Winˈix yajxon ja mmëtnaymyaayëbë

Ko nyajpatëm mëdë nmëtnaymyaayëbëˈäjtëm mä nˈagujkˈäjt njotkujkˈäjtëm, ta niˈigyë jotkujk nnayjyäˈäwëm ets ko nyajnäjxëmë amay jotmay kyaj nëgoo ndimymyëkjäˈäwëm. Per tsojkëp nnaygyuentëˈäjtëm, pesë Biiblyë jyënaˈany ko kyaj niˈamukë jäˈäy oy jyaˈayˈattë parë mëët nnaymyaˈayëm. Pääty, ¿wiˈix mbäät nwinˈijxëm ja mëtnaymyaayëbë? Min nˈokˈijxëm.

1. ¿Wiˈix mbäät mbudëkëty o myajmäˈätyëty ja mmëtnaymyaayëbë?

Mbäät xynyinäjxëm wiˈixë jäˈäy jyaˈayˈaty mëdiˈibë mët ja xëëw tiempë nyajnäjxëm. Duˈun mä redes sociales ets nanduˈun mëdiˈibë mëët ndimyjyëdijtëm. Mä Biiblyë duˈun jyënaˈany: “Pën näjx tëjkëp mëdë jäˈäyë kuwijypyë nanduˈun jyëmbitäˈäny kuwijy, per mëdiˈibë näjx tëjkëp mëdë jäˈäy mëdiˈibë kyaj jyapëtyë jyot wyinmäˈäny [o pënaty kyaj ttsoktë Jyobaa] axëëk jyatäˈäny” (Proverbios 13:20). Ja mmëtnaymyaayëbë mëdiˈibë tsyojkypyë Jyobaa ets myëduumpy, mbäät mbudëkëty parë xymyëwingonët ets xytyunët mëdiˈibë oy. Per pën mijts yëˈë mˈoyjyäˈäwëp ja jäˈäy mëdiˈibë kyaj tmëdunyë Jyobaa, mbäät mdukmëjagamgeˈegyëty. Päätyënë Biiblyë xyˈanmäˈäyëm ets nˈijxëm yajxon pën mëët nnaymyayäˈänëm. Pes ko ja nmëtnaymyaayëbëˈäjtëm ttsoktë Dios, ndukˈoyˈäjtëm niˈamukë, ets duˈun mbäät nmëmëdoˈowëmë yäˈädë käjpxwijën: “Naybyudëkëdë nixim niyam es yajmëjwiin yajkajaajëdë ja mmëbëjkënëty” (1 Tesalónikʉ 5:11).

2. ¿Wiˈixë Jyobaa nyayjyawëty ko tˈixy pënaty mëët mnaymyayëty?

Jyobaa wyinˈijxypy yajxonë myëtnaymyaayëbë, ets “jantsy oy mëët nyaymyayëty ja jäˈäy mëdiˈibë oy tijaty tyuumpy” (Proverbios 3:32). ¿Wiˈixëdaa Jyobaa nyayjyawëyaˈanyëty ko nnaymyaˈayëm mëdë jäˈäy mëdiˈibë kyaj tsyokyëty? ¡Axëëk nyayjyawëyaˈanyëty! (Käjpxë Santya̱ˈa̱gʉ 4:4). Per agujk jotkujk nyayjyawëyaˈanyëty ets xymyëtnaymyaayëbëˈatäˈänëm ko nˈoyjyäˈäwëm pënaty yëˈë tsojkëp ets ko njëjpkudijëm pënaty xyajmäˈädäˈänëm (Salmo 15:1-4).

AK NIJAWË NIˈIGYË

3. Kyaj mnaymyayëdët mëdë jäˈäy mëdiˈibë mbäät myajmäˈätyëty

Ja mëtnaymyaayëbë mëdiˈibë xyajmäˈädäˈänëm, kyaj ttsoktë Dios ets kyaj tmëmëdoowëdë yˈanaˈamën. Ixtë BIDEO ets nimaytyäˈäktë mëdiˈibë yä yajtëëpy:

BIDEO: Wiˈix mbäät njëjpkudijëmë axëëkpë mëtnaymyaayëbë (6:17)

• ¿Wiˈix mbäät nnaymyaaybyëjkëm mëdë jäˈäy mëdiˈibë xyajmäˈädäˈänëm ets kyaj nbëjkëmë kuentë?

Käjpxtë 1 Korintʉ 15:33 ets nimaytyäˈäktë mëdiˈibë yä yajtëëpy:

• Ko mˈokwinmay, ¿pënaty mjënäˈänëp ko kyaj yˈoyëty ets mëët mnaymyayëdët? ¿Ets tiko?

Käjpxtë Salmo 119:63 ets nimaytyäˈäktë mëdiˈibë yä yajtëëpy:

• ¿Pën mbäät xywyinˈixy extëmë mëtnaymyaayëbë?

4. Mbäät nnaymyaˈayëm mëdë jäˈäy mëdiˈibë kyaj mëët nduknaxˈäjtëm

Biiblyë myaytyakypyë David mëdë Jonatán, mëdiˈibë jukyˈäjttë jam Israel. Jantsy oy nyaymyaayëdë, oyë netyë Jonatán myëjjëty ets yˈuˈunkˈatyëty ja rey. Käjpxtë 1 Samuel 18:1 ets nimaytyäˈäktë mëdiˈibë yä yajtëëpy:

• ¿Wiˈix xytyukˈijxëmë yäˈädë tekstë ko kyaj tyimtsokyëty nmëtnaymyaayëbëˈäjtëm pënaty mëët tyuknaxëty ja xëëw jëmëjt o ja jukyˈäjt madakën?

Käjpxtë Romanos 1:11, 12, TNM ets nimaytyäˈäktë mëdiˈibë yä yajtëëpy:

• ¿Wiˈix nyaymyëjääwmoˈoyëdë ko nyaymyayëdë pënaty tsyojktëbë Jyobaa?

¿Wiˈix tuˈugë mixy tpatyë myëtnaymyaayëbë mä nety kyaj ttimyˈëwxity ttimyjyëjpˈixy? Ixtë BIDEO ets nimaytyäˈäktë mëdiˈibë yä yajtëëpy:

BIDEO: Mbäät xypyaatyë mëtnaymyaayëbë mä kyaj mdimwinmay (5:06)

• ¿Tiko jyotmaytyuktëjkëdë ja tyääk tyeetyë Akil ko naymyaaybyëjkë mëdë myëëˈeskuelëˈënäˈk?

• ¿Tiko Akil nyaymyaaybyëjkë mëdë yäˈädë ënäˈkëty?

• ¿Ti tyuun parë kyaj nyekynyayjyäˈäwë naytyuˈuk?

5. Wiˈix mbäät nbatëmë oybyë mëtnaymyaayëbë

BIDEO: ¿Pënën yajtijp ja jaantsypyë mëtnaymyaayëbë? (4:14)

Käjpxtë Proverbios 17:17 etsë 27:17, ets nimaytyäˈäktë mëdiˈibë yä yajtëëpy:

• ¿Wiˈix nyaybyudëkëdë pënaty jantsy naymyaayëdëp?

• ¿Jamë mmëtnaymyaayëbë extëm yajmaytyaˈaky mä Proverbios? Pën kyaj, ¿ti mbäät xytyuny parë xypyäädëdë duˈumbë mmëtnaymyaayëbë?

Käjpxtë Filipʉs 2:4 ets nimaytyäˈäktë mëdiˈibë yä yajtëëpy:

• Parë xypyäädëdë oybyë mmëtnaymyaayëbë, tsojkëp jawyiin mˈitët extëm tuˈugë oybyë mëtnaymyaayëbë. ¿Ti mbäät xytyuny?

TI TË NJÄJTËM

Ko nwinˈijxëm yajxon pënaty mëët nnaymyayäˈänëm, ndukˈoyˈäjtëm ets jotkujk nyajnayjyäˈäwëmë Jyobaa.

Ajamyatsë

• ¿Wiˈixë Jyobaa nyayjyawëty ko tˈixy pënaty mëët mnaymyayëty?

• ¿Pënaty kyaj yˈoyëty mëët nnaymyaˈayëm?

• ¿Ti mbäät xytyuny parë mnaymyaaybyëkëdët mëdë jäˈäy mëdiˈibë tsyojktëbë Dios?

AK PAYEˈEY

Nijawë wiˈix mbäät xypyudëjkëmë nmëtnaymyaayëbëˈäjtëm ko nbatëmë ayoˈon jotmay.

“Nˈokˈyajkëktëjkëmë naymyayë mä kyajäˈtynyëmë ayoˈon” (Diˈib Xytyukˈawäˈänëm, nobiembrë 2019)

Nijawë ti mbäät xytyuny parë xypyäädëdë oybyë mëtnaymyaayëbë.

“¿Wiˈix jyaˈayˈattë ja oybyë mëtnaymyaayëbë?” (Lo que los jóvenes preguntan. Respuestas prácticas [volumen 1], kapitulo 8)

¿Tijaty mbäät xynyijawë pën mmëdäjtypyë mmëtnaymyaayëbë mä redes sociales?

Pën myajtuumbyë redes sociales, këdii mnaytyukwinˈëënyëty 4:12

Käjpxë yäˈädë eksperiensyë parë xynyijawët tiko yäˈädë yetyëjk dyajtëgäjtsyë myëtnaymyaayëbëty, mä jyënaˈany “Njantsy jamëdatanëts tuˈugë ndeety”.

“Biiblyë yëˈë yajtëgäjtsëdë jyukyˈäjtën” (Myiny mä Diˈib Xytyukˈawäˈänëm)