Mä Biiblyë yajmaytyaktëbë toxytyëjkjäˈäyëtyë yˈijxpajtën mëdiˈibë myëduundë Jyobaa ets tsyojktë. Yëˈëjëty ojts ‘mëdëy tyuˈuyeˈeyëty ets oy winë ttunëty’ (1 Tim. 3:11). Seguurë ko mä nduˈukmujkëm tapë nmëguˈukˈäjtëm mëdiˈibë oy Diosmëduundëp ets mbäät mbudëkëty mëjwiin kajaa ja yˈijxpajtën. Pën mdoˈoxyˈënäˈkˈäjtp oy ko xyˈixët tuˈugë nmëguˈukˈäjtëm mëdiˈibë mëjjäˈäy mëˈˈënäˈk ets jantsy oyë Jyobaa tmëduny ets nanduˈun mDiosmëdunët. Parë duˈun xytyunët, oy ko xyˈixët tijaty mdukˈoyˈijxypy ets nanduˈun mjäˈäyˈatët. Oy ko mˈitët yujy tudaˈaky. Pes ja toxytyëjk mëdiˈibë yuj tudaˈaky oy yˈity mëdë Jyobaa ets nanduˈun mëdë myëguˈuktëjk. Extëm nˈokpëjktakëm kom yujy tudaˈaky ets tsyojkypyë Jyobaa, päätyën tmëmëdoy ja anaˈamën mëdiˈibë yëˈë të dyajnaxkëdaˈaky mä tnigajpxy pën nyikëjxmˈäjtypy ja tuˈukmujkën etsë familyë (1 Kor. 11:3). w23.12 paj. 18, 19 parr. 3-5

Jyobaa tsyojkypy parë yetyëjk kasäädëty ttsoktët ja kyujëën kyudëjk, tmoˈoyët tijaty yajtëgoyˈajtypy, oy mëët yˈit tsyëënët ets tpudëkët parë tmëwingonëdë Jyobaa. Ko oy mjäˈäyˈatët, yëˈë mbudëkëyanëp parë oy tijaty xytyunët, xymyëjˈix xymyëjpëjktäˈägët ja toxytyëjk ets myajtukjotkujkˈattët. Ko nety të mbëjknë, mbäädë net ja mˈuˈunk mˈënäˈk xymyëdaty. Ets mbäät mbudëkëtyë Jyobaa yˈijxpajtën parë xynyijawët wiˈixën oy mˈuˈunkteetyˈatët (Éfes. 6:4). Jyobaa ojtsë yˈUˈunk tˈanëëmë ko mëkë nety ttsoky ets ko kyupëjkypy (Mar. 1:11). Pën mbatypyë mˈuˈunk mˈënäˈk, oy ko xyˈanëëmëdët ko mëk xytsyoktë ets mëjkuˈëw mëjkugäjpxëdë ko oy tijaty ttundët. Ja uˈunktääk uˈunkteety mëdiˈibë pyanëjkxëdëbë Jyobaa yˈijxpajtën, pyudëjkëdëp ja yˈuˈunk yˈënäˈk parë oy Diosmëdundët. ¿Ti mbäät xytyuny desde tyam parë oy mˈuˈunkteetyˈatët? Ko tsuj yajxon xyˈijxˈit xykyuentëˈatëdë mfamilyë, ja nmëguˈukˈäjtëm mëdiˈibë mëët tuˈugyë nˈëxpëjkëm ets xyˈanëëmëdët ko mtsojktëp ets myajtsobattëp (Fwank 15:9). w23.12 paj. 28, 29 parr. 17, 18

Tyam niˈamukë nbatëmë amay jotmay ets nyubajt nbäˈämbajtëm, per nanduˈunë jäˈäy xytyukmëtsipˈäjtëm ko nDiosmëduˈunëm o xynyibëdëˈkëm. Jyobaa nyasˈijxëp parë nbatëmë amay jotmay, per xytyukwandakëm ko xypyudëkëyäˈänëm (Is. 41:10). Ko nnijäˈäwëm ko Jyobaa xëmë xypyudëkëyäˈänëm, mbäät duˈunyëm nyajpatëm agujk jotkujk oy nwinguwäˈkëmë amay jotmay. Jyobaa yëˈë xywyinmäˈänymyoˈoyäˈänëm parë nduˈunëm mëdiˈibë oybyëtsëmëp ets ninäˈä ngamastutëm, ets xytyukwandakëm ko xymyoˈoyäˈänëm ja “yˈagujkˈäjt jyotkujkˈäjtën” (Filip. 4:​6, 7). Ko oy nˈijtëm mëdë Jyobaa, yëˈë xyajnayjyäˈäwëm agujk jotkujk. Nëgooyë yˈoyˈäjnë ko xymyoˈoyëmë yˈagujkˈäjt jyotkujkˈäjtën, “diˈibë waanë niˈigyë myëjjëty këdiinëm diˈibë jäˈäy mbäät tjaygyukë”. ¿Të näˈä janääm jatsojkë Jyobaa xyˈokmënuˈkxtakpë ets ko waanë yˈity ta kyujkë ja mˈääw mjot? Ko duˈun mnayjyawëty yëˈëjën ko Jyobaa të mmoˈoyëty ja “yˈagujkˈäjt jyotkujkˈäjtën”. w24.01 paj. 20 parr. 2; paj. 21 parr. 4