ARTIKULO MËDIˈIBË YAËXPËJKP 51
Tijaty mˈëwxijty mjëjpˈijxypy seguurë ko yˈadëwäˈäny
“Jotkujk nˈawijx njëjpˈijxëm” (ROM. 5:5).
ËY 142 Nˈokˈawijx nˈokjëjpˈijxëm ja kunuˈkxën
MËDIˈIBË YAJNIMAYTYÄˈÄGÄÄMPa
1. ¿Tiko njënäˈänëm ko Abrahán myëbëjkypyë nety ko seguurë tyunäˈäny jyatäˈänyëty mëdiˈibë nety yˈëwxijty jyëjpˈijxypy?
JYOBAA ojts ttukwandaˈagyë Abrahán ko mët yëˈëgyëjxmë tyëëm yˈääts, yajkunuˈkxäˈändë niˈamukë naxwinyëdë jäˈäy (Gén. 15:5; 22:18). Komë Abrahán mëkë mëbëjkën tmëdäjty, päätyën yˈijty seguurë ko Jyobaa kyuytyunaambyë nety extëm të tyukwandaˈagyëty. Abrahán ja netyë jyëmëjtnë 100 etsë Sara 90, per kyaj nety ti yˈuˈungëty (Gén. 21:1-7). Biiblyë jyënaˈany ko “Abrään myëbëjk ja Dios es dëˈën yˈaptëjkˈatëdë may nyaxwinyëdë. Dëˈën extëm ja Diosë nety të yˈanëˈëmxëty” (Rom. 4:18). Extëm nnijäˈäwëm, tuun jäjtë mëdiˈibë netyë Abrahán yˈëwxijty jyëjpˈijxypy, pes maxuˈunkˈäjt ja yˈuˈunk mëdiˈibë xyëëwmooy Isaac. Per ¿tiko Abrahán yˈijty seguurë ko Jyobaa kyuytyunaambyë nety extëm të tyukwandaˈagyëty?
2. ¿Tiko Abrahán tmëbëjky ko seguurë netyë Jyobaa tkuytyunäˈäny mëdiˈibë tukwandakë?
2 Abrahán yˈixyˈajtypyë nety yajxonë Jyobaa, päätyën tmëbëjky ko kyuytyunaambyë nety mëdiˈibë tukwandakë (Rom. 4:21). Mët yëˈëgyëjxm ja myëbëjkën, ta Jyobaa yajnäjxë wäˈäts ets kyupëjkë (Sant. 2:23). Abrahán mëbëjkëngyëjxm tˈëwxijty tjëjpˈijxy mëdiˈibë yajtukwandak extëm jyënaˈanyë Romanʉs 4:18. Per min net nˈokˈijxëm wiˈixë Apostëlë Pablo tnimaytyaky mä Romanʉs kapitulo 5.
3. ¿Wiˈixë apostëlë Pablo tnimaytyaky mëdiˈibë nˈëwxijt njëjpˈijxëm?
3 Pablo nyimaytyak tiko mbäät nmëbëjkëm ets “jotkujk nˈawijx njëjpˈijxëm” mëdiˈibë miimp këdakp ets xypyudëjkëm parë duˈunyëm njëjpˈijxëm (Rom. 5:5). Mientrës ngäjpxëmë Romanʉs 5:1-5 pawinmay wiˈixën tyam niˈigyë xymyëbëky mëdiˈibë miimp këdakp. Nanduˈun nnijawëyäˈänëm ti mbäät nduˈunëm parë niˈigyë nmëbëjkëm tijaty nˈëwxijt njëjpˈijxëm. Per min jawyiin nˈoknimaytyakëm tuk pëky mëdiˈibë apostëlë Pablo myaytyak.
MËDIˈIBË NˈËWXIJT NJËJPˈIJXËM
4. ¿Ti nyimaytyakypyë Romanʉs 5:1, 2?
4 (Käjpxë Romanʉs 5:1, 2). Pablo yëˈë duˈun nyijäˈäyë ja Diosmëduumbëty mëdiˈibë Roma, pes yëˈëjëty të nety tnijawëdë pënën Jyobaa ets Jesus. Të nety dyajnigëxëˈëktë ja myëbëjkën ets tëjkëdë Diosmëduumbë. Päätyë Dios yajnäjxëdë wäˈäts mët yëˈëgyëjxm ko tmëdäjttë mëbëjkën ets ta tyuknigajxëdë yˈespiritë santë. Desde jaa, ta tˈëwxijt tjëjpˈijxtë ti Dios tukwandakëdë ets myëbëjktë ko tunan jatanëp.
5. ¿Ti yˈëwxijt jyëjpˈijxtëp pënaty nëjkxandëp tsäjpotm?
5 Ko waanë yˈijty ta apostëlë Pablo tnijäˈäyë ja Diosmëduumbëty mëdiˈibë Éfesʉ parë ttukmëtmaytyaky tijatyë netyë Dios të tyukwandäˈägëdë. Ojts tˈanëëmë ko yajmoˈoyandëbë nety ‘ja oybyë tsujpë kumäˈäyën mëdiˈibë Dios të tyukniwootsowëdën’ (Efes. 1:18, TY). Ets ja Diosmëduumbëty mëdiˈibë Kolosʉ tyukmëtmaytyaktë mä tˈaxäjëyäˈändë ja kyumäˈäyën mëdiˈibë nety yˈëwxijttëp. Duˈun tˈanmääy: “Mˈawijx mjëjpˈijxtëp ja kumäˈäny diˈibë Dios xytyuknibëjkëˈkëm tsäjpotm” (Kol. 1:4, 5). Pääty pënaty të yajwinˈixtë parë mëdë Jesus yˈanaˈamdët jam jyukypyëkäˈändë tsäjpotm (1 Tes. 4:13-17; Diˈibʉ Jat. 20:6).
Ja nmëguˈukˈäjtëm Frederick Franz, nyimaytyak ko ja myëguˈuktëjk ijttë seguurë ko jantsy jamën nëjkxäˈändë tsäjpotm. (Ixë parrafo 6).
6. ¿Wiˈix tuˈugë nmëguˈukˈäjtëm tnimaytyaky mëdiˈibë yˈëwxijty jyëjpˈijxypy?
6 Pënaty nëjkxtëp tsäjpotm, mëjwiin kajaa dyajtsobäättë mëdiˈibë yˈëwxijt jyëjpˈijxtëp. Extëm nˈokpëjktakëm mä jëmëjt 1991, ja nmëguˈukˈäjtëm Frederick Franz duˈun tnimaytyaky: “Ninuˈunëts nëjkxäˈändë tsäjpotm 144,000, ijttëbëtsën seguurë ko jamëtsën njukypyëkäˈändë tsäjpotm, kyajts duˈun ndimywyinmääytyë nyajkunuˈkxtët”. Yäˈädë nmëguˈukˈäjtëm nyimaytyak wiˈixë nety nyayjyawëty oyë nety jam kanäk jëmëjt Diosmëduny. Jyënany: “Duˈunyëmëts nyajtsobäättë mëdiˈibëts nˈëwxijt njëjpˈijxtëp ets tuˈuk tuˈugë xëëw nyaxy mas niˈigyëts nyajtsobäättë. Duˈunyëmëts nyajtsobäädäˈändë oyëts kanäk miyonk jëmëjt ndimyˈëwxittëty, pes niˈigyëts tyam nyajtsobääty”.
7, 8. ¿Ti nimayë Diosmëduumbë yˈëwxijt jyëjpˈijxtëp? (Romanʉs 8:20, 21).
7 Nimayë Diosmëduumbëty kyaj jam jyukyˈatäˈändë tsäjpotm. Yääjën jyukyˈatäˈändë xëmëkyëjxm duˈun extëmë Abrahán ko nety tyëjkënë tuumbë ja Diosë gyobiernë (Eb. 11:8-10, 13). Apostëlë Pablo nyimaytyak nanduˈun mëdiˈibë nˈëwxijt njëjpˈijxëm (käjpxë Romanʉs 8:20, 21). Ko xynyijawë tijatyë Biiblyë wyandakypy mä tiempë myiny kyëdaˈaky, ¿ti niˈigyë mˈoymyëdoow? ¿Waˈandaa yëˈë ko kyaj yˈokjaˈˈatanë ja poky kaytyey ets ko njëmbitäˈänënë wäˈäts jäˈäy? ¿O waˈan ko jyukypyëkäˈändë ja mjëëky mëguˈuk mëdiˈibë të yˈooktë? Nguˈëˈëw ngukäjpxëmë Jyobaa ko xytyukwandakëm ja oybyë jukyˈäjtën mä tiempë myiny kyëdaˈaky.
8 Niˈamukë agujk jotkujk xyajnayjyäˈäwëm mëdiˈibë nˈëwxijt njëjpˈijxëm oy njukyˈatäˈänëm yä Naxwiiny o jam tsäjpotm ets mbäät mas niˈigyë nmëbëjkëm mëdiˈibë nˈëwxijt njëjpˈijxëm. ¿Wiˈix mbäät duˈun nduˈunëm? Parë nnijäˈäwëm min nˈokˈijxëm wiˈixë apostëlë Pablo ojts tnimaytyaˈaky. Extëm jyënany xypyudëkëyäˈänëm parë niˈigyë nmëbëjkëm ko adëwäämp tijatyë Jyobaa të xytyukwandakëm.
NˈOKMËBËJKËM NIˈIGYË MËDIˈIBË NˈËWXIJT NJËJPˈIJXËM
Niˈamukë ninuˈun nDiosmëduˈunëm nnijäˈäwëm ko nbäädäˈänëmë jotmay. (Ixë parrafo 9 etsë 10).
9, 10. Duˈun extëmë Pablo, ¿wiˈix nanduˈun njatäˈän ngëbatäˈänëm? (Romanʉs 5:3; ix nanduˈunë dibujë).
9 (Käjpxë Romanʉs 5:3). Pablo jyënany ko nbatëmë amay jotmay, mbäät xypyudëjkëm parë niˈigyë nmëbëjkëm tijaty nˈëwxijt njëjpˈijxëm. Niˈamukë ninuˈun nDiosmëduˈunëm nnijäˈäwëm ko nbäädäˈänëmë amay jotmay, pesë apostëlë Pablo duˈun tˈanmääy ja Diosmëduumbëty mëdiˈibë Tesalónikʉ: “Pes mäts nˈijty mët miitsëty, nˈanmääytyë ko nyajnaxäˈänëm ja ayoˈon jotmay, dëˈën extëm të jyaty. Mnijäˈädëbëˈë” (1 Tes. 3:4). Ets ja Diosmëduumbëty mëdiˈibë Korintʉ duˈun tnijäˈäyë: “Ntsejpyëts es xynyijawëdët nëˈënëts të nˈayoy [ . . . ] axtë jënanëts ko kyajts nbëtsëmët mëdëtsë njikyˈäjtën” (2 Kor. 1:8; 11:23-27).
10 Tëyˈäjtën extëmë apostëlë Pablo jyënany, pes tyam duˈunën nwinguwäˈkëmë amay jotmay (2 Tim. 3:12). ¿Ti jotmay kujk mbatypy desde ko xymyëduuntsondakyë Jyobaa? Waˈan ja mjëëky mëguˈuk o ja mëdiˈibë mëët oy mnayjyawëty mnëxiˈik mdukxiˈigëdë o mdukmëtsipˈatyëty ko mDiosmëduny. ¿Mbatypyë jotmay mä mduny mët ko kyaj mwinˈëënäˈäny? (Eb. 13:18). ¿O waˈanë kuduunk justisë mnibëdëˈëgyëty mëët ko mˈëwaˈkxy ngäjpxwaˈkxy? Oy wiˈixëmë amay jotmay nbatëm, apostëlë Pablo jyënany ko oy ko nxondakëm. ¿Tiko duˈun jyënany?
11. ¿Tiijën ko mbäät nmëmadakëm ja amay jotmay?
11 Ko nbatëmë amay jotmay oy ko nxondakëm, mët ko Romanʉs 5:3 jyënaˈany: “Nnijäˈäm ko nmëmadakëm ja ayoˈon, yëˈë xymyoˈoyëm ja maˈxtujkën”. Niˈamukë ninuˈun nDiosmëduˈunëm nbatëmë amay jotmay, per oy ko nmëmadakëm. Oy ko nbëjktakëm ja winmäˈäny parë nmëmadakëm oy ti amay jotmay ndimypyatëm. Pën nmëmadakëm, ta nëjkx nˈaxäjëm mëdiˈibë nˈëwxijt njëjpˈijxëm. Kyaj duˈun njäˈäyˈatäˈänëm extëm ja ijxpajtën mëdiˈibë Jesus myaytyak ko ja tëëmp kyaˈay mä ja tsäädoˈoky. Yëˈë “yˈandijpy ja jäˈäyëty diˈibë myëdoodëp ja Diosë yˈayuk es tˈaxäjëdë xondaˈakyˈää xondaˈakyjyot”. Per “ko tyukmin tyukjäˈtëdë ayoˈon jotmay mët jaˈagyëjxm ja Diosë yˈayuk, net tmastuˈuty ja myëbëjkën” (Mat. 13:5, 6, 20, 21). Nipën tkatsoky ets tyukmin tyukjäˈtëdët ja ayoˈon jotmay o pën nyibëdëˈëgëdët, per xypyudëjkëm ko nmëmadakëm. Min nˈokˈijxëm tiko duˈun njënäˈänëm.
12. ¿Wiˈixën xypyudëjkëm ko nmëmadakëm ja amay jotmay?
12 Santiago ojts tnimaytyaˈaky wiˈix ndukˈoyˈatäˈänëm ko nmëmadakëm ja amay jotmay, pes duˈun jyënany: “Tsojkëp es xyjattët wiˈix oy xymyëmadäˈäktët ja ayoˈon, dëˈën mˈittët kexy kaˈpxy extëmë Dios ttseky, es këdii ni tii mdëgoyˈäjtxëdët” (Sant. 1:2-4). Ko Santiago jyënany nmëmadakëm ja ayoˈon jotmay, xypyudëjkëm parë nmaˈkxtujkëm, parë niˈigyë nmëdäjtëmë mëbëjkën ets mas niˈigyë ndukˈijxpajtëmë Dios. Per taaˈäjtp ja tuk pëky wiˈix xypyudëjkëm.
13, 14. ¿Wiˈix wyimbëtsëmy ko nmëmadakëm ja amay jotmay ets ti niˈigyë nmëbëjkëm? (Romanʉs 5:4).
13 (Käjpxë Romanʉs 5:4). Apostëlë Pablo jyënany “ko nmëmadakëm ja ayoˈon mët ja maˈxtujkën, nwëˈëmëm oy mët ja Dios” (Rom. 5:4). Kyaj yëˈë tmaytyäˈägäˈäny ko Jyobaa xytyukxondakëm ko nbatëmë amay jotmay, mëdiˈibën tyukxondakypy yëˈë ko nmëmadakëm. ¿Këdii mjotkujkmooyëp ko xynyijawë ko Jyobaa jotkujk nyayjyawëty ko nmëmadakëm ja amay jotmay ets ko kyaj nmastutëm? (Sal. 5:12).
14 Jyobaa kyupëjkë Abrahán mët ko tmëmadaky ja amay jotmay mëdiˈibë wyinguwäˈkë. Yajnäjxë wäˈäts ets oy mëët yˈijty (Gén. 15:6; Rom. 4:13, 22). Nanduˈunën jyaty mët ëtsäjtëm, kyaj Dios xykyupëkäˈänëm mët ko jam ti tuunk nikëjxmˈäjtëm mä nduˈukmujkëm o mët ko oy njantsy Diosmëduˈunëm. Netën xykyupëkäˈänëm pën nmëmadakëm ja amay jotmay ets pën kyaj nmastutëm. Ets mbäät duˈun niˈamukë nduˈunëm oy ti njäjt nnijäˈäwëm, oy wyiˈixëty ja xëëw jëmëjt ets oy wiˈixëm ja amay jotmay nwinguwäˈkëm. ¿Jam tyam xypyaatyë amay jotmay? Pën duˈun jamyats ko Jyobaa kyaj mmastuˈudäˈänyëty, per net pën kyaj nanduˈun xymyastuˈuty. Ko nnijäˈäwëm ko Jyobaa agujk jotkujk nyajnayjyäˈäwëm, ta mas niˈigyë nmëbëjkëm tijaty nˈëwxijt njëjpˈijxëm.
NIˈIGYË NMËBËJKËM TIJATY NˈËWXIJT NJËJPˈIJXËM
15. ¿Wiˈixë Pablo tˈakˈanmääy ja Diosmëduumbëty, ets ti mëdiˈibë net nnayajtëˈëwëm?
15 Extëm të nˈijxëm Pablo jyënany ko netë Dios xykyupëkäˈänëm pën nmëmadakëm ja amay jotmay. Okˈix wiˈix yˈakjënany: “Jotkujk nˈawijx njëjpˈijxëm ja xëë ko Kristë myinët; nnijäˈäm ko kyajë Dios xywyinˈëˈënëm” (Rom. 5:4, 5). Mä Romanʉs 5:2, të netyë apostëlë Pablo tˈokˈanmaabyë ja Diosmëduumbëty mëdiˈibë Roma ko Jesukristë myënëjkxäˈänëdë “Dios wyindum”. Pënë yäˈädë Diosmëduumbëty nyijäˈäwëdë nety ko nëjkxandëp tsäjpotm, ¿tiko duˈun jatëgokë Pablo yˈanmääyëdë?
Tyam niˈigyë xymyëbëky tijaty mˈëwxijty mjëjpˈijxypy këdiinëm ko xynyijäˈäwë ja tëyˈäjtën. (Ixë parrafo 16 etsë 17).
16. Oknimaytyäˈäk wiˈixën mbäät wanaty wanaty nmëbëjkëm mëdiˈibë Dios të twandaˈaky. (Ix nanduˈunë dibujë).
16 Mbäät njaygyujkëm tiijënë apostëlë Pablo myaytyäˈägan ko niˈigyë nmëbëjkëm tiijën nˈëwxijt njëjpˈijxëm. Extëm nˈokpëjktakëm, ¿wiˈix mnayjyäˈäwë ko myajtukmëtmaytyaky ko njukyˈatäˈänëm xëmëkyëjxm yä Naxwiiny? Waˈan mjënany ko jantsy oy yajmëdoy, jeˈeyë ko tsip duˈun tyun jyatëdët. Per ko niˈigyë Jyobaa të xyˈixyˈaty ets të xynyijawë tijatyë Biiblyë wyandakypy, ta mas niˈigyë xymyëbëky ko tyunaampy tijaty të twandaˈaky.
17. Desde ko mnëbejty, ¿wiˈixën niˈigyë xymyëbëky tijaty mˈëwxijty mjëjpˈijxypy?
17 Desde ko mnëbejty mas niˈigyë xymyëbëky tijaty mˈëwxijty mjëjpˈijxypy ets niˈigyë xymyëwingonyë Dios (Eb. 5:13–6:1). Extëm jyënaˈanyë Romanʉs 5:2-4, waˈan nanduˈun xyajnaxyë amay jotmay, per të Jyobaa mdukˈixyëty ko mgupëjkëp. Ko Jyobaa jotkujk xyajnayjyawëty, ta niˈigyë xymyëbëky ko kyuytyunaampy mëdiˈibë të twandaˈaky. Ja nyigëxëˈëgäˈäny pën niˈigyë nmëbëjkëm tijaty nˈëwxijt njëjpˈijxëm mä wiˈix nˈijtëm mëdë familyë, ti nduˈunëm tuˈuk tuˈugë xëëw ets wiˈix nyajtuˈunëm ja tiempë.
18. ¿Ti Jyobaa xytyukwandakëm?
18 Ko apostëlë Pablo jyënany ko Dios xykyupëjkëm, ta niˈigyë nmëbëjkëm mëdiˈibë nˈëwxijt njëjpˈijxëm ets yëˈë yˈakjënäˈäny ko seguurë Jyobaa tkuytyunäˈäny mëdiˈibë të twandaˈaky. ¿Tiko nmëbëjkëm? Jaˈko duˈunë apostëlë Pablo tˈanmääy ja Diosmëduumbëty: “Jotkujk nˈawijx njëjpˈijxëm ko Kristë myinët, nnijäˈäm ko kyajë Dios xywyinˈëˈënëm, jaˈa ko espiritë santëkyëjxm ja tsyojkën tpëjtaky mä njotˈäjt nwinmäˈänyˈäjtëm” (Rom. 5:5). Pääty mbäädën mˈity seguurë ko mëdiˈibë mˈëwxijty mjëjpˈijxypy tunan jatanëbën duˈun.
19. ¿Ti Jyobaa xytyukwandakëm pën kyaj nmastutëm?
19 Oy ko njamyajtsëm ko Jyobaa tyukwandakë Abrahán tijaty, kyupëjk ets naymyaayë mëët, adëëw nanduˈun tijaty ojts yajtukwandaˈaky. Päätyë Biiblyë jyënaˈany: “Abrään myëbëjk ja Dios maˈxtujkën mëët, pääty tˈaxäjë diˈibë Dios tukwandakë” (Eb. 6:15; 11:9, 18; Rom. 4:20-22). Pën ëtsäjtëm kyaj nmastutëmë Jyobaa duˈun extëmë Abrahán, nëjkxëp nˈaxäjëm tijaty të nyajtukwandakëm, pes seguurë tyunäˈäny jyatäˈänyëty, päätyën agujk jotkujk nnayjyäˈäwëm (Rom. 12:12). Duˈunë apostëlë Pablo tkujäˈäyë: “Waˈan ja Dios diˈibë xymyoˈoyëm ja awijxën, myajxondäˈägëdë miitsëty es mmoˈoyëdë tiˈigyëˈat mä yëˈë mmëbëjkën mët yëˈëgyëjxmë myëkˈäjtën ja espiritë santë, es myëjwiin kyajaaty ja mmëbëjkën” (Rom. 15:13).
ËY 139 ¿Mnayˈijxëp mä ja tsujpë lugäär?
a Mä yäˈädë artikulo yëˈë nimaytyäˈägäˈänëm ti nˈëwxijt njëjpˈijxëm niˈamukë ninuˈun nDiosmëduˈunëm ets tiko nmëbëjkëm ko jantsy tunan jantsy jatanëp duˈun. Mä Romanʉs kapitulo 5, jaa nˈixäˈänëm ko mas niˈigyë tyam tijaty nmëbëjkënë ets kyaj dyuˈunëty ko ojts nnijäˈäwëm ja tëyˈäjtën.