Mëjjäˈäytyëjkëty, panëjkxëdë yˈijxpajtënë Gedeón

1. Extëm jyënaˈanyë 1 Peedrʉ 5:2, ¿ti tuunk nyikëjxmˈäjttëbë mëjjäˈäytyëjk?

JYOBAA yëˈë të ttuknipëkyë mëjjäˈäytyëjk parë tˈijxˈit tkuentëˈattët ja Diosmëduumbëty. Yëˈë mëjjäˈäytyëjk myëjjäˈäwëdëp ko duˈunë Jyobaa yajtunëdë ets tyuundëbë mëjääw parë yajxon tkuentëˈattë ja myëguˈuktëjk (Jer. 23:4; käjpxë 1 Peedrʉ 5:2). ¡Jantsy oy ko jyaˈˈatyë nmëguˈukˈäjtëm mëdiˈibë mëk tuundëp mä nduˈukmujkëm!

2. ¿Tijaty jotmay näˈäty wyinguwäˈkëdëp pënaty tuundëp mëjjäˈäy?

² Pënaty tuundëp mëjjäˈäy wiˈixëm ja jotmay twinguwäˈägëdë. Extëm nˈokpëjktakëm, mëk tyundë parë tˈijxˈit tkuentëˈattë ja myëguˈuktëjk. Min nˈokˈijxëm wiˈixë Tony tnimaytyaˈaky mëdiˈibë tsënaapy Estados Unidos ets tyuny mëjjäˈäy. Yëˈë pyëjkë kuentë ko kyaj nety mbäät tmëmadaktäˈäy ja tuunk mëdiˈibë yajtuknipëjkp. Yëˈë jyënaˈany: “Ko tsyondakyë COVID-19, niˈigyë yˈamëktaky ja tuunk parë yaˈixët wiˈix yajtunët ja reunyonk ets wiˈix nˈëwäˈkx ngäjpxwäˈkxëm. Ëjts ngupëjktääyëts ja tuunk, per kyajts nmëmadaky nduundäˈäyët. Ok, tats kyaj nëgoo tiempë nekymyëdäjtyë parëts ngäjpxëdë Biiblyë, nˈëxpëkëdëts etsëts nuˈkxtäˈägët”. Ilir, jatuˈugë nmëguˈukˈäjtëm mëdiˈibë tuump mëjjäˈäy ets tsyëënë Kosovo, tëgatsy ja jotmay twinguwäˈkë. Japë nety tsyëënë mä tuˈugë lugäär mä tyunyëtyë tsip ets ojts tsyiptakxëty tkuytyunët wiˈixë nety ja Diosë kyäjpn tyuˈumoˈoyëty. Ilir tnimaytyaˈaky: “Kots nyaˈˈanmääy Betel etsëts nëjkx nbudëkë nmëguˈukˈäjtëm mëdiˈibë tsënääytyëp mä tsip tyunyëty, ojtsëts ntsëˈëgë ets tëgatsyëts nmëdooy tijatyëts yajtukˈanaˈam”. Jatuˈugë nmëguˈukˈäjtëm mëdiˈibë xyëwˈäjtypy Tim ets tyuny misioneerë jap Asia, ojts tsyiptakxëty ttuundäˈäyët tijatyë nety nyikëjxmˈäjtypy. Yëˈë jyënaˈany: “Näˈäty duˈunëts nnayjyäˈäwë ko kyajts nˈokmëmadäˈäganë nˈijxˈit nguentëˈatët ja nmëguˈuktëjk”. ¿Ti mbäät pyudëkëdë mëjjäˈäytyëjk parë duˈumbë jotmay tmëmadäˈäktët?

3. ¿Wiˈix mbäät niˈamukë xypyudëjkëm extëm yajnimaytyaˈagyë Gedeón?

³ Pënaty tuundëp mëjjäˈäy mbäät pyudëkëdë extëm yajnimaytyaˈagyë Gedeón (Eb. 6:12; 11:32). Gedeón ojts tkuentëˈaty ja Diosë kyäjpn ets ojts tnitsiptuny (Juec. 2:16; 1 Crón. 17:6). Pënaty tyam tuundëp mëjjäˈäy, tsojkëp nanduˈun tkuentëˈatët ja Diosë kyäjpn mä yäˈädë tiempë mëdiˈibë tsip nimëjääw ak näjxp (Apos. 20:28; 2 Tim. 3:1). Extëm yajnimaytyaˈagyë Gedeón mbäät xypyudëjkëm, pën nˈijxëm wiˈix tmëmëdooyë Jyobaa, yˈijty yujy tudaˈaky ets wiˈix tmëmadaky ja amay jotmay. Xypyudëkëyäˈänëm nanduˈun parë nyajtsobatëm tijaty tyundëbë mëjjäˈäytyëjk ets parë nˈëygyupëjk ngajpxykyupëjkëm amumduˈukjot (Eb. 13:17).

KO TSYIPTAˈAKY MˈITËT YUJY TUDAˈAKY

4. ¿Wiˈixë Gedeón dyaˈijxë ko yujy tudaˈagyë nety jyaˈayˈaty?

⁴ Gedeón ijt yujy tudaˈaky,b pes ko Jyobaa tyuknigajxë tuˈugë anklës ets yˈanmääyë ko yëˈë nety të yajwinˈixy parë tnitsiptuunët ja israelitëty mä ja Madián jäˈäyëty, Gedeón ta yˈatsooy: ‘Mä Manasés yëˈë jyaˈayën, ëjts niˈik yajpatp ëyoobëjäˈäy ets niwaanë ëjts ndukjëënˈat nduktëjkˈattë ets mätsë njëën ndëjkën ëjts nik tim mutsk’ (Juec. 6:15, TY). Yëˈë duˈunë nety wyinmay ko kyaj tmëmadäˈägët ja tuunk mëdiˈibë yajtuknipëjk. Perë Jyobaa nyijäˈäwëbë nety ko mbäät duˈun ttuny, ets duˈunën ttuuny mët ko Jyobaa pyudëjkë.

5. ¿Naa mbäät tsyiptakxëtyë mëjjäˈäytyëjk yˈitët yujy tudaˈaky?

⁵ Yëˈë mëjjäˈäytyëjk tyuundëbë mëjääw parë yˈittë yujy tudaˈaky (Miq. 6:8; Apos. 20:18, 19). Kyaj nyaymyëjkuˈëw nyaymyëjkugäjpxëdë ko tijaty ttundë ets kyaj nanduˈun wyinmaytyë ko kyaj tii ttsoowˈattë ko jam tii oy tkatundë. Per taaˈäjtpë jotmay mä nyigëxëˈëgäˈäny pën ijttëp yujy tudaˈaky. Extëm nˈokpëjktakëm, mbäät tuˈugë mëjjäˈäy tkupëky kanäägë tuunk, per tsipë net ttuundäˈäyët. Mbäät ja nmëguˈukˈäjtëm myëjkuˈëw myëjkugäjpxëdë ko oy tijaty ttuny o mbäät yˈëbäät kyäjpxpäädëdë. Ko duˈun jyatët, ¿wiˈix mbäät pyudëkëty extëm yajnimaytyaˈagyë Gedeón?

6. ¿Wiˈix mbäädë mëjjäˈäytyëjk nanduˈun yˈittë yujy tudaˈaky extëmë Gedeón? (Ix nanduˈunë dibujë).

⁶ Anëëmë ets pën mbudëkëdët. Ja mëdiˈibë jäˈäyˈäjtp yujy tudaˈaky, nyijäˈäwëp ko yajtëgoyˈajtypyë naybyudëkë. Extëmë Gedeón yujy tudaˈaky yˈijty, pääty tˈamdooyë naybyudëkë ja myëguˈuktëjk (Juec. 6:27, 35; 7:24). Pënaty tuundëp mëjjäˈäy mbäät nanduˈun ttundë. Tony mëdiˈibë të yˈokˈyajnimaytyakpë mä parrafo 2, duˈun jyënaˈany: “Desde mutsknëmëts, nyajtukniˈˈijxë etsëts ngupëjktäˈäyëdë tuunk oyëts ngamëmadaktäˈäyët. Pääty kots tëgok nDiosˈawdäjttë tuk familyë, yëˈëts nimaytyaktë ko tsojkëp nˈijtëm yujy tudaˈaky, tats nyajtëëyë ngudëjk wiˈixëts yˈixy. Ojtsëts nanduˈun nˈixy tuˈugë bideo mëdiˈibë yajpatp mä jw.org mëdiˈibë xyëwˈäjtypy Duˈun extëmë Jesus, nˈoktukniˈˈijxëmë wiinkpë ets nˈokmëbëjkëm ko oy tijaty ttunäˈändë”. Tony, ta tˈanmääyë myëguˈuktëjk ets pyudëkëdët. ¿Wiˈix wyimbëtsëëmy? Tony tnimaytyaˈaky: “Tyam nmëdäjtypyëtsë tiempë parëts niˈigyë nmëwingonëdë Jyobaa ets yajtuundaapy ja tuunk mëdiˈibë japˈäjtp mä ja tuˈukmujkën”.

7. ¿Wiˈix mbäädë mëjjäˈäytyëjk tpanëjkxëdë yˈijxpajtënë Gedeón ko yaˈëbäät yajkäjpxpäättët? (Santya̱ˈa̱gʉ 3:13).

⁷ Kyaj mjotˈambëktët ko myaˈëbäät myajkäjpxpäättët. Ko yajkäjpxpääty tuˈugë nmëguˈukˈäjtëm mëdiˈibë tuump mëjjäˈäy, ja mä mbäät dyajnigëxëˈëky pën ijtp yujy tudaˈaky ets mbäät pyudëkëty extëm yajnimaytyaˈagyë Gedeón. Yëˈë nyijäˈäwëbë nety ko tëgoopy, pääty kyaj jyotˈambëjky ko nyibëdëˈkëdë ja tyëëm yˈäätsë Efraín (Juec. 8:1-3). Niˈigyë yˈijty yujy tudaˈaky ets tmëdoowˈijty wiˈix yaˈˈanmääy, ta net ojts tnaxˈëy tnaxkajpxy. Pënaty tuundëp mëjjäˈäy nanduˈun tijaty ttundë extëmë Gedeón, ko yajxon tmëdoowˈittë ets yuunk naxypy tˈatsoowëmbittë ko jam pën yˈëbäät kyäjpxpäädëdë (käjpxë Santya̱ˈa̱gʉ 3:13). Ko duˈun ttundë, ta dyajjapˈattë tuˈugyëˈäjtën mä Diosë kyäjpn.

8. ¿Tixyëp mbäät ttundë ja mëjjäˈäytyëjk ko yajmëjkuˈëw yajmëjkugäjpxëdët? Pëjktäˈäk tuˈugë ijxpajtën.

⁸ Yajmëjpëtsëmë Jyobaa. Gedeón yëˈë yajmëjpëtsëëmë Jyobaa ko jäˈäy ojts myëjkugäjpxëdë ko tmëmadaky ja myëtsip (Juec. 8:22, 23). ¿Wiˈix mbäädë mëjjäˈäytyëjk tpanëjkxëdë yˈijxpajtën? Ko yëˈë dyajmëjpëtsëmdëdë Jyobaa ko nety jam ti oy ttundë (1 Kor. 4:6, 7). Extëm ko tuˈugë mëjjäˈäy yaˈˈanëëmët ko jantsy oy tyimtukniˈˈijxënë, mbäät yˈatsoy ko japën duˈun myiny mä Diosë yˈAyuk ets ko niˈamukë nˈawij nˈagajëm mët ko Diosë kyäjpn xytyukniˈˈijxëm. Pënaty tuundëp mëjjäˈäy oy ko näˈäganäˈäty nyayajtëwëdët pën extëm tyukniˈˈixëdë yëˈë yajmëjpëtsëëmdëbë Jyobaa o yëˈë këˈëm nayajmëjpëtsëëmëdëp. Min nˈokˈijxëm wiˈix jyajtyë Timothy, ko yaˈˈanmääy parë tyunët mëjjäˈäy nëgooyë nety dyajnaxanë diskursë. Yëˈë jyënaˈany: “Kots ijty nyajtsondaˈaky ja ndiskursë, yëˈëts nyajtuumbyë ijxpajtën mëdiˈibë tsip yajjaygyukëp ets jantsy yenyëts nnimaytyaˈaky, päätyëts ja nmëguˈuktëjk xymyëjkuˈëw xymyëjkugäjpxëdë. Ëjtsë nety jeˈeyë nayajmëjpëtsëëmëp ets kyaj yëˈëjëtyë Jyobaa o ja yˈAyuk”. Ok, ta Timothy tpëjkyë kuentë ko tsojkëbë nety dyajtëgatsët wiˈix tyukniˈˈixë parë ja nmëguˈukˈäjtëm kyaj yëˈëyë yajmëjpëtsëmëdët (Prov. 27:21). ¿Wiˈix wyimbëtsëëmy ko duˈun ttuuny? Yëˈë jyënaˈany: “Kots tyam ndiskursaraty, ta nmëguˈukˈäjtëm mëdiˈibëts xyˈanmaapy ko të pyudëkëty ja ndiskursëts parë tmëmadäˈägët ja yˈamay jyotmay o parë niˈigyë tmëwingonëdë Jyobaa. Jotkujkëts nnayjyawëty kots duˈun xyˈanëëmëdë ets kyaj kots ijty jeˈeyë nyajmëjkuˈëw nyajmëjkugäjpxë”.

KO TSYIPTAˈAKY NMËMËDOˈOWËMË JYOBAA ETS NˈIJTËM JOTMËK

9. ¿Wiˈixë Gedeón ojts dyajnigëxëˈëky ko mëdoop ets ko jotmëk? (Ixë dibujë mëdiˈibë miimp mä rebistë nyiˈak).

⁹ Ko Gedeón yˈanmääyë Jyobaa parë tyunët fes, ja mä nety mbäät dyajnigëxëˈëky pën myëmëdowaambyë Jyobaa ets pën jotmëk. Pes ojts yajtukˈaneˈemy parë tjitët ja altaar mëdiˈibë nety yajpatp mä ja tyeetyë tyëjk mä yaˈˈawdatyë Baal (Juec. 6:25, 26). Ok, ta Gedeón dyajtuˈukmujky nimay ja syoldäädëtëjk, perë Jyobaa ta yˈanmääyë majtskˈok parë dyajniwaanët (Juec. 7:2-7). Ets tim ok, ta yaˈˈanmääy ets tsuˈumgujk tnidëkët ja myëtsipëty (Juec. 7:9-11).

10. ¿Wiˈix mbäät yaˈijxmatsy ja mëjjäˈäytyëjk pën mëdoowdëp o kyaj?

¹⁰ Jëjpˈam etsë mëjjäˈäytyëjk duˈun tijaty ttundët extëm yaˈˈanëëmëdë (Sant. 3:17). Ko ja mëjjäˈäytyëjk myëdowdë, ta xondaˈakyˈääw xondaˈakyjyot tpanëjkxtë extëmë Biiblyë tyuˈumoˈoyëdë ets nanduˈun ja Diosë kyäjpn. Ko duˈun ttundë, ta tmoˈoytyë oybyë ijxpajtën ja myëguˈuktëjk. Per näˈäty, mbäät tsyiptaˈaky ets myëdowët mët ko tsip duˈun ttundët o dyajtëgatstët wiˈixë Diosë kyäjpn tyuˈumoˈoyëdë. Ets näˈäty, mbäät axtë twinmaytyë o nyayajtëwëdë pën oy ko duˈun ttundët extëm yajnëˈëmoˈoy yajtuˈumoˈoytyë, o mbäät yaˈˈanëëmëdë ets ti ttundët mëdiˈibë yajtukutsum yajtukumatsëdëp. Ko duˈumbë jotmay twinguwäˈägëdë ja mëjjäˈäytyëjk, ¿wiˈix mbäät tpanëjkxëdë yˈijxpajtënë Gedeón?

11. ¿Ti mbäät pyudëkëdë ja mëjjäˈäytyëjk parë myëdowdët?

¹¹ Ixtë yajxon ti ja Diosë kyäjpn nyiˈanaˈamëp ets padundë. Jyobaa ojts tˈanëëmë Gedeón wiˈix tjitët ja altaar mä ja tyeetyë tyëjk, mä tkojët tuˈugë altaar parë Jyobaa ets ti jëyujk tyukwintsëˈëgëp. Gedeón kyaj dyajtëëyë Jyobaa tiko duˈun tniˈanaˈamë, amonyën ojts ttuungojy extëm ojts yajtukˈaneˈemy. Tyamë Diosë kyäjpn tyukˈaneˈembyë mëjjäˈäytyëjk tijatyën mbäät ttundë extëm ko yajkexyë kartë o nyaxyë anunsyë. Pääty duˈun yajtuny parë nyaˈijxˈijt nyajkuentëˈäjtëm ets parë kyaj nmëjagamgakëmë Jyobaa. Mëk ntsojkëm pënaty tuundëp mëjjäˈäy mët ko duˈun meerë ttundë tijaty extëmë Diosë kyäjpn tyuˈumoˈoyëdë. Ko duˈun ttundë, niˈamukë ndukˈoyˈäjtëm (Sal. 119:112).

12. ¿Wiˈix mbäädë mëjjäˈäytyëjk tpadundë extëm jyënaˈanyë Ebreeʉsʉty 13:17 ko Diosë kyäjpn twijtstëgatsy wiˈix tijaty yajtunäˈäny?

¹² Kupëktë extëmë Diosë kyäjpn tijaty twijtstëgatsy. Jyobaa ojts tˈanëëmë Gedeón ets nimay ja syoldäädëtëjk tkajxëmbitët mä tyëjk (Juec. 7:8). Gedeón waˈan wyinmääy: “¿Oyëdaa kotsë Jyobaa nmëmëdowët? ¿Oybyëtsëmëbëdaa kots duˈun ndunët?”. Gedeón myëmëdoowë Jyobaa, ¿wiˈix tyam mbäädë mëjjäˈäytyëjk tpanëjkxëdë yˈijxpajtën? Ko tkupëktët ets ttundët extëmë Diosë kyäjpn tijaty twijtstëgatsy (käjpxë Ebreeʉsʉty 13:17). Extëm nˈokpëjktakëm, mä jëmëjt 2014 pënaty Wyoowˈyoˈoytyëbë Diosë kyäjpn ojts twijtstëgatstë wiˈix yajkujuy ko yajkojy ja Tëjk mä nˈëxpëjkëm ets mä nˈasambleeˈäjtëm (2 Kor. 8:12-14). Yajtukˈanuˈkxtëp ijtyë meeny ja nmëguˈukˈäjtëm parë tkojtët ja tëjk mä yˈëxpëktë, ets ok, ta tkoonëmbittë. Per tyam kyaj nyekydyuˈunëty, yëˈë tuump ja meeny mëdiˈibë yajnayäjkp mäjaty nduˈukmujkëm parë yajkojy ja Tëjk mä nˈëxpëjkëm o mä nˈasambleeˈäjtëm, oy ja nmëguˈukˈäjtëm mëdiˈibë jap tuˈukmukandëp waanë ja meeny dyaktë. Tuˈugë nmëguˈukˈäjtëm mëdiˈibë xyëwˈäjtypy José, kyaj tmëbëkany ko duˈun tnijäˈäwë. Duˈun jyënany: “Tsip duˈun yajkojët tuˈugë tëjk, waˈandaa duˈun wiinktsoow yajtunët, per yää kyaj, ta xyˈoktimˈixtët nituˈuk yä salonk kyayajkojäˈäny”. Perë José kyupëjk extëmë netyë Diosë kyäjpn të ttukniwitsë. ¿Tiko? Duˈun tˈaknimaytyaˈaky: “Yëˈëts njamyajts extëm jyënaˈanyë Proverbios 3:5, 6 ko tsojkëbëts ndukˈijxpatëdë Jyobaa ets jantsy oyën të wyimbëtsëmy. Kyaj jeˈeyë të yajkojy kanäägë salonk, nanduˈunën të njäjtëm nˈayäjk nˈagoˈonëm oy yiˈinëm waanë parë niˈamukë nmëdäjtëm tuˈugë Tëjk mä nˈëxpëjkëm”.

13. 1) ¿Ti pudëjkë Gedeón parë yˈijty jotmëk? 2) ¿Ti mbäät ttundë mëjjäˈäytyëjk parë tpanëjkxëdë yˈijxpajtënë Gedeón? (Ix nanduˈunë dibujë).

¹³ Këdii mtsëˈëgëdë xytyundët tijatyë Dios mduknipëjkëdëp. Gedeón tyuun ti yajtuknipëjk oy tˈokjëjptsëˈk tˈokjëjpjäˈäwë ets oy ja jyukyˈäjtën oˈkën jëjpˈam yˈijty (Juec. 9:17). Ko Jyobaa yˈanmääyë ko pudëkëyanëp, yëˈë yaˈijtë seguurë ko mbäädë nety tˈijxˈity tkuentëˈaty ja Diosë kyäjpn. Pënaty tuundëp mëjjäˈäy ets tsyëënëdë mä kyubokyë Diosë tyuunk, ijttëp amëk jotmëk extëmë Gedeón. Pes tyukniwijtsëdëp wiˈix mbäät ja nmëguˈukˈäjtëm tyuˈukmuktë ets kyäjpxwäˈkxtë oy tjanijawëdë ko kutsëˈëgë ets mbäät axëëk yajtundë, yajmënëjkxtë pujxndëgoty, yaˈëxkaxtë mä tyundë o ko ja kuduunktëjk tijaty yajtëw yajtëdäˈägëdë.c Ko nety tsyondaˈaky ja mëj ayoˈon, tsojkëp duˈunyëm ja mëjjäˈäytyëjk yˈittët jotmëk ets tijaty ttundët extëm ja Diosë kyäjpn tyuˈumoˈoyëdë, oy wiˈix ttimykyujat ttimykyukëbatëdët. Waˈan yaˈˈanëëmëyäˈändë wiˈix yajkäjpxwäˈkxäˈäny tijaty tukmiin tukëdakëp ja naxwinyëdë jäˈäy mëdiˈibë duˈun jyawëyandëp extëm ja mëjatypyë tëtsn. O waˈan yaˈˈanëëmëyäˈändë ti mbäät nduˈunëm ko nety xynyibëdëˈkëm ja Gog mëdiˈibë tsoˈomp Magog (Ezeq. 38:18; Diˈibʉ Jat. 16:21).

KO NETY TSYIPTAˈAKY XYMYËMADÄˈÄGËT JA TUUNK

14. ¿Tiko Gedeón ojts tsyiptakxëty tmëmadäˈägët ja tuunk mëdiˈibë yajtuknipëjk?

¹⁴ Ko Gedeón tyuuny extëmë fes, kajaa dyajtuunyë jyot myëjääw. Ko tsyiptuuny tsuˈumgujkm mët ja madyanitëty, jam ojts tpatsoony desde mä ja yˈajoyë Jezreel axtë tpajäjty mä ja Jordán mëjnëë. Waˈan ttuknäjxyë it lugäär mëdiˈibë aamyoty pejˈyoty ets apynyoty (Juec. 7:22). Ets ko tpajäjty mä ja Jordán mëjnëë, ¿ojtsëdaa wyäˈkwëˈëmë? Kyaj. Oyë nety të jyantsy anuˈkxëtyaˈay mët ja 300 syoldäädëtëjk ojts ttuknaxtë ja nëë ets tˈakpabooytyë ja myëtsipëty, ta tnaspatëdë ets dyajkutëgooy ja madianitëty (Juec. 8:4-12).

15. ¿Näˈä mbäät yˈanuˈkxëdë nmëguˈukˈäjtëm mëdiˈibë tuundëp mëjjäˈäy?

¹⁵ Ko ja nmëguˈukˈäjtëm mëdiˈibë tuundëp mëjjäˈäy tˈijxˈit tkuentëˈattë ja Diosë kyäjpn ets ja fyamilyë, mbäät mëk tyukëdakëndë ets yaˈˈanuˈkxëdë. ¿Wiˈix mbäät tpanëjkxëdë yˈijxpajtënë Gedeón ko duˈun nyayjyawëdët?

16, 17. 1) ¿Ti Gedeón pudëjkë parë tmëmadaky ja tuunk? 2) ¿Tiko mbäät yˈittë seguurë mëjjäˈäytyëjk ko Jyobaa pudëkëyanëdëp? (Isaías 40:28-31; ix nanduˈunë dibujë).

¹⁶ Ittë seguurë ko Jyobaa yëˈë moˈoyanëdëp ja jot mëjääw. Gedeón ijtën seguurë ko Jyobaa pudëkëyanëp ets jantsy ojtsën yajpudëkë (Juec. 6:14, 34). Tëgok, pyabooytyë mët ja syoldäädëtëjk nimajtskë rey mëdiˈibë nety anaˈamdëp Madián ets kyaktë kameyëkëjxy (Juec. 8:12, 21). Jyobaa pudëjkëdë ets mooyëdë jot mëjääw, ta ojts tnaspäädëdë ets dyaˈoˈktë. Pënaty tyam tuundëp mëjjäˈäy, mbäät nanduˈun yˈittë seguurë ko Jyobaa pudëkëyanëdëp, pes yëˈë tuˈugë “Dios mëdiˈibë ninäˈä kyaˈˈanuˈkxë ets kyamëjääwgëxy”. Xëmë myoˈoyäˈänëdë jyot myëjääw ko dyajtëgoyˈattët (käjpxë Isaías 40:28-31).

¹⁷ Min nˈokˈijxëm wiˈix tnimaytyaˈagyë Matthew, tuˈugë nmëguˈukˈäjtëm mëdiˈibë tuump mä Komitee mëdiˈibë pyudëjkëdëbë nmëguˈukˈäjtëm parë kyaj tkupëktëdë neˈpyny. ¿Ti pudëjkëp parë tmëmadäˈägëdë yäˈädë tuunk? Yëˈë jyënaˈany: “Tëts ndimyˈixy ko tëyˈäjtën extëm jyënaˈanyë Filipenses 4:13, kots näˈäty nnayjyawëty ko kyajts nˈokmëmadäˈäganë yäˈädë tuunk, tats amumduˈukjot nmënuˈkxtaˈagyë Jyobaa parëts xymyoˈoyët ja jot mëjääw mëdiˈibëts nyajtëgoyˈajtypy etsëts duˈunyëm nbudëkët ja nmëguˈukˈäjtëm”. Duˈun extëm ttuunyë Gedeón, yëˈë mëjjäˈäytyëjk mëk nanduˈun tyundë parë tˈijxˈit tkuentëˈattë ja Diosë kyäjpn, oy näˈäty tsyiptakxëdë. Per tsojkëp yˈittët yujy tudaˈaky mët ko kyaj xëmë myadäˈägäˈändë ttuundäˈäytyët tijaty jyatsojkënyëˈäjttëp. Pënaty tuundëp mëjjäˈäy, ijttëp seguurë ko Jyobaa myëdowaampy ko tmënuˈkxtäˈäktët ets moˈoyanëdëp ja jot mëjääw mëdiˈibë yajtëgoyˈäjttëp (Sal. 116:1; Filip. 2:13, TNM).

18. Extëm të nˈijxëm, ¿wiˈix mbäädë mëjjäˈäytyëjk tpanëjkxëdë yˈijxpajtënë Gedeón?

¹⁸ Extëm të yajnimaytyaˈagyë Gedeón, kanäk pëky tijaty tyukniˈˈixëdë nmëguˈukˈäjtëm mëdiˈibë tuundëp mëjjäˈäy, ko tsojkëp yˈittët yujy tudaˈaky ets tˈixtët pën myëmadaktääytyëp ko yajtuknipëktëdë tuunk. Nanduˈun yˈittët yujy tudaˈaky ko yajmëjkuˈëw yajmëjkugäjpxëdët o yaˈëbäät yajkäjpxpäättët. Tsojkëp nanduˈun yˈittët jotmëk ets tmëmëdowdëdë Jyobaa, ets mas niˈigyë ko wyingoonˈadëtsnë kutëgoˈoyën. Tsojkëp yˈittët seguurë ko oy ti tyun jyatëdët, Jyobaa moˈoyanëdëp ja jot mëjääw parë tmëmadäˈäktët. Seguurë ko nyajtsobatëm ets mëk ntsojkëm ja mëjjäˈäytyëjk mëdiˈibë mëk tuundëp (Filip. 2:29).