Pën jeˈeyë ntsojkëm winˈixy wingexy ja nmëguˈukˈäjtëm kyaj nety nguytyuˈunëm extëmë Jesus ojts tniˈanaˈamë. Per näˈäty mä nduˈukmujkëm, mbäät jyapˈatyë nmëguˈukˈäjtëm mëdiˈibë niˈigyë nˈoyjyäˈäwëm, duˈun extëmë Jesus tam ja yˈapostëlë mëdiˈibë yˈoyjyäˈäwë (Fwank 13:23; 20:2). Perë apostëlë Pedro ojts tnigajpxy ko jëjpˈam ets niˈamukë ja nmëguˈukˈäjtëm ntsojkëm extëm jyawë ndukkaˈaxˈäjtëm (1 Peed. 2:17). Pedro duˈun jyënany: “Mët winë mjot mnaytsyokëdët nixim niyam, extëm jyawë mdukkaˈaxˈattë” (1 Peed. 1:22). Ko duˈun jyënany, yëˈëjën myaytyäˈägan ko tsojkëp niˈamukë jäˈäy ntsojkëm axtë mëdiˈibë xytsyiptakxëm. Extëm nˈokpëjktakëm, ko tuˈugë nmëguˈukˈäjtëm axëëk xyajnayjyäˈäwëm o axëëk xytyuˈunëm, tsiptakp ntsojkëm ets nanduˈun ndukmëjëmbitäˈänëm, perë Pedro ttukniˈˈixë Jesus ko Jyobaa kyaj tkupëkäˈäny ko duˈun njäˈäyˈäjtëm (Fwank 18:​10, 11). Päätyë Pedro tkujäˈäyë: “Ninäˈä xykyayajjëmbittët axëëk ko pën axëëk mdunëdët, es ni xykyaˈoojëmbittët ko pën mˈoojëdët. Nik niˈigyë kunuˈxtë” (1 Peed. 3:9). Pën mëk ja mjëëky mmëguˈuk xytsyoky, ta mˈoyjyaˈaytyäˈägäˈäny mët oytyim pënëty. w23.09 paj. 28, 29 parr. 9-11

¿Këdii xyajmonyˈijx xyajmonyjyäˈäwëm ko ënäˈkuˈunk pojˈam yaˈkˈabety? Duˈun yaˈixy ko kyaj jyawë të nyimëjääwdaˈaky, per mä nDiosmëduˈunëm nimëjääwdakp. Tsojkëp nduˈunëmë mëjääw parë oy nˈijtëm mëdë Dios (1 Kor. 13:11; Eb. 6:1). Parë niˈigyë nmëwingoˈonëm, jëjpˈam ets oy mëët nˈijtëm. Mbäät xypyudëjkëm ja yˈespiritë santë parë oy njäˈäyˈäjtëm, nnayjyëjpˈijxëm ets oy tijaty nduˈunëm mä tiempë myiny kyëdaˈaky (Prov. 1:5). Jyobaa yëˈë ojts dyajkojˈyë yetyëjk etsë toxytyëjk (Gén. 1:27). Per extëm nˈijxëm, tim tëgatsy ojts dyajkojˈyë yetyëjk mëdë toxytyëjk. Extëm nˈokpëjktakëm Jyobaa ojts xyajkojëm parë wiˈixëm ja tuunk nduˈunëm ets pääty tëgatsyaty ja wijyˈäjtën nmëdäjtëm (Gén. 2:18). w23.12 paj. 18 parr. 1, 2

Jesus tsyojk etsë jäˈäy ttukmëgäjpxtëdë Diosë xyëëw. Mä taabë tiempë pënaty nyiwintsënˈäjttë relijyonk, duˈunë nety jyënäˈändë ko kyaj mbäät dyajtuunëdë Diosë xyëëw mët ko wyäˈätsëty. Perë Jesus yajtuunë Diosë xyëëw mët ko nyijäˈäwëbë nety ko ja wintsëndëjkëty yëˈë duˈun yajnaxkëdaktëbë anaˈamën ets kyaj mä myiny mä Biiblyë. Extëm tëgok, ko Jesus ojts dyajtsoˈogyë jäˈäy mëdiˈibë netyë kaˈoybyë të tyuktëkëty, ta ja jäˈäy nyayˈatsëˈëk nyayˈajäˈäwëdë ets tˈanmääytyë Jesus parë wiinktsoow nyëjkxët (Mar. 5:​16, 17). Per komë Jesus tsyojkypyë nety ets ja jäˈäy tnijawëdët pënën Jyobaa, pääty ojts tˈanëëmë ja jäˈäy mëdiˈibë nety të dyaˈˈagëdaˈaky ets tnimaytyäˈägët ti netyë Jyobaa të tyukmëdunyëty ets kyaj yëˈë tnimaytyäˈägët ti Jesus të tyukmëdunyëty (Mar. 5:19). Jesus mëdiˈibë nReyˈäjtëm, tsyojkypy ets niˈamukë jäˈäy nduknijäˈäwëm ti Dios txëwˈaty (Mat. 24:14; 28:20). Ko duˈun nduˈunëm, agujk jotkujk nyayjyawëty. w24.02 paj. 10 parr. 10