Yëˈë jap myutskˈäjty mä Diosë kyäjpn, per ko yaˈkpëtsëëmy, ta ojts axëëk yˈadëtsnë, tyuun tijaty ayuˈutsyë ets kyaj ja tyääk tyeety ttuknijäˈäwë. Per ko tiempë nyajxy, ta tnijëmbijtyë Jyobaa, ets ok, ta nyëbejty. Jennifer jyënaˈany: “Axëëgëtsë netyë njukyˈäjtën të nyajnëjkxy, xim yamëts ja jäˈäy nmëtˈijty nmëtsëënääy, yëˈëyëts ja meeny sentääbë nˈëxtääy, jantsy uk jantsy mukëts ets axëëgëts njantsy jyaˈayˈajty, per jodëmbijtëts ets nˈamdoowëtsë maˈkxën. Ja njot nwinmäˈänyëts jënäämbë nety ko tëjëts nyajmeˈkxy mët kojëtsë Jesús xykyuˈoˈkë, per ja ngorasoonëts kyaabë nety tkupëky”.

⁴ Per näˈäty, mbäät duˈunyëm mwinmay ko Jyobaa kyajnëm tmeˈkxy ja poky kaytyey mëdiˈibë të xytyuny. Pën duˈun mwinmay, jamyats ko Jyobaa tsyojkypy ets mˈittët seguurë duˈun ixtëmë David, ko yëˈë të mbaˈˈayoyëty ets të mbokymyeˈkxyëty. Mä yäˈädë artikulo nˈixäˈänëm tiko jyëjpˈamëty mˈitët seguurë ko Jyobaa të meˈkxyëty ets ti mbudëkëyanëp parë xymyëbëkët.

¿TIKO JYËJPˈAMËTY NˈIJTËM SEGUURË KO JYOBAA TË XYPYOKYMYAˈKXËM?

5. ¿Ti Satanás xytyukmëbëkäˈänëm? Pëjktäˈäk tuˈugë ijxpajtën.

⁵ Pën ijtëm seguurë ko Jyobaa të xypyokymyaˈkxëm, ta kyaj Satanás xywyinˈëënäˈänëm. Nˈokjamyajtsëm ko yëˈë yˈëxtäˈäyaambyë winmäˈäny parë kyaj nekymyëduˈunëmë Jyobaa. Ixtëm nˈokpëjktakëm, xytyukmëbëkäˈänëm ko pën të mëjwiin kajaa nbokytyuˈunëm, Jyobaa ninäˈä xypyokymyaˈkxäˈänëm. Duˈun tjayajwinmayany ja yeˈeytyëjkjäˈäy mëdiˈibë yajjuˈt mä Diosë kyäjpn jam Corinto mët ko pyokytyuuny mëjwiin kajaa (1 Kor. 5:​1, 5, 13). Ko tiempë nyajxy, yäˈädë jäˈäy jodëmbijt, perë Satanás jyatsojk ets kyaj myaˈkxëdët ja myëguˈuktëjk ets ni kyakupëkëdët ko jyajëmbitäˈänët. Koxyëp duˈun jyajty, taxyëbë Satanás dyajwinmääyë yäˈädë yeˈeytyëjk ko kyaj mbäät yajmeˈkxy mëdiˈibë të ttuny, ets taxyëp nyayjyäˈäwë mëk mon mëk tuk ets kyaj tnekymyëdunäˈänëdë Dios. Tyam, nan yëˈë mëdiˈibë Satanás tsyojkypy, xyajwinmayäˈänëm ko Jyobaa ninäˈä tkamaˈkxäˈäny ja poky kaytyey ets ta xytyukmäjtstuˈudäˈänëm. Per mëdiˈibë tyukˈoy, yëˈë ko ëjtsäjtëm “nnijäˈäm ja yˈaxëk winmäˈäny” (2 Kor. 2:​5-11).

6. ¿Ti xypyudëkëyäˈänëm parë kyaj nekymyëkjäˈäwëm ti të nduˈunëm?

⁶ Pën nˈijtëm seguurë ko Jyobaa të xyjyantsy pyokymyaˈkxëm, ta kyaj nekymyëkjawëyäˈänëm ti të nduundëgoˈoyëm. Ko nbokytyuˈunëm kuanë ko axëëk nnayjyäˈäwëm (Sal. 51:17). Ets kyaj wyiˈixëty, pes xypyudëjkëm parë nnayyajtëgäjtsëm ets nduˈunëm mëdiˈibë oy (2 Kor. 7:​10, 11). Ko nëgooyë nbokyjyäˈäwënë ti të nduˈunëm oy të njajodëmbijtëm, mbäät xyaˈëxtëkëwäˈkëm ets axtë xytyukmastutëmë Jyobaa. Per pën ijtëm seguurë ko Jyobaa të xyjyantsy pyokymyaˈkxëm, mbäät kyaj axëëk nekynyayjyäˈäwëm. Duˈuntsoow nmëduˈunëm ixtëm ttsoky: agujk jotkujk ets kyaj wiˈix ja jot winmäˈäny njäˈäwëm (Kol. 1:​10, 11; 2 Tim. 1:3). Minë net nˈokˈijxëm ti xypyudëkëyäˈänëm niduˈuk niduˈuk parë nˈijtëm seguurë ko Jyobaa të xyjyantsy pyokymyaˈkxëm.

¿TI MBUDËKËYANËP PARË MˈITËT SEGUURË KO TËËJËNË JYOBAA MJANTSY PYOKYMYEˈKXYËTY?

7, 8. ¿Wiˈixë Jyobaa nyaynyimaytyakë mä Éxodo 34:​6, 7, ets tiko mbäät mˈity seguurë ko mbokymyaˈkxanëp?

⁷ Pawinmay wiˈixë Jyobaa nyaynyimaytyakë jyaˈayˈaty. Ixtëm nˈokpëjktakëm, mbäät xypyawinmay wiˈix tˈanëmääyë Moisés mä ja Sinaí gopk (käjpxë Éxodo 34:​6, 7).a Jyënany ko yëˈë “tuˈugë Dios mëdiˈibë paˈˈayoop ets nasˈayoˈowëp”. Pääty, ¿waˈandaa net kyaj tpokymyaˈkxët ja jäˈäy mëdiˈibë tsojkëp ets mëdiˈibë amumduˈukjot të jyodëmbity? Pyokymyaˈkxaampy, pes ko duˈun tkatunët kyaj nety dyajnigëxëˈëky ko yëˈë tuˈugë Dios mëdiˈibë paˈˈayoop nasˈayoˈowëp.

⁸ Tijatyë Jyobaa nyigajpxypy nyimaytyakypy ak tëyˈäjtën, pääty mbäät nmëbëjkëm ko jyënaˈany ko yëˈë tuˈugë Dios mëdiˈibë paˈˈayoop nasˈayoˈowëp (Sal. 31:5). Pën mtsiptakxëp xymyëbëkët ko Jyobaa të mbokymyeˈkxyëty, oy ko yäˈädë xywyinmayët: pën mmëbëjkypy ko Jyobaa yëˈë tuˈugë Dios mëdiˈibë paˈˈayoop nasˈayoˈowëp ets ko pyokymyeˈkxypy niˈamukë pënaty jodëmbijttëp, mbäät mˈity seguurë ko yëˈë mbokymyaˈkxanëp nanduˈun.

9. Ixtëmë David jyënany mä Salmo 32:​5, ¿ti xytyukniˈˈijxëm mä wiˈixë Jyobaa pyokymyeˈkxy?

⁹ Pawinmay wiˈix mä Biiblyë yajnimaytyaˈagyë Jyobaa xypyokymyaˈkxëm. Ja rey David duˈun tˈanëmääyë Jyobaa: “Mijts ta ojts xymyeˈkxyëts ja nboky ngaytyey” (käjpxë Salmo 32:5). Ko David jyënany “xymyeˈkxyëts”, mä ayuk ebreo yëˈë nanduˈun yˈandijaampy ko ti “yajwijtsëˈëky” o “yajmënëjkxy”. Pääty ko Jyobaa ojts tpokymyeˈkxyë David, duˈunxyëp ixtëm ttukniwijtstuty ja tsëmy këˈëy mëdiˈibë jantsy jeˈemtsy. David ta nyayjyäˈäwë agujk jotkujk ets kyaj nëgoo ojts tˈokmëmääy tˈokmëdäjnë ti nety të ttuny (Sal. 32:​2-4). Pën jodëmbijtëm amumduˈukjot, ta nanduˈun nnayjyawëyäˈänëm ixtëmë David. Pääty kyaj tiko nmëjeˈemtsyˈoˈkëm ja nbokyˈäjt ngaytyeyˈäjtëm mët ko Jyobaa të xytyukniwijtstutëm ets të tmënëjkxy.

10, 11. ¿Ti xytyukniˈˈijxëm ixtëmë David jyënany mä Salmo 86:5?

¹⁰ (Käjpxë Salmo 86:5). David duˈun tˈanëmääyë Jyobaa: “Mijts [ . . . ] mjantsy pyokymyaˈkxäämp”. Yäˈädë yëˈë yˈandijpy ko Jyobaa kyaj netyë xytyukjotˈambëjkëm ko nbokytyuˈunëm, yëˈë tsyojkypy ets njodëmbijtëm parë xypyokymyaˈkxëm. ¿Per tiijën ko duˈun jyaˈayˈaty? David duˈunë Jyobaa tˈakˈanmääy: “Ja mtsojkën mëdiˈibë ninäˈä kyakugëxë, mdukˈijxypy mëjwiin kajaa niˈamukë pënaty mmëgäjpxëp”. Ixtëm ojts nimaytyakëm mä jatuˈukpë artikulo, Jyobaa mëk ttsoky pënaty mëduunëp ets ninäˈä tkamäjtstuˈudäˈäny. Päätyën tpokymyeˈkxy amumduˈukjot pënaty jodëmbijttëp (Is. 55:7). Pën mtsiptakxëp xymyëbëkët ko Jyobaa të mbokymyeˈkxyëty, oy ko mnayajtëwëdët: “¿Nmëbëjkypyëts ko Jyobaa pyokymyeˈkxypy niˈamukë pënaty jodëmbijttëp ets pënaty të yˈamdowëdë paˈˈayoˈowën? Pën duˈun, ¿tikotsë net ngakupëkët ko tëjëts xyjyantsy xypyokymyeˈkxy?”.

¹¹ Mëdiˈibë agujk jotkujk xyajnayjyäˈäwëm, yëˈë ko mä Biiblyë jyënaˈany ko Jyobaa nyijäˈäwëp wiˈix të xyajkojëm ets jyaygyujkëp ko pokyjyaˈay nyajpatëm (Sal. 139:​1, 2). Min nˈoknimaytyakëm jatuˈugë tekstë mëdiˈibë xypyudëkëyäˈänëm parë nˈijtëm seguurë ko Jyobaa xyjyantsy pyokymyaˈkxäˈänëm.

JAMYATS YËˈËYË MËDIˈIBË JYOBAA JYAMYEJTSYPY

12, 13. Ixtëm jyënaˈanyë Salmo 103:​14, ¿ti jeˈeyë Jyobaa jyamyejtsypy, ets ti xytyukmëdunäˈänëm?

¹² (Käjpxë Salmo 103:14). David jyënany ko Jyobaa “jyamyejtsypy ko naxway ëjtsäjtëm”. Yäˈädë yëˈë xytyukˈijxëm ko tam tiko Jyobaa xypyokymyaˈkxäˈänëm pën njodëmbijtëm, xëmë dyaˈity wyinmäˈänyoty ko pokyjyaˈay nyajpatëm. Min nˈaknimaytyakëmë Salmo 103:14.

¹³ David nyimaytyak ko Jyobaa “yajxon tnijawë wiˈix të ngojëm”. Ko Jyobaa ojts dyajkojˈyë Adán, yëˈë yajtuunë nax, ets kom nyijäˈäwëp wiˈix ojts xyajkojëm, nan nyijäˈäwëbë net ti nyajtëgoyˈäjtëm. Ixtëm nˈokpëjktakëm, nyijäˈäwëp ko ngayäˈän nˈuugäˈänëm, nmäˈäjäˈän nboˈkxäˈänëm ets ko nyajtëgoyˈäjtëm ja poj mëdiˈibë nxajëm (Gén. 2:7). Per ko Adán mëdë Eva pyokytyuundë, ta niˈamukë ja yˈuˈunk yˈënäˈk ttukninäjxtë ja poky kaytyey ets päätyën net ja naxwinyëdë jäˈäy ttunäˈändë mëdiˈibë kyaj yˈoyëty. David jyënany ko Jyobaa jyamyejtsypy ko pokyjyaˈay nyajpajtëm ets kyaj jeˈeyë tnijawë. Pääty ko Salmo 103:14 jyënaˈany “jyamyejtsypy”, mä ayuk ebreo kyaj yëˈë jeˈeyë tˈandijäˈäny ko Jyobaa yaˈijtypy wyinmäˈänyoty ko nbokyjyaˈayˈäjtëm, yëˈëjën nanduˈun yˈandijaampy ko tam ti xytyukmëdunäˈänëm. Pääty mëdiˈibë David myaytyäˈägan, yëˈë ko Jyobaa jyaygyujkëp ko pokytyunäˈänëm näˈäty. Per pën jodëmbijtëm, ta xypyaˈˈayowäˈänëm ets xypyokymyaˈkxäˈänëm (Sal. 78:​38, 39).

14. 1) ¿Ti xytyukniˈˈijxëm ixtëmë David jyënany mä Salmo 103:12? 2) Ja ijxpajtën mëdiˈibë David pyëjktak, ¿wiˈix xytyukjaygyujkëm ixtëmë Jyobaa pyokymyeˈkxy? (Ixë rekuäädrë “Ko Jyobaa xypyokymyaˈkxëm, jyaˈaytyëgoopy ti të nduˈunëm”).

¹⁴ ¿Ti xyˈaktukniˈˈijxëm ixtëm jyënaˈanyë Salmo 103 mä wiˈixë Jyobaa xypyokymyaˈkxëm? (Käjpxë Salmo 103:12). David jyënany ko Jyobaa xypyokymyaˈkxëm jantsy jagam tpëjktaˈaky ja poky kaytyey “duˈun ixtëm jyagamëty mä xëëw pyëtsëmy ets mä xëëw kyëdaˈaky”. Yäˈädë yëˈë yˈandijpy ko Jyobaa xymyaˈkxëm duˈunxyëp ixtëm tmënëjkxy jantsy jagam ja poky kaytyey. Ets kom jantsy jagam të tmënëjkxy, kyaj tnekyjyamyatsäˈäny ets nan kyaj xytyukwinmëdowäˈänëm (Ezeq. 18:​21, 22; Apos. 3:19).

15. ¿Ti mbudëkëyanëp parë kyaj duˈunyëm axëëk myajnayjyawëdët ja poky kaytyey mëdiˈibë mduun?

¹⁵ Pën duˈunyëm axëëk myajnayjyawëty ja poky kaytyey mëdiˈibë mduun, oy ko xypyawinmayët ixtëm jyënaˈanyë Salmo 103, pes yëˈë mbudëkëyanëp parë mˈitët seguurë ko tëëjënë Jyobaa mbokymyeˈkxyëty. Oy ko nanduˈun mnayajtëwëdët: “Pënë Jyobaa jyamyejtsypy ko pokyjyaˈayëts ets xypyokymyaˈkxäämbëts mët kojëts të njodëmbity, ¿tikots nanduˈun ngajamyetsy? Ets pën yëˈë të tjäˈäytyëgoy ja poky mëdiˈibëts nduun ets ninäˈäjëts xykyatukwinmëdoy, ¿tikotsë net ëjts ngajäˈäytyëgoy?”. ¿Tiko mijts xyjyamyetsy ja poky mëdiˈibë mduun pënë Jyobaa kyaj tnekyjyamyetsy? (Sal. 130:3). Pën mgupëjkypy ko Jyobaa të mbokymyeˈkxyëty, ta nanduˈun xyjyaˈaytyëgoyaˈany ets mbäädë net agujk jotkujk xymyëduny.

16. ¿Tiko kyujotmayëty ko xëmë xyjyamyatsët ja poky kaytyey mëdiˈibë mduun? (Ix nanduˈunë dibujë).

¹⁶ Ko yëˈëyë xyjyamyatsët janääm jatsojk ja poky kaytyey mëdiˈibë mduun, duˈunxyëp ixtëm tuˈugë tsyofeer mëdiˈibë kyaj dyajjëgeˈegyë yˈijxën mä ja ijxn mä tˈixy tijaty wëˈëmp jëxkëˈptsoow. Kyaj wyiˈixëty ko näˈäganäˈäty duˈun ttunët, pes mbäät tˈixy pën kyaj jap ti myiny mëdiˈibë mbäät yˈayoˈonmoˈoyëty, per pën jäˈtäämp oy mëk, tsojkëp yëˈëyë tˈixët wiˈix ja nëë tuˈu nyijkxy. Pääty, kyaj wyiˈixëty ko näˈäganäˈäty xyjyamyatsët wiˈix mduundëgooy, pes mbäät mbudëkëty parë xytyunët ja mëjääw ets kyaj jatëgok duˈun mˈadëˈëtsët. Per pën duˈunyëm xyjyamyetsy ja poky kaytyey mëdiˈibë mduun, mbäät axëëk mnayjyawëty ets kyaj oy xynyekymyëdunëdë Jyobaa. Pääty, tuunë mëjääw parë jamyë ja mˈijxën xypyëjktäˈägët mä ja jembyë jukyˈäjtën mä “kyaj pën tnekyjyamyatsäˈäny” tijaty të nyaxy (Is. 65:17; Prov. 4:25).

KUPËK KO JYOBAA MTSOJKËP ETS KO TË MBOKYMYEˈKXYËTY

17. ¿Tiko tsyokyëty ngupëjkëm ko Jyobaa xytsyojkëm ets ko xypyokymyaˈkxëm?

¹⁷ Oy ko niˈamukë ngupëjkëm ko Jyobaa xytsyojkëm ets ko xypyokymyaˈkxäˈänëm (1 Fwank 3:19). ¿Tiko? Yëˈko Satanás xytyukmëbëkäˈänëm ko Jyobaa kyaj xytsyojkëm ets ko ninäˈä xykyapokymyaˈkxäˈänëm. Pes mëdiˈibë tsyojkypy, yëˈë ets kyaj nekymyëduˈunëmë Jyobaa. Ets kom nyijäˈäwëp ko tim tsojk kyutëgoyaˈany, pääty tˈëxtäˈäyë winmäˈäny wiˈix mbäät xytyukmäjtstutëmë Jyobaa (Diˈibʉ Jat. 12:12). ¡Per ninuˈun mbäät ngalugäärmoˈoyëm!

18. ¿Ti mbäät xytyuny parë mˈitët seguurë ko Jyobaa të mbokymyeˈkxyëty?

¹⁸ Mä jatuˈukpë artikulo yëˈë ojts nnimaytyakëm ti mbäät mbudëkëty parë xymyëbëkët ko Jyobaa mtsojkëp. Ets mä yäˈädë artikulo yëˈë të nimaytyakëm ti mbudëkëyäˈänëp parë xykyupëkët ko Jyobaa tëjën mbokymyeˈkxyëty. Pääty, pawinmay wiˈixë Jyobaa nyaynyimaytyaˈagyëty jyaˈayˈaty ets wiˈix mä Biiblyë yajnimaytyaˈaky xypyokymyaˈkxëm. Këdii xyjyaˈaytyëgoy ko Jyobaa nyijäˈäwëp ko mbokyjyaˈayëty ets mbaˈˈayoowëp, ets amumduˈukjot nanduˈun mbokymyaˈkxäˈänyëty. Ko duˈun xytyunët, mbäät nëjkx nanduˈun mjënäˈäny ixtëmë David: “¡Dyoskujuyëp Jyobaa ko të xymyeˈkxyëts ja nboky ngaytyey!” (Sal. 32:5).