4, 5. 1) ¿Wiˈix jyajty ja tuumbë diˈibë Jesus myaytyak? 2) ¿Wiˈixë Jesus tˈanmääy ja yˈëxpëjkpëty?

⁴ (Käjpxë Lukʉs 16:1-9).a Xyyajwinmäˈäyëm extëmë Jesus tnimaytyaky ja tuumbë diˈib kyaj ti ttuuny tëyˈäjtën myëët. Tyäˈädë tuumbë yaˈëxkaxäämbë nety mët ko yajniwäämbejty ko axëëk tˈyajtuunë ja wyintsënë myeeny syentääbë.b Pääty yˈijty “kuwijy” ets nyaymyaaybyëjkë mëdë jäˈäy diˈib mbäät pyudëkëty ko ja tyuunk tˈyajtëgoyët. ¿Yëˈë netyë Jesus tyukjaygyukëyaampy ja yˈëxpëjkpëty ko oy ko duˈun yˈadëˈëtstët parë tˈyajnaxtëdë xyëëw jyukyˈäjtën? Kyaj. Pes ojts jyënaˈany ko pënaty “tyunandëp extëm ja Dios ttsekyën, kyaj dëˈën yˈadëˈëtstë”. Pääty, ¿ti diˈib xytyukniˈˈijxëm ko Jesus tmaytyakyë tyäˈädë tuumbë?

⁵ Jesus nyijäˈäwëbë nety ko duˈun extëmë tyäˈädë mëduumbë jyotmaybyaty, nanduˈunë nety ja yˈëxpëjkpëty tsip nimëjääw tˈyajnaxäˈändë jyukyˈäjtën. Pääty tˈanmääytyë: “Päättë mëtnaymyaayëbëty mët yëˈëgyëjxmë meeny sentääbë diˈib yä naxwiiny”. ¿Tiko? Jaˈko pën tëgooytyaapy ja jukyˈäjt madakën diˈib nmëdäjtëm, Jyobaa mëdë Jesus diˈib mëët të nnaymyaaybyëjkëm, nëjkxëp xykyupëjkëm “mä tsënääytyaknë winë xëëwbë”.

6. ¿Tiko njënäˈänëm ko Dios kyaj ojts ttuknibëjtäägë etsë naxwinyëdë jäˈäy twinmäˈänyˈattëdë meeny sentääbë?

⁶ Biiblyë yajxon tnigajpxy ko Dios kyaj ojts ttuknibëjtäägë etsë naxwinyëdë jäˈäy twinmäˈänyˈattëdë meeny sentääbë. ¿Tiko duˈun njënäˈänëm? Jaˈko Adán mëdë Eva, yajmooytyë tijatyë nety yajtëgoyˈäjttëp, axtë naniˈigyë (Gén. 2:15, 16). Ets ko Dios ttuknigejxyë myëjääw pënatyë nety nëjkxandëp tsäjpotm mä primer siiglë, nipën kyajënany “ëjtsë njaˈa” pën jamë nety ti tmëdat tjaygyaptë. “Nidëgekyë twinmääytyë ko tëgekyë diˈibë naty myëdäjttëp yëˈë [parë] nandëˈën dyajtundët nidëgekyëty” (Apos. 4:32). Ja kugajpxy Isaías ojts tnaskäjpxë ko jäˈtäämbë tiempë mä niˈamukë jäˈäy ttukxondäˈägäˈändë tijaty ijt windëëp Naxwiiny (Is. 25:6-9; 65:21, 22). Per mientrës jyaˈtyë tyäˈädë tiempë, tsojkëbë nety ja Jesusë yˈëxpëjkpëty yˈittët wijy parë tˈyajnaxtëdë jyukyˈäjtën “mët yëˈëgyëjxmë meeny sentääbë diˈib yä naxwiiny”, per nanduˈun ttundët tijatyë Dios tyukjotkëdakypy.

7. ¿Ti xytyukniˈˈijxëm extëm jyënaˈanyë Lukʉs 16:10-13?

⁷ (Käjpxë Lukʉs 16:10-13). Ja mëduumbë diˈibë Jesus myaytyak, yˈëxtääyë myëtnaymyaayëbë parë këˈëm ttukˈoyˈatäˈäny. Per yëˈë ojts tˈanëëmë ja yˈëxpëjkpëty parë tˈëxtäˈäytyët ja myëtnaymyaayëbë jam tsäjpotm, per kyaj parë këˈëm ttukˈoyˈattët. Ko duˈun jyënany, yëˈë parë njaygyujkëm ko wiˈix nyajtuˈunëm ja meeny sentääbë, ja nyigëxëˈëgäˈäny pën ntsojkëmë Dios o kyaj.