Mëdiˈibë nääk të nyayajtëwëdë

¿Ti Pablo myaytyäˈägan ko jyënany “duˈunxyëp extëmëts të nmaxuˈunkˈaty mäts ngapoˈobäätynyëm”? (1 Corintios 15:8, TNM).

Pablo jyënany: “Tim ok, ta ojts kyëxëˈëky mä ëjtsën, pes ëjts duˈunxyëp extëmëts të nmaxuˈunkˈaty mäts ngapoˈobäätynyëm” (1 Cor. 15:8, TNM). Ko duˈun jyënany, yëˈë nety myaytyäˈägaampy ko Jesus tˈijxy jam tsäjpotm. Per ¿tiko jyënany “duˈunxyëp extëmëts të nmaxuˈunkˈaty mäts ngapoˈobäätynyëm”? Tëëyëp duˈun netyë yajjaygyukë ko duˈunxyëp extëmë Pablo myaxuˈunkˈäjty, o jyukypyejky mä kyaj ttiempëty parë nyëjkxët tsäjpotm. Per ko yäˈädë tekstë të yaˈëxpëky këkpäät, ta të yaˈixy ko tsojkëp yajkäjpxˈoyët.

Pääty, ¿ti Pablo myaytyäˈägan ko jyënany “duˈunxyëp extëmëts të nmaxuˈunkˈaty mäts ngapoˈobäätynyëm”? Taaˈäjtp jyawë kanäk pëky tiko duˈun jyënany.

Ajotkumonë tyëgäjtsyë jyukyˈäjtën axtë ojts wyiintsë. Ko tuˈugë uˈunk myaxuˈunkˈaty mëdiˈibë kyajnëm pyoˈobääty, ajotkumonë myiny jyaˈty. Saulo, mëdiˈibë ok yaˈijxyˈäjt extëmë Pablo, jamë nety nyëjkxy Damasco parë tˈaxëktunäˈäny ja Diosmëduumbëty, per kyaj tyim winmääy nyaybyäädëdët mëdë Jesus mëdiˈibë nety të jyukypyeky. Pablo yajmonyˈijx yajmonyjyäˈäwë ko ajotkumonë ja jyukyˈäjtën tyëgäjtsy, per nanduˈun myonyˈijx myonyjyäˈäwëdë ja Diosmëduumbëty mëdiˈibë nety nëjkx tˈaxëktunäˈäny. Ko Pablo tˈijxyë Jesus, tim tëgäjtsë jyukyˈäjtën axtë tëgëk xëëw yˈijty wiints (Apos. 9:1-9, 17-19).

“Kyajnëmë netyë tiempë tpääty” ko dyajtëgäjtsyë jyukyˈäjtën. Ko mä ayuk grieegë tkäjpxnaxy, “myaxuˈunkˈaty mä kyajnëm pyoˈobääty”, mbäät nanduˈun yajkäjpxnaxy extëm “ko tuˈugë uˈunk myaxuˈunkˈaty mä kyajnëmë tiempë tpääty”. Ko Pablo dyajtëgäjtsyë jyukyˈäjtën të netyë Jesus jyëmbijnë tsäjpotm. Ja wiinkpë Diosmëduumbëty mëdiˈibë Pablo myaytyak mä yäˈädë tekstë të nety tˈixtë ko Jesus të jyukypyeky, per yëˈë kyajnëmë nety tˈixy mäjuˈunëm jyukypyejkyë Jesus (1 Kor. 15:4-8). Jaanëm ojts tˈixy ko ajotkumonë ojts myëgajpxyëty, oyë netyë Pablo jyawinmay “ko kyajnëm ttiempëty”.

Ko Pablo duˈun jyënany kyaj yëˈëjëty ko mëj këjxm nyayajnaxanë. Näägë ëxpëkyjyaˈaytyëjk jyënäˈändë ko Pablo kyaj oy nyaynyimaytyakë ko jyënany jats “të nmaxuˈunkˈaty mäts ngapoˈobäätynyëm”. Pën jantsy duˈun, duˈunxyëp extëm jyënany ko kyaj pyaaty nyitëkëty etsë Jesus yˈapostëlëˈatëdët. Duˈun yˈakjënany: “Ëjtsë dëˈën extëm tim ëxˈokpë mä yëˈë tadë apostëlëty, es ni jeˈeyëts xykyanitëkë esëts xyˈanëëmët apostëlë, jaˈa kots ëj nbajëdijtyëts yëˈë Diosë jyaˈayëty. Perë Dios tëts xymyayˈaty xykyuniˈxy esëts xypyëjtaky extëmë apostëlë” (1 Kor. 15:9, 10).

Mëdiˈibën jyawë Pablo myaytyäˈägan, yëˈko ajotkumonë tyëgäjtsyë jyukyˈäjtën ko tˈijxyë Jesus o ko kyaj nety pyaaty nyitëkëty parë yajwinˈixët extëmë apostëlë. Pablo kyaj nety ttimyjyëjpˈixy ets ajotkumonë tyëgatsëdë jyukyˈäjtën, per ko Jesus ojts myëgajpxyëty, ta tˈijxy ko të nety jyukypyeky. Pääty ko ojts yˈëwaˈkxy kyäjpxwaˈkxy, yëˈë xëmë nyimaytyak ko Jesus jyukypyejky (Apos. 22:6-11; 26:13-18).