Niˈamukë ninuˈun nDiosmëduˈunëm kyaj mbäät yëˈëyë ndukjotkujkˈäjtëm ko të nnijäˈäwëm ja tëyˈäjtënë wingëjxypyë. Tsojkëbën njaygyujkëm “ja këkpë nimëjääbë wyinmäˈäny ja Dios” ets xytyukpudëkëyäˈänëm ja myëjääw (1 Kor. 2:​9, 10). Pääty, oyxyëp ko xytyuknibëjktäägë parë mˈëxpëkët naytyuˈuk ets niˈigyë xymyëwingonëdë Jyobaa. Taaˈäjtp kanäk pëky wiˈix mbäät duˈun xytyuny. Extëm nˈokpëjktakëm, mbäät xypyayeˈey wiˈixë Jyobaa ttukˈijxy tëëyëp pënaty mëduunëdë ko tsyojkypy, ets wiˈix nanduˈun tyam mdukˈixyëty ko mtsojkëp. Mbäät nanduˈun xyˈëxpëky wiˈixë Jyobaa ojts ttukˈaneˈemy ja israelitëty parë yˈawdatëdët ets wiˈix ttsoky parë tyam yaˈˈawdatët. O mbäät nanduˈun xyˈëxpëky këkpäät wiˈix yˈadëëy tijatyë nety të yajnaskäjpxë mä Jesus ko myiiny yä Naxwiiny. Seguurë ko mdukxondäˈägaampy ko duˈun xypyayeˈeyët mä Índice de las publicaciones Watch Tower ets mä foyetë Naybyudëkë parë tijaty tpayoˈoytyëdë Jyobaa tyestiigëty. Ko duˈun mˈëxpëkët, mbudëkëyanëp parë niˈigyë mëbëjkën xyajkëktëkët ets “nëjkx xypyaatyë Diosë yˈëxpëjkën” (Prov. 2:​4, 5). w23.10 paj. 18, 19 parr. 3-5

Extëmë apostëlë Pedro jyënany, mä ayuk grieegë yëˈë myaytyäˈägaampy ko nyaˈijxëm ja tsojkën “kajabäät”. Myëmajtsk pëky, ta net tnigajpxy ko pën nmëdäjtëmë duˈumbë tsojkën, ta nbokymyaˈkxëm ja nmëguˈukˈäjtëm. Nˈokpawinmäˈäyëm ko xymyëdaty tuˈugë meesë mëdiˈibë kanäk pëky të yˈaxëëgë, ta xywyinbaˈanë parë kyaj kyëxëˈëgët mäjaty të yˈaxëëgë. Nanduˈunën jyaty mët ëtsäjtëm, ko ntsojkëm ja nmëguˈukˈäjtëm, mbäät nmaˈkxëm ja pyoky kyaytyey. Ko mëk ntsojkëmë nmëguˈukˈäjtëm, yëˈë xypyudëkëyäˈänëm parë net nbokymyaˈkxëm, oy näˈäty xytsyiptakxëm duˈun nduˈunëm (Col. 3:​13, TNM). Pääty ko nbokymyaˈkxëm ja nmëguˈukˈäjtëm, ta nyajnigëxëˈkëm ko mëk ntsojkëm ets ko nyajxondäˈägäˈänëmë Jyobaa. w23.11 paj. 11, 12 parr. 13-15

Ko nety ja rey Josías 26 jyëmëjt, ta dyaˈˈaˈoˈoyëdë ja templë. Ets mä nety jam yaˈˈagojë, ta jap “yajpaty ja Jyobaa Ley mëdiˈibë yajmooyë Moisés”. Ko ojts yajtukwingugäjpxë, ta netyë duˈun ttuuny extëmë nety jap jyënaˈany (2 Crón. 34:​14, 19-21). ¿Mtsojkënyëˈajtypy xykyäjpxäˈänyë Biiblyë? Pën jam xykyajpxy, ¿mdukxondakypy? ¿Ti mduumpy ko xykyajpxy tuˈugë tekstë mëdiˈibë mˈoymyëdoopy? Ko netyë Josiásë jyëmëjt naa 39, kyaj tmëmëdooyë Jyobaa extëm nyëˈëmooy tyuˈumooyë. ¿Wiˈix wyimbëtsëëmy? Oˈk tëgooy, kyaj ojts ttukˈijxpetyë Jyobaa, këˈëm nyaytyukˈijxpajtë (2 Crón. 35:​20-25). ¿Ti xytyukniˈˈijxëm ja yˈijxpajtën? Ko duˈunyëm mbäät ndukˈijxpajtëmë Jyobaa oy nuˈun ja xëëw jëmëjt nmëdäjtëm ets oy jeky kujk nˈëxpëjkënë Biiblyë. ¿Ti xypyudëkëyäˈänëm? Ko nmënuˈkxtakëm parë xynyëˈëmoˈoy xytyuˈumoˈoyëm, nˈëxpëjkëmë Biiblyë ets njaygyujkëm wiˈix ja nmëguˈukˈäjtëm xyˈëwij xykyäjpxwijëm mëdiˈibë oy Diosmëduundëp. Ko duˈun nduˈunëm, tsip nëjkx nëˈëdëgoˈoy nduˈudëgoˈoyëm ets nëjkxëp njukyˈäjtëm agujk jotkujk (Sant. 1:25). w23.09 paj. 12 parr. 15, 16