¿Tëyˈäjtën ko Jyobaa tyestiigëty kyaj oy mëët nyekyˈittë pënaty të yaˈëxkaxtë mä ryelijyonk?
Duˈunyëmëts nmëgäjpxtë pënaty të nyëbattë extëmë Jyobaa tyestiigë, oy kyanekykyäjpxwäˈkxtë ets oy kyanekynyëjkxtë mäts nduˈukmuktë. Niˈigyëts nmëjääwmoˈoytyë parë jyëmbittët ets kyaj tmastuˈuttëdë Dios.
Ko tuˈugë Jyobaa tyestiigë tyuundëgoy mëjwiin kajaa, mbäät yaˈëxkexy mä ja tuˈukmujkën. Per kyaj netyë yaˈëxkexy, jaanëm yaˈëxkexy pën duˈunyëm pyokytyuunˈadëˈëtsy, pën kyaj tmëmëdoy extëmë Biiblyë jyënaˈany ets pën kyaj jyodëmbity. Duˈumbë jäˈäy kyaj mbäät oy nyekyˈity mët ja myëguˈuktëjk, pesë Biiblyë jyënaˈany: “Ëxwojpëtsëmdë tadë pekytyuumbë mä miitsëty” (1 Korintʉ 5:13).
¿Ti tuun jäjtëp pën yëˈë yaˈëxkajxp ja yetyëjk, per ja nyëdoˈoxy ets ja yˈuˈunk duˈunyëm Tyestiigëˈattë? Duˈunyëm nyaymyëguˈukˈatëdë, oy kyaj tuˈugyë nyekyDiosmëdundë. Duˈunyëm yˈity tuˈugyë mët ja kyudëjk ets ja uˈunk ënäˈk duˈunyëm oy yˈittë mët ja tyeety.
Pënaty të yaˈëxkaxtë, mbäät nyëjkxtë mäts nduˈukmuktë, ets pënaty tuundëp mëjjäˈäy mä ja tuˈukmujkën, mbäät pyudëkëdë parë jatëgok oy yˈittët mëdë Dios. Ko duˈun yajpudëkëdë, yëˈë parë jatëgok Tyestiigëˈattët. Ko jyodëmbittë pënaty të yaˈëxkaxtë, kyaj axëëk nyekyjukyˈattë ets dyajnigëxëˈëktë amumduˈukjot ko duˈun jyukyˈattë extëmë Biiblyë tniˈanaˈamë, mbäät jatëgok yajkupëky extëmë Jyobaa tyestiigë.