Nˈokpudëjkëm ënetyë pënaty tsyojkënyëˈäjttëp ja Diosë yˈayuk

1. ¿Wiˈix yˈatsowdë näägë jäˈäy ko tim ëgäˈäny ndukmëtmaytyakëm ja Diosë yˈääw yˈayuk? (Apos. 13:48).

MÄ PRIMER siiglë jantsy jotkujkë jäˈäy nyayjyäˈäwëdë ko yajtukmëtmaytyaktë pënën Jesús, pyëjktaktë wyinmäˈäny ets tpanëjkxäˈändë (käjpxë Apostʉlʉty 13:48). Nanduˈun tyam, nimayë jäˈäy ënetyë tˈoymyëdowdë ja Diosë yˈayuk ko tim ëgäˈäny yajtukmëtmaytyäˈäktë ets nääk kyaj tˈoymyëdowdë, per ko tiempë nyaxy ta ttsojkënyëˈäjnëdë ets tˈixyˈatäˈändë Dios. Pääty ¿ti mbäät nduˈunëm ko nbatëmë jäˈäy mä nˈëwäˈkx ngäjpxwäˈkxëm mëdiˈibë “jënandëp ja yˈääw jyot” ko tjantsy tˈëxpëkäˈändë Biiblyë?

2. Ko nˈëwäˈkx ngäjpxwäˈkxëm, ¿tiko yaˈijxkijpxy mët tuˈugë jäˈäy mëdiˈibë nip kojp?

² Mä nˈëwäˈkx ngäjpxwäˈkxëm mbäät mëët nˈijxkijpxyëm ixtëm ko tuˈugë jäˈäy nyiˈipy kyojy, tamˈäjtpë kyojy pyëjktaˈaky mëdiˈibë të myëjääwnë ets mëdiˈibë tsojkëp dyajpëdëˈëgët, per nan tamë wiinkpë mëdiˈibë apenë të tniˈipy ets tsojkëp tkuentëˈatët, dyajxoogët ets oy yon pyatët. Nan duˈunjäjtp ko nbatëmë jäˈäy mëdiˈibë jënandëp ja yˈääw jyot ko tˈixyˈatäˈändë Dios, nduˈunëm ja mëjääw ets nbudëjkëm parë tmëdundëdë Dios. Per pënaty kyajnëm tkupëktë, duˈunyëm nbudëjkëm ets tpëktëdë kuentë tiko yˈoyëty ko tˈëxpëktëdë Biiblyë (Fwank 4:​35, 36). Ko nnijäˈäwëm wiˈix niduˈuk niduˈuk ja jäˈäy yajpäättë, mbäädë net nwinmäˈäyëm wiˈix nbudëjkëm ets niˈigyë tmëwingondëdë Jyobaa. Pääty mä yäˈädë artikulo yëˈë nimaytyäˈägäˈänëm ti mbäät nduˈunëm ko tim ëgäˈäny ja jäˈäy nmëtmaytyakëm pën yˈoymyëdoopy ja Diosë yˈääw yˈayuk. Nanduˈun nimaytyäˈägäˈänëm wiˈix mbäät nbudëjkëm ets niˈigyë wyimbatët.

KO JA JÄˈÄY TˈOYMYËDOY JA DIOSË YˈAYUK

3. ¿Tii mbäät nduˈunëm pën nbatëmë jäˈäy mëdiˈibë yˈoymyëdoopy ja Diosë yˈayuk? (1 Korintʉ 9:26).

³ Ko nbatëmë jäˈäy mëdiˈibë yˈoymyëdoobyë Diosë yˈääw yˈayuk mä nˈëwäˈkx ngäjpxwäˈkxëm, oy ko ënetyë nbudëjkëm parë tpäättët ja jukyˈäjtënë xëmëkyëjxmbë. Kyaj tiko nyajnasjajkëm: ko tim ëgäˈäny nmëtmaytyakëm mbäät nˈanëmäˈäyëm ko mëët nˈëxpëkäˈänëmë Biiblyë ets nwoˈowëm reunyonk (Käjpxë 1 Korintʉ 9:26).

4. Nimaytyäˈäk mët tuˈugë ijxpajtënë wiˈixë jäˈäy ënetyë tkupëktë ko tˈëxpëkäˈändë Biiblyë.

⁴ Anëëmë ko myaˈëxpëkaampy. Taaˈäjtpë jäˈäyëty mëdiˈibë ënetyë kyupëjktëp ko tˈëxpëkäˈändë Biiblyë. Min nˈokˈijxëm ti tuun jäjtë jap Canadá. Jueebës xëëw, tuˈugë kiixy ojts tmëwingony ja karruˈunk ets ojts tjuuty ja foyetë Jukyˈat agujk jotkujk, ja nmëguˈukˈäjtëm mëdiˈibë nety jam wyindënaapy ja karruˈunk ojts yˈanëˈëmxëty ko pën tsyojkënyëˈajtypy mbäät yˈëxpëky namayˈäjtënë. Yäˈädë kiixy nëgooyë ojts tˈoymyëdoownë, ta ojts nyaymyoˈoyëdë ja numero de telefënë. Mä taabë xëëw ta ja kiixy ojts nyijayëty ets yajtëëwë wiˈixën ja jäˈäy dyaˈëxpëktë, ta tˈatsooy ko mbäät mëët yˈëxpëky sääbëdë o domingë. Per ja kiixy ta yˈatsoowë: “¿Tiko ngaˈëxpëjkëm bom, pes nmëdäjtypyëtsë tiempë?”. Ja kyum bom ta yˈëxpëjktsoˈondë ets domingë xëëw ta ëgäˈäny ojts nyijkxy mä reunyonk ets jantsy pojënë ojts wyimbety.

5. ¿Ti mbäät nmëdäjtëm winmäˈänyoty ko jäˈäy nˈanëmäˈäyëm pën ëxpëkäämp? (Ixë dibujë.)

⁵ Per kyaj niˈamukë jäˈäy tˈoymyëdowäˈändë ja Diosë yˈayuk ixtëmë yäˈädë kiixy. Tsojkëp njamyajtsëm ko wiˈixëmë jäˈäy yaˈix yajpäättë, näˈäty tsojkëp jawyiin mëët nˈokkäjpx nˈokmaytyakëm ti yëˈë yˈoymyëdoopy ets oknëm ndukmëtmaytyakëm ja Diosë yˈayuk. Per yäˈädë kyaj tiko xyaˈëxtëkëwäˈkëm, tsojkëbën duˈunyëm nyaˈijxëm ko naytyukjotmaytyuˈunëmë jäˈäy ets näˈäty jajkp parë tyëkët ëxpëjkpë. ¿Per ti mbäät nˈoktuˈunëm parë ja jäˈäy nyajtëjkëm ëxpëjkpë? Min nˈokˈijxëm wiˈix näägë nmëguˈukˈäjtëm tnimaytyäˈäktë mëdiˈibë jyäjttëp wiˈix pojënë jäˈäy dyaˈëxpëjktsondäˈäktët. Min nˈokˈijxëm wiˈix jyënandë.

6. ¿Wiˈix mbäädë jäˈäy nˈanëmäˈäyëm parë tpëkëdë kuentë ko mbäät mëjwiin kajaa pyudëkëty ko tˈëxpëkëdë Biiblyë?

⁶ Mä näägë, lugäär ja publikadoorëty o prekursoorëty duˈun jyënäˈändë ko niˈik oy ko jäˈäy kyaj nˈanëmäˈäyëm ko nyaˈëxpëkäˈänëm, pes niˈigyë yˈoybyëtsëmy ko nˈanëmäˈäyëm ko jeˈeyë mëët ngäjpxäˈän nmaytyäˈägäˈänëm ets tnijawëdët yajxon ja Biiblyë. Ets parë jatëgok nnijëmbijtëm, yäˈädë nmëguˈukˈäjtëm jyënäˈändë ko mbäädë jäˈäy duˈun nˈanëmäˈäyëm: “Mä Biiblyë yˈatsoowëmbijtypy tijaty ëjtsäjtëm nnayajtëˈëwëm”, o nan mbäät nˈanëmäˈäyëm: “Biiblyë kyaj yëˈëyë tnimaytyaˈagyë relijyonk, myëmiimpy nanduˈunë oybyë ëwij käjpxwijën”. Ta net nˈakˈanmäˈäyëm: “Jeˈeyë waanë ja mdiempë xynyasˈixët ets mëjwiin kajaa tijaty xyjyatäˈäny”. Kyaj tyim jyëjpˈamëty ets ja jäˈäy xyˈanëëmët ko sëmään sëmään xynyinëjkxäˈäny, kyaj tjawët ja kompromisë ets ko kuanë mdimyˈëwxitëdët.

7. ¿Näˈä tpëktë kuentë näägë jäˈäy ko të tpattë ja tëyˈäjtën? (1 Korintʉ 14:​23-25).

⁷ Wow reunyonk. Tëëyëp ja tiempë mä apostëlë Pablo jyukyˈajty may ja jäˈäy pyëktë kuentë ko të nety tpattë ja tëyˈäjtënë ko ëgäˈäny ojts nyëjkxtë reunyonk (käjpxë 1 Korintʉ 14:​23-25). Mayë jäˈäy jantsy pojënë wyimbajttë mä Diosë nyax kyäjpn ko ëgäˈäny nyëjkxtë reunyonk. Per ¿näˈä mbäät ja jäˈäy nˈokwoˈow nˈokwijtsëm parë nyëjkxtët reunyonk? Mä ja liibrë Jukyˈat agujk jotkujk leksion 10, jap tnimaytyaˈaky wiˈixën mbäät duˈun nˈoktuˈunëm, per kyaj tyim tsokyëty ets jaanëm ja jäˈäy nwoˈowëm nwijtsëm ets nyëjkxët mä reunyonk ko njäjtëm mä yäˈädë leksion, pes mbäät xywyoy ko tim ëgäˈäny xymyëtmaytyäˈägët ets xytyukˈawanët ti nyimaytyäˈägaampy ja diskursë mëdiˈibë naxäämp ets ti yaˈëxpëkäämp mä ja rebistë Diˈib xytyukˈawäˈänëm.

8. Ko nwoˈowëm tuˈugë jäˈäy mä reunyonk, ¿ti mbäät ndukmëtmaytyakëm? (Isaías 54:13).

⁸ Ko nwoˈowëm ja jäˈäy mä reunyonk, oy ko ndukmëtmaytyakëm wiˈix jap nˈëxpëjkëm ets wiˈix tyëgatsyëty mëdë wiinkpë relijyonk. Ko tuˈugë toˈoxytyëjk yˈojtsy tim ëgäˈäny reunyonk mä yajniˈëxpëkë rebistë Diˈib Xytyukˈawäˈänëm, ta dyajtëëy ja nmëguˈukˈäjtëm mëdiˈibë nety yaˈëxpëjkëp: “Ja mëdiˈibë jam yajnäjxypy ja rebistë, ¿nyijäˈäwëtyaapy wiˈixën niˈamukë mxëˈattë?”. Ja nmëguˈukˈäjtëm ta ojts ttukmëtmaytyaˈaky ko duˈun nnayjyäˈäwëm ixtëm tuk familyën, ets ko niˈamukë nduˈunëmë mëjääw parë yajxon nnayˈixyˈäjtëm. Ja toˈoxytyëjk ta yˈatsoowë ko mä yëˈë tsyäjptëjk kyaj nëgooyë nyayˈixyˈatëdë ets kyaj tnijawëdë tijaty txëwˈattë. Mayë jäˈäy kyaj tnijawëdë tiko nëjkxëm mä reunyonk, pääty jëjpˈam ets ndukmëtmaytyakëm wiˈix jap nˈëxpëjkëm (käjpxë Isaías 54:​13, TY). Ko nduˈukmujkëm yëˈën ets nˈawdäjtëmë Jyobaa, nnijäˈäwëm wiˈix yëˈë jyaˈayˈaty ets nnaymyëjääwmoˈoyëm nixim niyam (Eb. 2:12; 10:​24, 25). Tukniwits tuknimäˈkxë nyaxy ja ëxpëjkën ets kyaj nëgooyë tijaty yajtuny ixtëm tundë wiink relijyonk (1 Kor. 14:40). Ja tëjk mä nˈëxpëjkëm adëyë të yajkojy, per duˈun ixtëm mbäät nˈijxkujk njaygyujkëm ja Diosë yˈääw yˈayuk, kyaj jap nigäjpx nimaytyakëm ja politikë winmäˈäny ets ni tuˈugë partiidë ngapuwäˈkëm. Kyaj jap ti nyajtsiptakëm o nayˈoo nnayaxëm. Ja tukpëky mëdiˈibë mbäät pyudëkëty ja jäˈäy ets tnijawët wiˈix nˈëxpëjkëm yëˈë ko ndukˈijxëm ja bideo ¿Ti yajtuump mä ja Tëjk mä yˈëxpëktë Jyobaa tyestiigëty?

9, 10. ¿Wiˈix mbäät nbudëjkëm ja jäˈäy ets kyaj tjëjptsëˈk tjëjpjawët nyëjkxët mä reunyonk? (Ixë dibujë).

⁹ Näägë jäˈäy kyaj nyëjkxäˈändë reunyonk jaˈa ko jyëjptsëˈkëdëp ko yaˈˈanëëmëdët ets tyestiigëˈattët. Pääty ko jäˈäy nwoˈowëm reunyonk, oy ko nˈanëmäˈäyëm ko yajxon yaˈˈagëˈëjëyaˈany yaˈˈaxäjëyaˈany. Mbäät nëjkx tmëdoowˈijty ets kyaj yaˈˈanëëmëyaˈany ets jap ti ttunët o dyajtëgatsët ja ryelijyonk. Mbäät nanduˈun xytyukmëtmaytyaˈaky ko ja ënäˈkuˈungëty kyaj abëky yajpëjktäˈäktë parë ak yëˈëjëty yˈëxpëktët. Mbäät tuˈugyë yˈuˈunyëdë ets tmëdoowˈitët ja Diosë yˈääw yˈayuk, duˈuntsoow tnijawëdët mä yajpäättë ja yˈuˈunk yˈënäˈkëty ets tijatyën yajtukniˈˈijxëdëp (Deut. 31:12). Nan kyaj jap yaˈˈamdoyë meeny sentääbë, pes yëˈë nbanëjkxëm ja Jesús kyäjpxwijën ko jyënany: “Miits mˈaxäjëdë tyäˈädë mëkˈäjtën [namayˈäjtën], nan kyaj myajmëjuytyët ko dëˈën xytyundët” (Mat. 10:8). Mbäät nanduˈun nˈanëmäˈäyëm ko kyaj tyim jëjpˈamëty ets ttuktëkëdë wyit mëdiˈibë tsooxë, pesë Dios yëˈë yˈijxypyë ti japˈäjtp mä jot korasoon, kyaj yëˈëjëty wiˈix nˈixˈäjtëm nikëjxy këbajky (1 Sam. 16:7).

¹⁰ Pën ja jäˈäy nëjkxp mä reunyonk, nˈoktuˈunëm ja mëjääw ets oy nyayjyawëdët, mbäät ndukˈixyˈäjtëm ja nmëguˈukˈäjtëm ets pënaty tundëp mëjjäˈäy mä ja tuˈukmujkën. Pën kyaj tmëdatyë Byiiblyë nˈoktukˈijxëm ja njaˈäjtëm ets nˈokpudëjkëm parë tjaygyukët tijaty jam yajnimaytyakp. Ko duˈun oy nyajnayjyäˈäwëm, mbäät nëjkx jatëgok jyëmbijty.

KO NYAËXPËJKTSONDAKËMË TUˈUGË JÄˈÄY

11. ¿Wiˈix mbäät nwintsëˈkëmë ja jäˈäyë xyëëw tiempë?

¹¹ Pën nyaˈëxpëjktsondakëmë tuˈugë jäˈäy, ¿ti mbäät njamyajtsëm? Ko tsojkëp nwintsëˈkëm ja xyëëw tiempë. Ixtëm nˈokpëjktakëm, pën të mëët naygyäjpxëm ti oorë ninëjkxäˈänëm oy ko nguytyuˈunëm, oy duˈunë jäˈäy tkakostumbrëˈattë mä ntsënäˈäyëm, nan oy ko kyaj nëgooyë nyajjajkëm ko tim ëgäˈäny mëët nˈëxpëjkëm. Näägë nmëguˈukˈäjtëm mëdiˈibë kanääk kujkë jäˈäy yaˈëxpëjktëp, jyënäˈändë ko oy ko nwintsëˈkëm nuˈun ja jäˈäyë tiempë tnasˈixëyaˈany. Nan oy ko kyaj nëgooyë nimaytyakëm, nˈoknasˈijxëm waˈan yëˈë jäˈäy tnigajpxy tnimaytyaˈaky wiˈix tjaygyukë (Prov. 10:19).

12. ¿Ti ntsojkëm ko tim ëgäˈänyë jäˈäy nyaˈëxpëjkëm?

¹² Ko tim ëgäˈäny ja jäˈäy nyaˈëxpëjkëm, yëˈë ntsojkëm ets tˈixyˈatëdë Jyobaa mëdë Jesús, pääty yëˈë nyajtuˈunëm Biiblyë ets kyaj yëˈëjëty ja ngëˈëmwinmäˈänyˈäjtëm (Apos. 10:​25, 26). Ko apostëlë Pablo yaˈëxpëjky, duˈun ttuuny ixtëmë Jesús tyukniˈˈixë, pesë yëˈë Jyobaa kajxë parë mbäät niˈigyë nˈixyˈäjtëm ets ntsojkëm (1 Kor. 2:​1, 2). Apostëlë Pablo ojts tnimaytyaˈaky ko jëjpˈam ets nbudëjkëm pënaty jemy tëjkëdëp ëxpëjkpë ets niˈigyë tmëdattët ja mëbëjkën, ja wijyˈäjt kejyˈäjtën, ja jaygyujkën ets ttsëˈëgëdët ja Jyobaa, mëdiˈibë duˈun tsobatp ixtëm ja oorë, platë o ja tsää tsujjatypyë (1 Kor. 3:​11-15; Sal. 19:​9, 10; Prov. 3:​13-15; 1 Peed. 1:7). Pääty nˈokpanëjkxëmë apostëlë Pablo yˈijxpajtën ets nˈokpudëjkëmë pënaty nyaˈëxpëjkëm parë mbäät ja myëbëjkënë niˈigyë dyajkëktëkëdë ets duˈuntsoow mas niˈigyë tmëwingondëdë Jyobaa (2 Kor. 1:24).

13. Ko nety ja jäˈäy nyaˈëxpëjkëm, ¿wiˈix mbäät nyaˈijxëm ko nmaˈkxtujkëm ets ko njaygyujkëm wiˈix yaˈixy yajpääty? (2 Korintʉ 10:​4, 5 ix nanduˈunë dibujë).

¹³ Nˈokpanëjkxëmë Jesúsë yˈijxpajtën ko jäˈäy nyaˈëxpëjkëm, nˈokmëmaˈkxtujkëm ets nˈokjaygyujkëm wiˈix yaˈixy yajpääty. Ko nety mëët nˈëxpëjkëm kyaj yˈoyëty ets nyajtëˈëwëm mëdiˈibë mbäät axëëk yajnayjyawëty ets pën jam tii kyaj oy tjaygyukë, mbäät nˈakˈyajnëjkxëm ja leksion ets kyaj jamyë nwëˈëmëm, ets ok mbäät jatëgok nnijëmbijtëm mëdiˈibë kyaj oy të tjaygyukë. Ets pën nˈijxëm ko tsiptakxëp tmëbëkët ti jam ndukniˈˈijxëm, kyaj tiko ndukˈatsipˈäjtëm, nˈoknasˈijxëm ets nyaxët ja tiempë parë ja tëyˈäjtën yˈajäjt jyotjäˈtëdët (Fwank 16:12; Kol. 2:​6, 7). Pes mä Biiblyë jyënaˈany ko mbäät nyajjëgakëm “oydiˈibë winmäˈänyëty diˈibë yaˈˈadijkypy es yaˈixyˈatët ja Dios” (käjpxë (2 Korintʉ 10:​4, 5). Per parë ja jäˈäy tmäjtstuˈudët ja kostumbrë mëdiˈibë të tmëyaak të tmëbatë, tsojkëp jawyiin nbudëjkëm ets tmëdatët ja mëbëjkën mä Jyobaa ets yëˈëyë ttukˈijxpatët (Sal. 91:9).

KO JÄˈÄY NYËJKXËT REUNYONK

14. ¿Wiˈix mbäät nˈagëˈë nˈaxäjëm pënaty miindëp mä reunyonk?

¹⁴ Jyobaa tsyojkypy ets niˈamukë ntsojkëmë jäˈäy ets oy ko tsuj yajxon nˈagëˈë nˈaxäjëmë pënaty miindëp reunyonk oy mä tsyoondë, oy tmëdattëdë myeeny sentääbë o kyaj, ets oy wiˈix të yaak të pyattë (Sant. 2:​1-4, 9). Per ¿wiˈixën mbäät nyajnigëxëˈkëm ko ntsojkëmë jäˈäy? Min nˈokˈijxëm.

15, 16. ¿Tijatyën mbäät nduˈunëm parë oy nyayjyawëdët pënaty jemy nëjkxtëp mä ja reunyonk?

¹⁵ Ta jäˈäyëty mëdiˈibë nëjkxtëp reunyonk mët ko jeˈeyë tnijawëyäˈändë wiˈix jap nˈëxpëjkëm o waˈan yëˈë të wyoyëty tuˈugë nmëguˈukˈäjtëm mëdiˈibë wiinktsoow tsoˈomp. Pääty, ko nˈijxëm tuˈugë jäˈäy jyaˈty mä reunyonk mëdiˈibë kyajnëm tyimnëjkxy, nˈokˈagëˈë nˈokˈaxäjëm tsuj yajxon o nˈokninëjkxëm parë tuˈugyë mëët nˈunyaˈayëm, ndukˈijxëmë ja Biiblyë o ja ëxpëjkpajn mëdiˈibë jam yaˈëxpëjkp o mbäät nanduˈun nmoˈoyëm. Nˈokˈijxëm nanduˈun tijaty mbäät nˈaktuˈunëm ets oy tsuj nyajnayjyäˈäwëm ets kyaj nyajtsipkaˈxëm. Ixtëm nˈokpëjktakëm, tuˈugë yeˈeytyëjk mëdiˈibë ojts nyijkxy mä reunyonk, tsoytyuun ko jap jyajty mët ko duˈun nyayjyäˈäwë ko kyajë nety oy të nyaywyit të nyayxyoxyëty, per ja nmëguˈukˈäjtëm mëdiˈibë ojts yˈagëˈë yˈaxäjëty ta yˈanëmääyë ko kyaj wiˈix nyayjyawëdët mët ko Jyobaa tyestiigëty adëyë nyaywyit nyayxyoxëdë. Ko tiempë nyajxy, ta yäˈädë yeˈeytyëjk nyëbejty ets mëdiˈibë ninäˈä tkajäˈäytyëgooy yëˈë wiˈix ja nmëguˈukˈäjtëm ojts yˈagëˈë yˈaxäjëty. Oy ko njäˈäyˈäjtëm ajëëky amëguˈuk ko myinëdë jäˈäy reunyonk, per nˈoknaygyuentëˈäjtëm tijaty nyajtëˈëw nyajtudakëm net kyaj axëëk nyayjyawëdët (1 Peed. 4:15).

¹⁶ ¿Tijaty mbäät nˈaktuˈunëm parë ja jäˈäy oy nyajnayjyäˈäwëm? Oy ko nyaˈijxëm ja mayˈäjt wintsëˈkënë ko nimaytyakëm pënaty kyaj tyestiigëty o tijaty myëbëjktëp, ets oy ko nanduˈun nguentëˈäjtëm ja ääw ayuk ko ngomentaräjtëm reunyonk o nanduˈun pën jam xypyatëm nyajnäjxëm tuˈugë asignasyonk (Titʉ 2:8; 3:2). Kyaj nyajpëtsëˈëmëm ja ääw ayuk mëdiˈibë ja jäˈäy mbäät wiink yajnayjyawëty etsë net kyaj yˈoknëjkxanët reunyonk. Ixtëm nˈokpëjktakëm, kyaj yˈoyëty nimaytyakëm axëëk tijaty ja jäˈäy myëbëjkypy (2 Kor. 6:3). Ets pënaty diskursaräjttëp oy ko tkuentëˈatët mëk ja yˈääw yˈayuk, nan oy ko tˈixtët pënaty jam yajpattëp parë dyajtunët ja ääw ayuk mëdiˈibë mbäät ja jäˈäy tjaygyukëdë. Ets pën yajtunaampy ja ääw ayuk mëdiˈibë jeˈeyë ëjtsäjtëm njaygyujkëm oy ko tnimaytyäˈägët, net tjaygyukëdët pënaty näämnëm miindëp.

17. ¿Tii mbäät nduˈunëm ko nbatëm tuˈugë jäˈäy mëdiˈibë jyantsy yˈoymyëdoobyë ja Diosë yˈääw yˈayuk?

¹⁷ Tuˈuk tuˈugë xëëw nyaxy, tsojkëp niˈigyë ndukjotëgoˈoyëm mä nˈëwäˈkx ngäjpxwäˈkxëm ja Diosë yˈääw yˈayuk, pes nbäädäˈänëm “pënaty jënandëp ja yˈääw jyot ko kyupëkandëp ja jikyˈäjtënë xëëmëkyëjxmbë” (Apos. 13:​48, TNM). Pääty pën nbatëm tuˈugë jäˈäy mëdiˈibë yˈoymyëdoopy ja Diosë yˈayuk, oy ko ënetyë nyaˈëxpëjktsoˈonëm ets nwoˈowëm reunyonk. Duˈun nbudëjkëm ets tˈyeˈeyët ja nëˈë tuˈu mëdiˈibë nëjkxp mä “ja jikyˈäjtënë winë xëë winë tiempë” (Mat. 7:14).