Kyaj yˈoktuunë mä kanäägë it lugäär | ¿Wiˈixë Biiblyë tnimaytyaˈaky?

•  “China nëgoo mëk yˈokˈäänë ets tyam myëdëgëk jëmëjt mä kyaj nëgoo yˈoktuunë” (The Guardian, 7 äämbë septiembrë 2022).

•  “Tam nyëjkxnë naa mëgoxk jëmëjtën mä kyaj yˈoktuunë mä näägë lugäär mëdiˈibë África” (Noticias ONU, 26 äämbë agostë 2022).

•  “Jap Europa naa kujkwaˈkxynyaxyë it lugäär mä kyaj yˈoktuunë, ets tyam myëgoxk mëgoˈpx jëmëjtën mä kyajnëm duˈun tyim tuny tyim jatyëty” (BBC News, 23 äämbë agostë 2022).

Mayë ëxpëkyjyaˈaytyëjk jyënäˈändë ko niˈigyë mëk yˈananë. ¿Mbäädëdaa yˈoyë yäˈädë jotmay? ¿Wiˈixë Biiblyë tnimaytyaˈaky?

Ko mëk jyantsy yˈany ets tijatyë Biiblyë ojts tnaskäjpxë

Yäˈädë ojts yajnaskäjpxë tyunäˈäny jyatäˈänyëty mä ndiempëˈäjtëm:

•  “Mäjatyë nax käjpn myinët ja yuu” (Lukʉs 21:11).

Ko mëk jyantsy yˈany, ta yˈamääytyëkë jeˈxy pëky ets ta net jyaˈˈatyë yuu. Ets duˈunën ojts yajnaskäjpxë ko jyaˈˈatäˈänyë yuu, oˈk tëgoˈoyën etsë ayoˈon jotmay (Diˈibʉ Jatanʉp 6:6, 8).

¿Per tidaa ko kyaj nëgoo yˈoktuunë?

Biiblyë nyimaytyakypy tiko dyuˈunëty, jap jyënaˈany:

•  “Kyaj yëˈë pyaatyëtyë naxwinyëdë jäˈäy mëdiˈibë tuˈuyeˈepy, këˈëm nyaynyëˈëmoˈoy nyaytyuˈumoˈoyëdët” (Jeremías 10:23).

Yäˈädë yëˈë yˈandijpy ko naxwinyëdë jäˈäy këˈëm nyaynyëˈëmoˈoy nyaytyuˈumoˈoyëdë kyaj yˈoybyëtsëmy. Tijaty yëˈë tyuundëp niˈigyë dyajwindëgoyë naxwinyëdë ets pääty të yˈäänëˈk të tyëëtsëˈknë.

•  Mayë ëxpëkyjyaˈaytyëjk jyënäˈändë ko jäˈäy këˈëm të dyajwindëgoytyë naxwinyëdë. Ets päätyën kyaj yˈoktuunë mä kanäägë it lugäär.

•  Mä tyam yˈakjaˈˈatynyëmë nëë waˈan nëjkx näˈä tyëtsnë. ¿Tiko? Mët ko naxwinyëdë jäˈäy niˈigyë tijaty tˈatsojknëdë, pääty dyajkutëgoonyëdë ääy kepy, dyaˈˈaxëëgëdë it naxwinyëdë ets kyaj oy dyajtundë tijaty jaˈäjtp yä Naxwiiny.

Perë Biiblyë xyjyotkujkmoˈoyëm.

¿Waˈandaa nëjkx näˈä yˈoyë yäˈädë jotmay?

Biiblyë wyandakypy ko Dios yaˈoyëyaambyë jatëgok yäˈädë Naxwinyëdë. ¿Wiˈix duˈun ttunäˈäny?

1. 1. Dios yajkutëgoyaampy pënaty “yajmäˈttëp ja naxwinyëdë” (Apocalipsis o Diˈibʉ Jatanʉp 11:18). Nëjkxëp dyajkutëgoy ja axëkjäˈäytyëjk ets pënaty yajwindëgooytyëp ja it naxwinyëdë (2 Timoteo 3:1, 2, TNM).

2. 2. ‘Nëëjotm yˈawimbitäˈäny mä käˈäp ja nëëjën’ (Isaías 35:1, 6, 7, Tios yˈaaw yˈayuk). Dios yaˈoyëyaambyë it naxwinyëdë ets dyajjëmbitäˈäny extëm tuˈugë lugäärë tsujpë mä nëjkx jyamˈatyë kom nëë.

3. 3. “Mijts mguentˈäjtypyë naxwinyëdë, ko xyaˈity xyajwindëy mëjwiin kajaa ets jantsy xuˈkx” (Salmo 65:9). Mä tiempë myiny kyëdaˈaky, Dios yajjämˈataampy mayë jëˈxy pëky yä Naxwiiny etsë kom nëë.