DIˈIB MIIMP MÄ NYIˈAK

¿Naytyukjotmaytyuunëbë Dios mët mijts?

“Kyajts pën xykyuwäˈäny ets ayoobëts; waˈanëtsë Jyobaa yëˈë xymyëjpëjtaˈaky.”a (DAVID, DIˈIB TËËYËP REYˈÄJT JAM ISRAEL)

¿Jamdaa tiko netyë David tmëbëky ko Dios naytyukjotmaytyuunëp mët yëˈë? ¿Naytyukjotmaytyuunëbë Dios mët mijts? Mayë jäˈäy tsiptakxëdëp tmëbëktët ko mëmääy mëdäjëdëbë Dios diˈib tukëˈëyë mëkˈäjtënë myëdäjtypy. ¿Tiko?

Tuk pëky, yëˈko jyënäˈändë ko Dios niˈigyë kyëjxmëty ets kyaj dyuˈunëtyë naxwinyëdë jäˈäy. Jantsy tëyˈäjtën, ets parë yëˈë ja “nasiongëty duˈun extëm tuktsunyë nëë kyaˈay mä tuˈugë kubetë; ets duˈun kyëxëˈëktë extëmë puˈxm mä ja balansë” (Isaías 40:15). Tuˈugë jäˈäy diˈib kyäjpxpatypyë relijyonk jyënaˈany: “Ko nmëbëjkëm ko tuˈugë dios nyaytyukjotmaytyunyëty mä tijaty nduˈunëm, mëk tsuu winmäˈänyë nety diˈib nipën tkamëbëkët”.

Ja tuk pëky, ta pënaty myëbëjktëp ko kyaj nyitëkëdë etsë Dios pyudëkëdët mët ko axëëk të jyukyˈattë. Extëm nˈokpëjtakëm, tuˈugë yetyëjk diˈib xyëˈäjtypy Jim, jyënaˈany: “Xëmëtsë nety nˈamdoyë Dios etsëts xypyudëkët parëts kyaj nˈawäˈändäˈägët, per kuanëts ko nˈawäˈändaˈaky. Tajëts nwinmääy ko mëk axëkjäˈäyëts ets ko ni yëˈëtsë Dios mbäät xykyapudëkë.”

¿Jantsy jagamëdaa Dios yajpääty ets kyaj tpëkyë kuentë ko yä nyajpatëm? ¿Wiˈix nyayjawëty ko tˈixyë pokyjyaˈay? Mbäät yaˈˈatsoojëmbityë tyäˈädë yajtëˈëwën mëdë Diosë nyaybyudëkë. Mët yëˈëgyëjxmë Biiblyë xyˈanmäˈäyëm ko kyaj jagam yajpääty ets ko naytyukjotmaytyuunëp mët ëtsäjtëm. Apostʉlʉty 17:27 jyënaˈany: “Mët ko tëyˈäjtën kyaj jagam yˈity ja Dios. Taa jaˈa mä ëtsäjtëm niduˈuk niduˈuk”. Mä yˈakminy ja taxkë artikulo nˈixäˈänëm wiˈixë Biiblyë tyukniˈˈixë ets wiˈixë Dios dyajnigëxëˈëky ko naytyukjotmaytyuunëbë jäˈäy ets nanduˈun mijts.

[Notë]

[Dibujë diˈib mä pajina 3]

“Yëˈë nasiongëty duˈun extëm tuktsunyë nëë kyaˈay mä tuˈugë kubetë.” (ISAÍAS 40:15)

DIˈIB MIIMP MÄ NYIˈAK: ¿NAYTYUKJOTMAYTYUUNËBË DIOS MËT MIJTS?

Dios mguentˈäjtëp

“Diosë wyiin yajpääty mä jäˈäyë nyëˈë tyuˈu, ets yëˈë yˈijxypy mäjaty nyaswäˈägëdë.” (JOB 34:21)

¿TIKO NÄÄGË JÄˈÄY KYAJ TMËBËKTË? Të näämnëm yaˈëxpëjkpëtsëmy ko galaxia diˈib wingon yajpatp mä naxwinyëdë, ja tmëdatyë naa 100 mil miyongë planetë. Kom jantsy mëjwiinë tsäjp, mayë jäˈäy jyënäˈändë: “¿Wiˈixë Dios tmëjpëjtäˈägët tijaty tyuundëbë naxwinyëdë jäˈäy pën yajpattëp mä tuˈugë planetë diˈib kyaj tyim këxëˈëky?”.

¿WIˈIXË BIIBLYË TYUKNIˈˈIXË? Jyobaaa kyaj të xymyoˈoyëmë Biiblyë parë net ok xyjaˈaytyëgoˈoyëm. Yëˈë xyˈanmäˈäyëm: “Mëdëtsë nwiin mä mijts, nmoˈoyaˈanyë käjpxwijën” (Salmo 32:8).

Nˈokˈijxëmë yˈijxpajtënë Agar, tuˈugë toxytyëjk diˈib tsënääy Egipto, ja jyukyˈajty mä siiglë 20 mä kyajnëm myinyë Jesus. Agar yajtëgooyë mayˈäjt wintsëˈkën mä Sarai diˈibë nety myëduumpy ets axëëk dyajnayjäˈäwë. Pääty kyeky ets ojts nyijkxy mä ja lugäärë äänëˈëk tëtsëˈëkpë. ¿Ojtsëdaa Dios jyaˈaytyëgoyëty mët ko tyëgooy? Biiblyë jyënaˈany: “Ta ja Jyobaa yˈanklës pyatë” ets jyotkujkmooyë ko yˈanmääyë: “Jyobaa të tmëdoyë mgëjx mdujkën”. Agar ta yˈatsooy: “Mijts tuˈugë Dios diˈib ijxp” (Génesis 16:4-13).

Mijts nan mˈijxëbë Dios. ¿Wiˈix? Parë njaygyujkëm, nˈokpëjtakëm tuˈugë ijxpajtën. Tuˈugë uˈunktääk kyuentˈäjtypy tsuj yajxonë yˈuˈunk yˈënäˈk, per niˈigyë tkuentˈaty diˈib mutskaty, pes yajkuentˈatandëp mët ko tsojk wiˈix jyattët. Nanduˈunë Jyobaa, niˈigyë xykyuentˈäjtëm ko amääy amutsk nyajpatëm këdiibë wiˈix njäjtëm. Jyobaa jyënaˈany: “Nˈityëts këjxm ets mä ja lugäärë wäˈätspë, per nanduˈunëts nˈity mëdë amäˈäts tukmäˈätsëbë ets mët diˈib yujy tudaˈaky, parëts nyajniwijäˈäny nyajnikajäˈäny ja diˈib yujy tudaˈaky ets parëts nyajkujkëyaˈanyë kyorasoon diˈib yajpattëp amäˈäts tukmäˈätsë” (Isaías 57:15).

Ko net duˈun të nˈijxëm, mbäät mnayajtëyëty: “¿Wiˈixëtsë Dios xyˈixy? ¿Yëˈëyë yˈijxypy wiˈixëts nˈixëty o yˈijxypy ti japˈäjtp mäjëtsë ngorasoon ets jyaygyujkëp wiˈixëts nnayjawëty?”.

[Notë]

[Dibujë diˈib mä pajina 4]

Pën mutsknëm tuˈugë mixyuˈunk mas niˈigyë yajkuentˈatäˈäny

DIˈIB MIIMP MÄ NYIˈAK: ¿NAYTYUKJOTMAYTYUUNËBË DIOS MËT MIJTS?

Dios jyaygyujkëp wiˈix mnayjawëty

“Jyobaa mijtsëts të xytyukˈijxnäjxtäˈäy, ets xyˈixyˈäjtpëts.” (SALMO 139:1)

¿TIKO NÄÄGË JÄˈÄY KYAJ TMËBËKTË? Mayë jäˈäy tmëbëktë ko Dios jeˈeyë yˈixëdë extëmë pokyjyaˈay diˈib kyaj nyitëkëdë yajmëjpëjtäˈäktët. Kendra, diˈib myëdäjtë mëk moˈon mëk tujkën, naybyokyˈijxë mët ko kyaj nety mbäät tkuytyuny extëmë Dios yˈanaˈamën jyënaˈany. Pääty kyaj nyekynyuˈkxtaky.

¿WIˈIXË BIIBLYË TYUKNIˈˈIXË? Jyobaa kyaj yëˈëyë tˈixyë tëgoˈoyën, yëˈë jyaygyujkëp yajxon wiˈix nyaˈijx nyajpatëm. Biiblyë jyënaˈany: “Yëˈë këˈëm yajxon tnijawë wiˈix të ngojëm, ets jyamyejtsypy ko naxway ëtsäjtëm”. Kyaj xytyukumëdoˈojëm extëm xyjanitëjkëm mët ko nbokytyuˈunëm, Jyobaa xypyaˈˈayoˈowëm ets xypyokymyaˈkxëm ko njodëmbijtëm (Salmo 103:10, 14).

Nˈokjamyajtsëm ja rey David diˈib të yˈokˈyajmaytyakpë mä tim jawyiimbë artikulo. Yëˈë yˈanmääyë Dios: “Yëˈë mwiin yˈijx axtë mäjëts ngojtsondaky, ets tukëˈëyëtsë niniˈkx të nety yajkujäˈäyëtyaˈay mä mliibrë [...]. Tukˈijxnäjxtaagyëts, mijts Dios, ets ixyˈatëtsë ngorasoon” (Salmo 139:16, 23). Oyë netyë David mëjwiin kajaa të tyëgoy, ijt seguurë ko Jyobaa yˈixaambyë nety ko të jyantsy jyodëmbity amumduˈukjot.

Mbäät mˈity seguurë ko Jyobaa yëˈë diˈib mas jyaygyujkëp wiˈix mnayjawëty. Biiblyë jyënaˈany: “Naxwinyëdë jäˈäy yëˈëyë yˈijxypy diˈib yˈijxpatypy; perë Jyobaa yëˈë yˈijxypyë korasoon” (1 Samuel 16:7). Jyobaa nyijäˈäwëp tiko duˈun njäˈäyˈäjtëm extëm njäˈäyˈäjtëm, wiˈix ja tääk teety të xytyukninäjxëm, wiˈix të nyaˈk të nbajtëm, pënaty mëët të nyajpatëm ets wiˈix njäˈäyˈäjtëm. Nan yˈijxypy ets yajtsobatypy ko xytyunyë mëjää parë oy mjäˈäyˈatët, oy mbokyjyaˈayëty.

Ko duˈunë Dios tnijawë, ¿wiˈixë net mjotkujkmoˈoyëty?

[Dibujë diˈib mä pajina 5]

“Yëˈë mwiin yˈijx axtë mäjëts ngojtsondaky.” (SALMO 139:16)

DIˈIB MIIMP MÄ NYIˈAK: ¿NAYTYUKJOTMAYTYUUNËBË DIOS MËT MIJTS?

Dios mjotkujkmooyëp

“Dios, diˈibë yajjotkujkëp ja määy täjpëty, yëˈëts xyajjotkujkë.” (2 KORINTɄ 7:6)

¿TIKO NÄÄGË JÄˈÄY KYAJ TMËBËKTË? Ta pënaty mëktaˈaky yˈëxtääytyëp ets yajjotkujkmoˈoyët, per wyinmaytyë ko këˈëmë nety tijaty nyaytyukmëtsokëdë pën yˈamdoodëbë Diosë naybyudëkë ko tpäättë amay jotmay. Tuˈugë toxytyëjk diˈib xyëˈäjtypy Raquel, jyënaˈany: “Kojëts nwinmay ko jantsy nimayë jäˈäy yajpäättë yä Naxwiiny ets ko jantsy mëjwiin kajaa jyotmayëty, duˈunxyëp extëmëts ja nˈamay njotmay kyaj tyim mëjwiin tyim kajaajëty, päätyëts kyaj nˈamdoyë Diosë naybyudëkë”.

¿WIˈIXË BIIBLYË TYUKNIˈˈIXË? Dios të ttuny diˈib mëjwiin kajaa parë tpudëkë jäˈäy ets tjotkujkmoˈoy. Niˈamukë të xynyinäjxëmë poky. Pääty kyaj yajxon nguytyuˈunëmë Diosë yˈanaˈamën. Perë Dios “oj xytsyojkëm es xytyukˈijxëm mët ko xytyuknigajxëm ja yˈUˈunk [Jesukristë] es xyajpojpënitëgoˈoyëm” (1 Fwank 4:10). Mët ko Jesus ojts xykyuˈoˈkëm, Dios mbäät xypyokymyaˈkxëm, nmëdäjtëmë jot winmäˈäny wäˈäts ets njukyˈäjtëm winë xëë winë tiempë mä ja lugäärë tsujpë mä jyamˈatäˈänyë jotkujkˈäjtën.a Nanduˈunë Dios dyajnigëxëˈky ko naytyukjotmaytyuunëp mët mijts ets nanduˈun mët niˈamukë jäˈäy.

Min nˈokˈijxëmë yˈijxpajtënë apostëlë Pablo. Yëˈë myëjjäˈäwë ko Jesus jyuuybyëtsëëmë, pääty tkujäˈäyë: “Kristë [...] yëˈëts xytsyojk es nyayäjkë wintsëˈkën mët ëjtskyëjxm” (Galasyʉ 2:20). Oyë Jesus yˈoˈky mä netyë Pablo kyapanëjkxyëtynyëm, yˈijxë tyäˈädë wintsëˈkën extëmë regalë diˈibë Dios tukmayˈäjtë.

Ko Jesus të nyayakyëty extëm tuˈugë wintsëˈkën, nan yëˈë tuˈugë regalë diˈibë Dios të mdukmayˈatyëty parë dyajnigëxëˈëky ko myajtsobatëp. Tyäˈädë regalë, mbäät “xymyoˈoyëm ja jotkujkˈäjtën winë xëë winë tiempë es ja oybyë diˈibë nˈawijxëm”, ets mbäät xyaˈijtëm mëk mä “tëgekyë diˈibë oy” (2 Tesalónikʉ 2:16, 17).

Per tam nyëjkxnë naa majtsk mil jëmëjtën mä Jesus dyajkyë jyukyˈäjtën. ¿Wiˈix nnijäˈäwëm ko Dios duˈunyëm tyam nyaytyukjotmaytyunyëty mët ëtsäjtëm?

[Notë]

[Dibujë diˈib mä pajina 6]

“Kristë [...] yëˈëts xytsyojk es nyayäjkë wintsëˈkën mët ëjtskyëjxm.” (GALASYɄ 2:20)

“Ni pën mbäät kyaminy mä ëjën pën kyaj dyajminy yëˈë Dios Teety diˈibëts ëj xykyajx.” (FWANK 6:44)

[Dibujë diˈib mä pajina 7]

¿Pën diˈib nyinëjkxtëbë jäˈäy mä jyëën tyëjk o tmëwingondë tuˈääy parë ttukmëtmaytyäˈäktë Dios?