YAJTËˈËWËN 7
¿Tits ndunëp kots pën xyˈanëëmët etsëts mëët nˈit ntsëënët?
¿TIXYËP MIJTS MDUUMPY?
Okwinmayë tyäˈädë: Heather mëdë Mike ja kujk nyaynyoobyëˈatëdë majtsk poˈo, perë Heather duˈun nyayjawëty extëmxyëp jeky kujkë xyëëw tiempë dyajnäjxnëdë. Xëmë nyaytyuknigaxëdë mensaje ets nyaymyëgäjpxëdë mä telefënë, axtë nyijäˈäwëp wiˈix yˈatsowäˈäny jatuˈuk mä kyajnëm kyäjpxtäˈäy. Per tyam, Mike kyaj jeˈeyë nyekykyäjpxäˈäny nyekymyaytyäˈägäˈäny.
Mike mëdë Heather jeˈeyë tyam nyaygyëˈëmëmatsëdë ets näˈäganäˈäty nyaytsyuˈkxëdë. Heather naa jaayë duˈun tnasˈixë, per nan kyaj tmastuˈudäˈäny ja nyoobyë. Nipën duˈun kyayajnayjawëty jantsy tsuj ets ko extëm yëˈë kyaj pën duˈun. Heather wyinmay: “Pes nnaytsyojkëdëbëts, ¿këdii?”.
Pën të ja mxëëw mjëmëjt tpääty parë xymyëdatëdë mnoobyë, ¿ti mdunëp ko xypyäädëdë duˈumbë jotmay extëmë Heather?
WÄˈKWËˈËMË ETS WINMAY
Ko jäˈäy yˈity tsyëënë, yëˈë tuˈugë regalë diˈibë Dios myoopy pënaty të pyëjknëdë. Ko tsyëënëdë mä kyajnëm pyëktë, kyaj nety dyajtsobäättë. Duˈunxyëp extëm pën nyamoˈoyëty tuˈugë nixuyë oybyë ets jeˈeyë dyajtuny parë tijaty ttukpoˈtnë.
Pën kyaj xymyëjpëjtaˈagyë anaˈamën extëmë ley de la gravedad, mbäät xykyuˈayoˈonbäädë. Nanduˈun jyatäˈäny pën kyaj xymyëmëdoy ja anaˈamën diˈibë Diosë mmooyëp, extëm ko jäˈäy yˈit tsyëënëdë mä kyajnëm pyëktë (1 Tesalónikʉ 4:3).
¿Wiˈix wyimbëtsëmy ko ngamëmëdoˈowëmë tyäˈädë anaˈamën? Biiblyë jyënaˈany: “Ja diˈibë mëˈinduump, myëdëgeepy ja kyëˈëm niniˈx” (1 Korintʉ 6:18). ¿Ti tyäˈädë yˈandijpy?
Të ëxpëkyjyaˈay tˈëxpëjkpëtsëmdë ko nimayë ënäˈktëjk diˈib të yˈit të tsyëënëdë mä kyajnëm pyëktë, kyuˈayoˈowëdëp. Extëm yä yajnigajpxy:
AXËËGË JYOT WYINMÄˈÄNY TJAWËDË. Nimayë ënäˈktëjk diˈib të yˈit të tsyëënëdë mä kyajnëm pyëktë, jyënäˈändë ko kyajxyëp ojts duˈun yˈadëˈëtstë.
KYAJ NYAYTYUKJOTKUJKˈATËDË. Ko duˈun të yˈit të tsyëënëdë mä kyajnëm pyëktë, ta net nääk wyinmaytyë ko tëdaa mëdë wiinkpë të yˈoktsënaabyë.
KYAJ NETY DUˈUN TˈAWIXTË. Nimayë toˈoxyˈënäˈk yëˈë jyatsojktëp parë pën tsuj yajxon kyuentˈatëdët ets kyaj parë jeˈeyë yajtukxiˈiktët. Ets mayë yaˈayˈënäˈk kyaj tˈoktsojknëdë duˈumbë toˈoxyˈënäˈk diˈib pojën nayäjkëp.
Extëm të nˈijxëm: pën mˈijtp mtsënaapy mä kyajnëm mbëky, kyaj nety këˈëm mnaymyëjˈixyëty (Romanʉs 1:24). ¡Këdii mnayakyëty! Pes mëjwiin kajaa tsyobäätyë mniniˈkx mgëbäjk.
Këdii mnayakyëty parë pën mëët mˈit mtsëënët mä kyajnëm mbëky (1 Tesalónikʉ 4:3). Ko nety të mbëjknë, ta mˈit mtsëënët. Ets mbäädë net xytyukxondaˈaky, kyaj mtsëˈëk mjawët, kyaj mmay mdäjët ets kyaj ja mjot mwinmäˈäny axëëk xyjawët, pes duˈun nyayjawëdë pënaty jawyiin ijt tsënääytyëp mä kyajnëm pyëktë (Proverbios 7:22, 23; 1 Korintʉ 7:3).
¿WIˈIX MWINMAY?
Pën tuˈugë jäˈäy mjantsy tsyojkëp, ¿këdii yëˈë mdukmëtsojkëp parë oy mnayjawëdët ets myajpäädët agujk jotkujk?
Ets pën tuˈugë jäˈäy jantsy naytyukjotmaytyuunëp mët mijts, ¿mˈanëˈëmxëdëp parë ti xytyunët diˈib mbäät mdukmëjagamgeˈegyëtyë Jyobaa? (Ebreeʉsʉty 13:4).