TIJATYË ËNÄˈKTËJK NAYAJTËËWËDËP
¿Tiko jyëjpˈamëty nnuˈkxtakëm?
Mayë ënäˈktëjk jyënäˈändë ko nuˈkxtaktëp, per jeˈeyë näˈäganäˈäty. Pääty waˈan nyayajtëwëdë: “Ko nuˈkxtakëm, ¿yëˈëdaa parë jeˈeyë oy nnayjyäˈäwëm?”.
¿Tidën yˈandijpy ko nuˈkxtakëm?
Yëˈë yˈandijpy ko nmëgäjpxëmë Jyobaa, mëdiˈibë tijaty të dyajkojtääy. Okwinmay: Oyë Jyobaa myëjjëty ets ni tuˈugë naxwinyëdë jäˈäy kyamëbäätyëty, Biiblyë jyënaˈany “ko kyaj jagam yˈity ja Dios. Taa jaˈa mä ëtsäjtëm niduˈuk niduˈuk” (Apostʉlʉty o Hechos 17:27). Päätyë Biiblyë xyˈanmäˈäyëm: “Mëwingondë Dios, es yëˈë nandëˈën mmëwingonëdëp miitsëty” (Santya̱ˈa̱gʉ 4:8).
¿Ti mbäät xytyuuny parë Dios xymyëwingonët?
Ko mnuˈkxtäˈägët. Duˈunë nety Dios xymyëgajpxy.
Ets ko xykyäjpxëdë Biiblyë. Duˈunë nety ja Dios “mmëgajpxyëty”.
Ko mnuˈkxtäˈägët ets mˈëxpëkët duˈunë nety mgajpxy mmaytyaˈaky mëdë Jyobaa ets yëˈë mbudëkëyanëp parë niˈigyë xymyëwingonët.
Jeremy jyënaˈany: “Nitii duˈun kyaˈoyëty extëm ko nmëtmaytyakëmë Jyobaa, mëdiˈibë ijtp jantsy këjxm”.
Miranda jyënaˈany: “Kots ndukmëtmaytyaˈagyë Jyobaa wiˈixëts nnayjyawëty, tats njawë ko wingon yajpääty”.
¿Myëdoobyëdaa Dios kots nmëgajpxy?
Oy xyjyamëbëky ko tamë Dios, mbäät mtsiptakxëty xymyëbëkët pën jyantsy myëdoopy ko xymyëgajpxy. Perë Biiblyë jyënaˈany ko Jyobaa “myëdoowˈijtypyë nuˈkxtakën” (Salmo 65:2). Pääty axtë mˈanmääyëp ets xytyukmëtmaytyäˈägët tëgokyë tijaty mëmääy mëdajpy. ¿Tiko? Jaˈko naytyukjotmaytyuunëp mët mijts (1 Peedrʉ 5:7).
Okwinmay waanë: ¿Mgäjpxp maytyakp janäämëty mëdë mëtnaymyaayëbëty? Pes mbäät nanduˈun mgajpxy mmaytyaˈaky mëdë Dios. Mmëgäjpx janäämëty ets tukmëgäjpxë xyëëw, Jyobaa (Salmo 86:5-7; 88:9). Pesë Biiblyë mˈanmääyëp ets janäämëty xymyënuˈkxtäˈägët (1 Tesalonikʉ 5:17).
Moises jyënaˈany: “Kotsë Dios nmëgajpxy tats nyaˈˈawäˈätsy ja nˈääw njot etsëts ndukmëtmaytyaktäˈäy wiˈixëts nnayjyawëty”.
Karen jyënaˈany: “Yëˈëtsë Jyobaa ndukmëtmaytyakypy mëdiˈibëts kyaj oypyënëty ndukmëtmaytyäˈägët, mëdiˈibëts yëˈëyë ndukmëtmaytyäˈägëbë ndääk o ja nmëtnaymyaayëbëts”.
¿Tijatyëts mbäät ninuˈkxtäägë?
Biiblyë jyënaˈany: “Këdii mmay mdäjtë, nik oy, pën ti tuun jäjtëp, nuˈkxtäˈäktë es amdow pëjktsowdë Dios, es xyjaˈaygyëdäˈäktët nandëˈën” (Filipʉs 4:6).
¿Yëˈë yˈandijpy ko mbäät xytyukmëtmaytyaˈagyë mˈamay mjotmay? ¡Duˈun, mbäät xytyukmëtmaytyaˈaky! Pesë Biiblyë duˈun xyˈanmäˈäyëm: “Tuknijëduwë Jyobaa ja mtsëmy mgëˈëy, ets yëˈë mbudëkëdëp. Ninäˈä tkanasˈixëyaˈany etsë oyjyaˈay kyëdawët” (Salmo 55:22).
¿Per mnijäˈäwëp? Oy ko kyaj jeˈeyë Dios xytyukmëtmaytyäˈägëdë mˈamay mjotmay. Tuˈugë kiixy mëdiˈibë xyëwˈäjtypy Chantelle jyënaˈany: “Kyajxyëp nyigëxëˈëky pën oyëts nnaymyayëty mëdë Jyobaa koxyëbëts jeˈeyë nˈamdoyë naybyudëkë. Nwinmayëts ko mëdiˈibëxyëp jawyiin mbäät nduˈunëm, yëˈë nmoˈoyëmë dioskujuyëm, pes taaˈäjtp jantsy kanäk pëky tijaty mbäät nguˈëw ngukäjpxëm”.
Okwinmay waanë: ¿Tijaty tyam nguˈëw ngukäjpxëp? Mwinmay tëgëëk pëky tijaty mbäät xykyuˈëw xykyukäjpxë ets xymyoˈoyë dyoskujuyëmë Jyobaa.
Anita jyënaˈany: “Kyaj mëjwiin kajaa tyim tsokyëty tijaty nguˈëw ngukäjpxëm, mbäät axtë ko jeˈeyë nˈijxëm tuˈugë pëjy, nmoˈoyëmë dyoskujuyëmë Jyobaa”.
Brian jyënaˈany: “Pawinmay tuˈugë tekstë mëdiˈibë mjantsy yˈoymyëdoopy o ix tijatyë Dios të dyajkojy parë yëˈë xykyuˈëw xykyukäjpxët”.