ARTIKULO MËDIˈIBË YAˈËXPËJKP 46
Jyobaa wyandakypy ko Naxwinyëdë dyajjëmbitäˈäny jantsy oy jantsy tsuj
‘Ko ënety pën mä ja nax käjpnën tˈamdoy ja naygyunuˈkxë, Dios yˈamdowëp, mëdiˈibë tëyˈäjtën winë tyuumbyën’ (IS. 65:16, TY).
ËY 3 Mijts xyjotmëkmoopy ets xymyëjääwmoopy
MËDIˈIBË YAJNIMAYTYÄˈÄGÄÄMPa
1. ¿Ti xytyukˈijxëm extëm ja kugajpxy Isaías tˈanmääy ja israelitëty?
JA KUGAJPXY Isaías jyënany ko Jyobaa, yëˈë tuˈugë Dios ‘mëdiˈibë tëyˈäjtën winë tyuumbyën’. Ko mä ayuk ebreo jyënaˈany “tëyˈäjtën”, yëˈë yˈandijpy “amenk” (Is. 65:16, TY). Etsë yäˈädë ayuk amenk ja nyikejy “duˈunˈatëbë duˈun” o “seguurë dyuˈunˈatët”. Mä Biiblyë kanäkˈok dyajtunyë yäˈädë ayuk ets yëˈë xytyukˈijxëm ko extëmë Jyobaa mëdë Jesus jyënäˈändë o tijaty ttundë, tëyˈäjtën yëˈë. Pääty extëmë Isaías tˈanmääy ja israelitëty yëˈë xytyukˈijxëm ko Jyobaa xëmë tkuytyuny tijaty nyaskäjpxëp ets të dyajnigëxëˈëky ko kyuytyuundaapy tijaty wyandakypy.
2. ¿Tiko mbäät nˈijtëm seguurë ko Jyobaa kyuytyunaampy tijaty të twandaˈaky mä tiempë myiny kyëdaˈaky? ¿Tijaty nnimaytyäˈägäˈänëm mä yäˈädë artikulo?
2 Ets ëtsäjtëm, ¿mbäädëdaa nmëbëjkëm tijatyë Jyobaa të twandaˈaky mä tiempë myiny kyëdaˈaky? Të nety nyäjxnë naa 800 jëmëjt mä duˈunë kugajpxy Isaías tkujäˈäyë ko apostëlë Pablo tnimaytyaky tiko mbäät nˈijtëm seguurë ko Jyobaa kyuytyunaampy tukëˈëyë tijaty të twandaˈaky. Duˈun jyënany: “Kyaj mbäädë Dios yˈandaˈaky” (Eb. 6:18). Extëm nˈokpëjktakëm, mä nëë myuxy mëdiˈibë päˈäk kyaj mbäät jap nanduˈun pyëtsëmy mëdiˈibë täˈämts. Nanduˈun jyaty mëdë Jyobaa, yëˈë tuˈugë Dios mëdiˈibë nyigajpxypy ja tëyˈäjtën ets tsip wyinˈëënët. Pääty, mbäät amumduˈukjot nmëbëjkëm ko Jyobaa kyuytyunaampy tukëˈëyë tijaty të twandaˈaky mä tiempë myiny kyëdaˈaky. Mä yäˈädë artikulo nnimaytyäˈägäˈänëm tijatyë Jyobaa të twandaˈaky ttunäˈäny, ets tijaty të ttuny parë xytyukˈijxëm ko kyuytyunaambyë yˈayuk.
¿TI JYOBAA TË TWANDAˈAKY?
3. 1) ¿Tijatyë Jyobaa të twandaˈaky ttunäˈäny mëdiˈibë niˈigyë agujk jotkujk xyajnayjyäˈäwëm? (Diˈibʉ Jatanʉp 21:3, 4). 2) ¿Wiˈix näägë jäˈäy jyënäˈändë ko ndukwingugäjpxëmë yäˈädë tekstë?
3 Min nˈoknimaytyakëm tuk pëky mëdiˈibë Jyobaa të twandaˈaky ttunäˈäny mëdiˈibë agujk jotkujk xyajnayjyäˈäwëm (käjpxë Diˈibʉ Jatanʉp 21:3, 4). Jyobaa duˈun twandaˈaky: “Kyaj yˈokˈijnët ja oˈkën, jëˈëy yaxën o ja pëjk adoˈonën”. Ko nëjkxëm ëwäˈkx käjpxwäˈkxpë, xëmë nyajtuˈunëmë yäˈädë tekstë parë njotkujkmoˈoyëmë jäˈäy ets parë ndukmëtmaytyakëmë wiˈixën njukyˈatäˈänëm mä ja tsujpë it lugäär. ¿Wiˈix näägë jäˈäy jyënäˈändë ko ndukwingugäjpxëmë yäˈädë tekstë? Ta mëdiˈibë jënandëp ko oy jyayajmëdoy, per tsip duˈun tyun jyatëdët.
4. 1) Oknigäjpx majtsk pëky ti netyë Jyobaa nyijäˈäwëp. 2) ¿Ti Jyobaa të ttuny parë mbäät nmëbëjkëm tijaty të twandaˈaky?
4 Ko Jyobaa twinmäˈänymyooyë apostëlë Juan parë duˈun tkujäˈäyë, nyijäˈäwëbë nety ko yëˈë nˈëwäˈkxäˈän ngäjpxwäˈkxäˈänëm ko myiny kyëdaˈaky ja oybyë jyukyˈäjtën. Ets ko mayë jäˈäy kyaj tmëbëkäˈändë ko ak “jemy” tijaty dyajjëmbitäˈäny (Is. 42:9; 60:2; 2 Kor. 4:3, 4). Pääty, ¿wiˈixë net mbäät nbudëjkëmë jäˈäy parë tmëbëktët ko adëwäämp tijaty ojts yajnaskäjpxë mä Diˈibʉ Jatanʉp 21:3, 4? Ets ëtsäjtëm, ¿ti mbäät nduˈunëm parë niˈigyë nmëbëjkëm tijatyë Jyobaa të twandaˈaky? Jyobaa kyaj jeˈeyë të xytyukwandakëm ko miimp këdakpë oybyë jukyˈäjtën, të nanduˈun tnigajpxy tiko mbäät nmëbëjkëm. Min nˈokˈijxëm tuk pëky majtsk pëky.
JYOBAA WYANDAKYPY KO ADËWÄÄMP TIJATY TË TTUKNIBËJKTÄÄGË
5. ¿Mëdiˈibë tekstë xytyukˈijxëm ko mbäät nmëbëjkëm ko Jyobaa kyuytyunaampy tijaty të twandaˈaky, ets wiˈix jap jyënaˈany?
5 Mä Biiblyë nyigajpxypy tiko mbäät nmëbëjkëm ko Jyobaa jyantsy yajjëmbitaambyë yäˈädë it lugäär jantsy tsuj. Pes jap tuk pëky jyënaˈany: “Net ja diˈibë unyaapy mä yajkutiky jyënany: Ëjts nyajkejpy tëgekyë ak jemy. Nandëˈën jyënany: Këxjäˈäy, mët ko tyäädë diˈibëts ngajxypy, tëyˈäjtënëˈë es mbäät xymyëbeky. Të net yajkuytyuundäˈäy. Ëjtsë dëˈën extëm ja A es extëmë Z, ëjtsë dëˈën ja jawyiimbë es ja tim okpë” (Diˈibʉ Jat. 21:5, 6).
6. ¿Tiko niˈigyë dyajkëktëkë mëbëjkën extëm jyënaˈanyë Diˈibʉ Jatanʉp 21:5, 6?
6 ¿Wiˈixë yäˈädë tekstë xypyudëjkëm parë nmëbëjkëm ko Dios kyuytyunaampy tijaty të twandaˈaky? Extëm jyënaˈanyë yäˈädë tekstë, duˈunxyëp extëmë Jyobaa tfirmaraty tuˈugë neky etsë net dyajtäˈtspëky parë xytyukˈijxëm ko kyuytyunaampy tijaty të twandaˈaky.b Mä Diˈibʉ Jatanʉp 21:3, 4 Dios twandaˈaky ti tyunaampy ets mä bersikulo 5 etsë 6, yëˈë xytyukˈijxëm ko seguurë tkuytyunäˈäny, duˈunxyëp extëm të tfirmaraty. Minë net nˈokˈijxëm tijaty ayuk yajtuumpy mëdiˈibë xytyukˈijxëm ko kyuytyunaampy tijaty të twandaˈaky.
7. Extëm jyënaˈanyë bersikulo 5, ¿pënën jap duˈun jënäämp?
7 Mä bersikulo 5 duˈun jap jyënaˈany: “Net ja diˈibë unyaapy mä yajkutiky jyënany” (Diˈibʉ Jat. 21:5a). Mä yäˈädë tekstë yëˈë këˈëm duˈunë Jyobaa tim jënäämp tëgëkˈok. Yäˈädë yëˈë xytyukˈijxëm ko Jyobaa kyuytyunaampy tijaty të twandaˈaky, pes yëˈë këˈëm duˈun të jyënaˈany. Kyaj yëˈë ojts dyajkajpxy tuˈugë anklës o Jesus. Pääty mbäät nˈijtëm seguurë ko kyuytyunaambyë yˈayuk, pes “kyaj yˈandaˈaky” (Titʉ 1:2). Extëm nˈijxëm mbäät nmëbëjkëm ko jantsy tunan jatanëp extëm jyënaˈanyë Diˈibʉ Jatanʉp 21:5, 6.
“ËJTS NYAJKEJPY TËGEKYË AK JEMY”
8. ¿Wiˈixë Jyobaa jyënaˈany parë xytyukˈijxëm ko kyuytyunaampy tijaty të twandaˈaky? (Isaías 46:10).
8 Jyobaa jyënaˈany: “Ëjts nyajkejpy tëgekyë ak jemy”. Ko duˈun jyënany, yëˈë nety myaytyakypy tijaty tyunaampy mä tiempë myiny kyëdaˈaky. Jyobaa seguurë ko dyaˈˈadëwäˈäny tijaty të twandaˈaky, pääty duˈun tmaytyaˈaky extëmxyëp tyam duˈun ttuny (käjpxë Isaías 46:10).
9. 1) ¿Ti miimp mä winmäˈäny ko nnijäˈäwëmë Dios dyajkojäˈäny “tëgekyë ak jemy”? 2) ¿Wiˈix jyatäˈänyë “tsäjp” etsë “naxwinyëdë” mëdiˈibë ja tyam?
9 Min jatëgok nˈokkäjpxëm wiˈixë jyënaˈanyë Diˈibʉ Jatanʉp 21:5: “Ëjts nyajkejpy tëgekyë ak jemy”. Extëm jyënaˈanyë yäˈädë tekstë, yëˈë xytyukˈijxëm ko majtsk pëky mëdiˈibë Jyobaa tyunaampy, dyajnitëgatsäˈäny ets jatëgok dyaˈoyëyaˈany. Min jawyiin nˈokˈijxëm tiijën yajnitëgatsaampy. Mä Diˈibʉ Jatanʉp 21:1 jyënaˈany: “Jawyiimbë tsäjp esë jawyiimbë naxwinyëdë kyaj määnë”. Ko jyënaˈany “Jawyiimbë tsäjp”, yëˈë yajmaytyakpë gobiernëtëjk mëdiˈibë këˈamˈäjtëdëbë Satanás etsë kyaˈoybyëtëjk (Mat. 4:8, 9; 1 Juan 5:19, TNM). Näˈäty ko mä Biiblyë yajmaytyaˈagyë “naxwinyëdë”, yëˈë yˈandijpyë naxwinyëdë jäˈäy (Gén. 11:1; Sal. 96:1). Pääty ko jyënaˈany “jawyiimbë naxwinyëdë”, yëˈë yajmaytyaktëbë axëkjäˈäytyëjk. Jyobaa kyaj jeˈeyë dyaˈˈaˈoyëyaˈany ja “naxwinyëdë” ets ja “tsäjp”, tyim yajkutëgooyaambyën tukëˈëyë. Ko nety duˈun të ttuny ta net dyajminäˈäny “ja jembyë tsäjp”, jaˈa njënäˈänëm, ja jembyë gobiernë ets ja jembyë “naxwinyëdë” yëˈë ja tuk grupëbë jäˈäy mëdiˈibë Dios myëmëdoowdëp.
10. ¿Wiˈixënë Jyobaa dyajjëmbitäˈäny “tëgekyë ak jemy”?
10 ¿Wiˈixënë Jyobaa dyajjëmbitäˈäny “tëgekyë ak jemy”? (Diˈibʉ Jat. 21:5). Jyobaa yaˈoyëyaampy jatëgokë yäˈädë it naxwinyëdë etsë naxwinyëdë jäˈäy dyajjëmbitäˈäny wäˈätsjäˈäy. Duˈun extëm ojts tnaskäjpxë ja kugajpxy Isaías ko yäˈädë naxwinyëdë jyëmbitäˈäny jantsy oy jantsy tsuj extëm ja it lugäär mëdiˈibë Edén. Ëtsäjtëm nëjkxëp nanduˈun niwij nikajëm. Pesë Jyobaa yaˈijxëˈëgaampy ja jäˈäy mëdiˈibë kyaj yˈixy, yajmëdoowëˈëgaampy ja nat ets ja mëdiˈibë kyaj yeˈey nyaxy yajˈyeˈeyëˈëgaampy, axtë yajjukypyëkaampy pënaty të yˈooktë (Is. 25:8; 35:1-7).
“TËYˈÄJTËNËˈË ES MBÄÄT XYMYËBEKY” ETS “TË NET YAJKUYTYUUNDÄˈÄY”
11. ¿Ti Jyobaa tyukˈanaˈamë Juan, ets tiko?
11 ¿Tiko ja tuk pëky nmëbëjkëm ko Jyobaa kyuytyunaampy tijaty të twandaˈaky? Yëˈko duˈun tˈanmääyë Juan: “Këxjäˈäy, mët ko tyäˈädë diˈibëts ngajxypy, tëyˈäjtënëˈë es mbäät xymyëbeky” (Diˈibʉ Jat. 21:5). Jyobaa kyaj jeˈeyë duˈun ttukujäˈäyë Juan, ojts nanduˈun ttukmëtmaytyaˈaky tiko duˈun tkujayët. Pes duˈun tˈanmääy: “Tëyˈäjtënëˈë es mbäät xymyëbeky”. ¡Jantsy oy ko Juan tmëmëdooyë Jyobaa ets ko duˈun tkujäˈäyë! Pes tyam mbäädë net nnijäˈäwëm ko Dios wyandakypy ja tsujpë it lugäär ets nbawinmäˈäyëm wiˈixën nyajkunuˈkxäˈänëm mä tiempë myiny kyëdaˈaky.
12. ¿Tiko Jyobaa jyënaˈany “Të net yajkuytyuundäˈäy”?
12 Ta netë Jyobaa yˈakjënany: “Të net yajkuytyuundäˈäy” (Diˈibʉ Jat. 21:6). Ko duˈunë Jyobaa jyënaˈany, duˈunxyëp extëm të dyaˈˈadëëwdääynyë tijaty të twandaˈaky ets ko nipën mbäät kyayajtuˈudukyëty parë tkuytyunët tijaty të ttuknibëjktäägë. Minë net nˈaknimaytyakëm tiko mbäät nˈijtëm seguurë ko Jyobaa kyuytyunaampy tijaty të twandaˈaky.
“ËJTSË DËˈËN EXTËM JA A ES EXTËMË Z”
13. ¿Tiko Jyobaa jyënaˈany “Ëjtsë dëˈën extëm ja A es extëmë Z”?
13 Extëm të nˈijxëm, Jyobaa këˈëm tëgëkˈok ojts tmëgajpxyë Juan mä tijaty ttukˈijxy (Diˈibʉ Jat. 1:8; 21:5, 6; 22:13). Ets mä duˈun ojts tmëgajpxy Jyobaa jyënany: “Ëjtsë dëˈën extëm ja A es extëmë Z”. A o Alfa, yëˈë ja tim jawyiimbë letrë mëdiˈibë tyuktsondakypyë abesedaaryë mä ayuk grieegë etsë Z o Omega yëˈë mëdiˈibë tyukjëjpkëjxnëp. Ko duˈunë Jyobaa jyënany, yëˈë yajjaygyukëyanëp ko yajjëjpkëjxypy mëdiˈibë yajtsondakypy.
Jyobaa yajjëjpkëjxypy ko ti dyajtsondaˈaky. (Ixë parrafo 14 etsë 17).
14. 1) ¿Näˈä Jyobaa jyënäˈänäˈäny “Ëjtsë dëˈën extëm ja A es extëmë Z”? Oknimaytyäˈäk mët tuˈugë ijxpajtën. 2) ¿Ti Jyobaa wyandakypy mä Génesis 2:1-3?
14 Ko Jyobaa ojts dyajkojˈyë Adán mëdë Eva, ta ttukmëtmaytyaky ti nety të ttuknibëjktäägë parë naxwinyëdë jäˈäy etsë it Naxwinyëdë. Biiblyë jyënaˈany: “Ta tmoˈoy yëˈë kyënuˈkxën ets tˈanmääy: “Mëëtˈattë ënet mˈuˈunk mˈënäˈkëty yajwinduktë yëˈë naxwinyëdë ets xyˈënaˈamdëty” (Gén. 1:28, MNM). Ko Jyobaa ojts tnigajpxy ti nety të ttuknibëjktäägë duˈunxyëp extëm jyënaˈany Alfa o “A”. Ets ko netyë Adán mëdë Eva ja tyëëm yˈääts mëdiˈibë wäˈäts jäˈäyëty të dyajwindujktäˈäytyë yäˈädë Naxwinyëdë ets dyajjëmbittët extëm tuˈugë it lugäärë tsujpë, jaa mä nëjkxë Jyobaa jyënaˈany Omega o “Z”, mët ko të nety dyajjëjpkëxy ti të ttuknibëjktäägë. Ko ojts dyajkojtäˈäy “ja tsäjp, it Naxwinyëdë ets tukëˈëyë tijaty jamˈäjtp”, ta ttuuny mëdiˈibë yajnigäjpxp mä Génesis 2:1-3 (käjpx), ets duˈun dyajnigëxëˈky ko kyuytyunaampy tijatyë nety të twandaˈaky. Wäˈäts dyajnäjxy ja myëwëxtujk xëëbë. ¿Ti yäˈädë yˈandijpy? Ko ja mä netyë Jyobaa dyaˈˈadëwäˈäny tijatyë nety të ttuknibëjktäägë parë naxwinyëdë jäˈäy etsë it Naxwinyëdë.
15. ¿Tiko mbäät nwinmäˈäyëm ko Jyobaa tsipë nety tkuytyunët tijaty të ttuknibëjktäägë?
15 Ko Adán mëdë Eva tkamëmëdoowdë Jyobaa, ta jyëmbijttë pokyjyaˈay ets nanduˈun ttukninäjxtë ja yˈuˈunk yˈënäˈk ja poky kaytyey (Rom. 5:12). Ko duˈun tyuun jyäjtë, ¿waˈandaa netyë Jyobaa duˈunyëm dyaˈˈadëwäˈäny etsë yäˈädë it Naxwinyëdë yëˈë dyajtuktuktëdë wäˈäts jäˈäy ets mëdiˈibë mëdoowdëp? ¿Waˈandaa Satanás ttukpëtsëëmyë wyinmäˈäny parë Jyobaa kyaj tkuytyunët tijatyë nety të ttuknibëjktäägë? Satanás waˈan wyinmääy ko Dios kyaj mbäät ti tnekytyuny. Jyobaa mbäätxyëp tjayajkutëgooyë Adán mëdë Eva etsë wiinkpë wäˈätsjäˈäy ojts dyajkojy, mëdiˈibë mbäät tkuytyundë tijatyë Jyobaa të ttuknibëjktäägë parë naxwinyëdë jäˈäy. Per koxyëbë Jyobaa duˈun ttuuny, taxyëbë Satanás jyënany ko Jyobaa winˈëˈëmp. ¿Tiko? Yëˈko mä Génesis 1:28, të netyë Jyobaa jyënaˈany ko yëˈë Adán mëdë Eva tyëëm yˈääts yajwindukandëbë it Naxwinyëdë.
16. ¿Tidaa ko Satanás wyinmääy ko Jyobaa kyaj mbäät tnekykyuytyuny tijaty të ttuknibëjktäägë?
16 ¿Wiˈixë Satanás yˈakwinmääy? Waˈan jyënany ko Adán mëdë Eva mbäät tmëdattë yˈuˈunk yˈënäˈk, per ko ninäˈä mbäät kyajëmbittë wäˈätsjäˈäy (Ecl. 7:20; Rom. 3:23). Koxyëp duˈun jyantsy tyuun jyantsy jyäjtë, mbäätxyëbë Satanás jyënaˈany ko Jyobaa ninäˈä mbäät tkatuny tijaty të ttuknibëjktäägë ets ko it Naxwinyëdë ninäˈä mbäät kyatuktuky mëdë wäˈätsjäˈäy.
17. ¿Ti Jyobaa tyuun ko nyibëdëˈkëdë Satanás, Adán mëdë Eva, ets wiˈixë net tijaty kyugëxëyaˈany? (Ix nanduˈunë dibujë).
17 Jyobaa nyijäˈäwëbë nety wiˈix dyaˈˈadëwäˈäny tijaty të ttuknibëjktäägë, oyë Satanás, Adán etsë Eva jyanibëdëˈkëdë (Sal. 92:5). Jyobaa tyuun tijatyë nety të ttuknibëjktäägë mëdë naxwinyëdë jäˈäy, pes nyasˈijxë parë Adán mëdë Eva tmëdattëdë yˈuˈunk yˈënäˈk, duˈunën dyajnigëxëˈky ko kyaj wyinˈëëny ets ko adëëp tijaty nyigajpxypy. Perë Jyobaa yˈëxtääyë winmäˈäny wiˈix mbäät dyaˈˈadëy tijatyë nety të ttuknibëjktäägë ko twinˈijxy tuˈugë “tëëmp ääts” mëdiˈibë nety mbäät dyaˈˈawäˈätspëtsëmy ja naxwinyëdë jäˈäy mëdiˈibë mëdoowdëp (Gén. 3:15; 22:18). Satanás ninäˈä kyawinmääy ko Jyobaa xyaˈˈawäˈätspëtsëmäˈänëm mët yëˈëgyëjxm ko ojts xytyuknigajxëmë yˈUˈunk. Ko duˈun ttuuny, ta dyajnigëxëˈky ko mëkë Jyobaa xytsyojkëm (Mat. 20:28; Fwank 3:16). Satanás kyaj duˈun xytsyojkëm, pes yëˈë këˈëm naymyëmäy naymyëdäjˈyëty. Per, ¿wiˈixën ndukˈoyˈatäˈänëm ko të nyajjuuybyëtsëˈëmëm? Ko nety të yˈabety tuk mil jëmëjt mä Jesus yˈanaˈamäˈäny, ta ja tyëëm yˈäätsë Adán mëdë Eva mëdiˈibë nety të jyëmbijnëdë wäˈäts jäˈäy jyukyˈatäˈändë mä ja it lugäärë tsujpë, duˈun yˈadëwäˈäny mëdiˈibë Jyobaa tyuknibëjktakë. Ets mä taabë tiempë ja nëjkxë Jyobaa jyënaˈany “Omega”.
¿TI MBÄÄT NDUˈUNËM PARË NIˈIGYË NMËBËJKËM TIJATYË JYOBAA TË XYTYUKWANDAKËM?
18. Oknigäjpx tëgëk pëky tiko nˈijtëm seguurë ko Jyobaa kyuytyunaampy tijaty të twandaˈaky (Ix nanduˈunë rekuäädrë “Tëgëk pëky jyaˈˈaty tiko mbäät nmëbëjkëm ko Jyobaa kyuytyunaambyë wyandakën”).
18 Mä yäˈädë artikulo të nˈijxëm tiko mbäät nmëbëjkëm ko Jyobaa jyantsy yajjëmbitaambyë yäˈädë it Naxwinyëdë jantsy tsuj. ¿Tiko? Myëduˈuk, yëˈko Jyobaa yëˈë duˈun këˈëm të twandaˈaky, pes mä Biiblyë jyënaˈany: “Net ja diˈibë unyaapy mä yajkutiky jyënany: Ëjts nyajkejpy tëgekyë ak jemy”. Jyobaa jyantsy kyuytyunaambyën tijaty të twandaˈaky mët ko myëdäjtypyë wijyˈäjtën ets ja mëkˈäjtën parë duˈun ttunët. Myëmajtsk, yëˈko Jyobaa ijtp seguurë ko kyuytyunaampy tijaty të twandaˈaky mët ko duˈun tmaytyaˈaky extëmxyëp jaa duˈun tyuun jyäjtënë. Pääty jyënaˈany: “Tëyˈäjtënëˈë es mbäät xymyëbeky”. Ets yˈakjënäˈäny: “Të net yajkuytyuundäˈäy”. Myëdëgëk, yëˈë ko Jyobaa yajjëjpkëjxypy ti yajtsondakypy. Okˈix wiˈix jyënaˈany: “Ëjtsë dëˈën extëm ja A es extëmë Z”. Jyobaa yajnigëxëˈëgaampy ko Satanás winˈëˈëmp ets ko nitii tkatukˈoybyëtsëmy.
19. ¿Wiˈix mbäät nbudëjkëmë jäˈäy mëdiˈibë tsiptakxëp tmëbëkët ko Jyobaa kyuytyunaampy tijaty të ttuknibëjktäägë?
19 Jamyats ko tëgok tëgokë jäˈäy xytyukmëtmaytyäˈägët ko Jyobaa kyuytyunaampy tijaty yëˈë të twandaˈaky, mbudëkëyanëp nanduˈun parë mëbëjkën kyëktëkët ko Jyobaa jyantsy tyunaambyën duˈun. Pääty ko nety pën xytyukwingugäjpxë Diˈibʉ Jatanʉp 21:4 etsë net mˈatsowëdët “Jantsy oy tyim yajmëdoownë, per tsipë duˈun tyun jyatëdët”. ¿Wiˈix mbäät xyˈanëëmë? Tukwingugäjpxë wiˈix jyënaˈanyë bersikulo 5 etsë 6. Tukmëtmaytyäˈägë jäˈäy ko Jyobaa të twandaˈaky ko jyantsy kyuytyunaampy tijaty të ttuknibëjktäägë ets duˈunxyëp extëm të tfirmaräjnë (Is. 65:16).
ËY 145 Dios të twandaˈaky ja tsujpë it lugäär
a Mä yäˈädë artikulo nˈixäˈänëm ko Jyobaa të xytyukwandakëm ko yäˈädë Naxwinyëdë dyajjëmbitäˈäny extëm tuˈugë it lugäärë tsujpë. Ko niˈigyë jäˈäy ndukmëtmaytyakëm, xypyudëjkëm parë niˈigyë nmëbëjkëm ko Jyobaa jyantsy tyunaambyën duˈun.
b Ixë liibrë Apocalipsis. . . ¡se acerca su magnífica culminación!, pajina 303, parrafo 8 etsë 9.