Nnayjëjpkuwijtsëm këˈëm: tuˈugë jäˈäyˈäjtën diˈib tyukjotkëdakypyë jyobaa

Paul jyënaˈany: “Kots mëdë nbrimë ndëjkë nayˈoj nayaxëbë, tats nˈyoˈkmëmäjtsë etsëts njayoˈkpanany. Njayaˈooganëts”.

Marco jyënaˈany: “Kots ijty pën yiˈin waanë xyyajjotˈambëky mätsë ndëjk, ndukwojpëbëts tijaty extëmë meesë, siyë etsë uˈunkˈiˈk o tijatyëts ndimpatypy”.

Waˈan ëtsäjtëm kyaj duˈun ndimjotˈambëjkëm extëmë Paul mëdë Marco. Per näˈäty, niˈamukë xytsyiptakxëm nayjëjpkuwijtsëm. ¿Tiko? Tuk pëky, yëˈko Adán ojts xytyukninäjxëm ja poky kaytyey (Rom. 5:12). Ta näägë nmëguˈukˈäjtëm diˈib tsiptakxëdëp nyayjëjpkuwitsëdët ko jyotˈambëktë, duˈun extëmë Paul mëdë Marco. Ets ta wiinkpëty diˈib wyinmääyˈadëtstëp tijaty atsëˈëk ajäˈäwëdëp o tijaty axëëk yajnayjyäˈäwëdëp. Nan ta diˈib tsiptakxëdëp tjëjpkuwäˈägëdët ko tyukminëdë ja axëëkpë tsojkën mä ijt tsënaaky o mä dyajtundë droogë, nan ta diˈib tsiptakxëdëp nyayjyëjpkuwitsëdët parë kyaj dyajniˈigyëdët ja nëë.

Pënaty naytyukmënëjkxëdëp ja jyot wyinmäˈäny, ja tsyojkën ets tijaty tyuundëp, mbäät dyajmäˈättë ja jyukyˈäjtën. ¿Ti mbäät xypyudëjkëm parë kyaj duˈun njäjtëm? Ko nnayjyëjpkuwijtsëm këˈëm. Parë mbäät duˈun nduˈunëm, min nˈokˈijxëmë tyäˈädë tëgëëkpë yajtëˈëwën. Myëduˈuk, ¿ti yˈandijpy nnayjyëjpkuwijtsëm këˈëm? Myëmajtsk, ¿tiko jyëjpˈamëty? Ets myëdëgëëk, ¿ti mbäät nduˈunëm parë nyajnigëxëˈkëmë tyäˈädë jäˈäyˈäjtën diˈib “yajkypyë Diosë myëjääw”? (Gál. 5:22, 23, TNM). Ta net nˈixäˈänëm ti mbäät nduˈunëm niduˈuk niduˈuk pën xytsyiptakxëm nnayjyëjpkuwijtsëm këˈëm.

¿TI YˈANDIJPY NNAYJYËJPKUWIJTSËM KËˈËM?

Tuˈugë jäˈäy diˈib nayjëjpkuwijtsëp këˈëm, kyaj nyaytyukˈaneˈemyëty ti tsyojkypy ets ti tyunaampy. Jyëjpkuwijtsëp ja yˈääw yˈayuk ets kyaj ttuny tijatyë Dios kyaj ttukjotkëdaˈaky.

Jesus pyëjtakë ijxpajtën tidën yˈandijpy nnayjyëjpkuwijtsëm këˈëm. Biiblyë jyënaˈany: “Ko pën wixaty yˈanmääyë, kyaj wixaty yˈatsoojëmbijty; ko tsyaatsytyuunëdë, kyaj tˈatsëˈkëdë, jeˈeyë ttukkëdëjkë ja Dios, diˈibë pyayeˈepy mët ja tëyˈäjtën” (1 Peed. 2:23). Jesus yajnigëxëˈkë tyäˈädë jäˈäyˈäjtën mä nety të yajkëxwopy kepykyëjxy ets ja myëtsipëty nyëxiˈik tyukxiˈigëdë (Mat. 27:39-44). Nan mëjwiin kajaa nyayjëjpkuwijtsë këˈëm ko ja diˈib nyiwintsënˈäjttëbë relijyonk tjaˈëxtääytyë winmäˈäny “wiˈix mbäät dyaˈˈanëgugäˈädë” (Mat. 22:15-22). Ets ko tëgok tyukjotˈambëjkëdë tuk grupë judiyëtëjk ets tsyäägäˈtsëdë, yëˈë kyaj dyajjëmbijty, niˈigyë “nyayyuˈtsë es tsyoˈony mä ja mëj tsäjptëjk”, duˈun dyajkyë oybyë ijxpajtën (Fwank 8:57-59).

¿Mbäät nbanëjkxëbë Jesusë yˈijxpajtën? Mbäät, axtë nuˈun nmadakëm. Apostëlë Pedro duˈun tkujäˈäyë: “Kristë yˈayooy mët ëtsäjtëmgyëjxm, es xymyoˈoyëm tuˈugë ijxpajtën es nbaduˈunëm yëˈë” (1 Peed. 2:21). Oy nyajpatëm pokyjyaˈay, mbäät nbanëjkxëmë Jesusë yˈijxpajtën axtë mäbäät nmadakëm. ¿Tiko jyëjpˈamëty duˈun nduˈunëm?

¿TIKO JYËJPˈAMËTY NNAYJYËJPKUWIJTSËM KËˈËM?

Pën nyajjotkujkˈatäˈänëmë Jyobaa, tsojkëp nnayjyëjpkuwijtsëm këˈëm. Pes mbäät nmëjagamgakëm pën kyaj njëjpkuwijtsëm ja ääw ayuk ets tijaty nduˈunëm, oy nuˈun jeky kujk njamëduˈunënë.

Min nˈokˈijxëmë yˈijxpajtënë Moisés, diˈib yajnimaytyakp ko “yää naxwiiny ni pën ënety duˈun kyätëdaˈagyëty, ta yëˈë” (Núm. 12:3, MNM). Moisés jantsy kanäk jëmëjt tmëmaˈkxtujky ja israelitëty ko yˈabajt kyutujktë. Per tëgok, këjx ja myaˈkxtujkën ets tyukjotˈambëjk mët ko jatëgok tyëjkëdë abajt kutujkpë ko kyaj ti nëë. Duˈun ojts tmëkmëgajpxy: “Mëdowdë yajxon miitsëty kujuundëjkëty. ¿Jaˈajëdun miits xytsyoktë, ets ënet ëëts yëˈë nëë nyajpëtsëmdëty jap tsääjoty ets mnëëˈuuktëtyë?” (Núm. 20:2-11, MNM).

Moisés kyaj nyayjyëjpkuwijtsë këˈëm. Pes kyaj yëˈë dyajmëjpëtsëëmyë Jyobaa diˈib yajpëtsëëm ja nëë mëjˈäjtëngyëjxm (Sal. 106:32, 33). Päätykyëjxmë Jyobaa kyaj tnasˈijxë parë Moisés tyëkët mä ja Nax diˈib Yajtukwandaktë (Núm. 20:12). Seguurë ko nuˈunë Moisés tˈakˈyajnäjxyë xyëëw jyukyˈäjtën, mëk tjäˈäwë ko kyaj nyayjyëjpkuwijtsë këˈëm (Deut. 3:23-27).

¿Ti tyäˈädë xytyukniˈˈijxëm? Ko oy nuˈun jeky kujk nmëduˈunënë Jyobaa, ninäˈä mbäät ngayajpëtsëˈëmëmë ääw ayuk diˈib yajtëgoyëbë mayˈäjt wintsëˈkën mä ja diˈib xyyajjotˈambëjkëm o ja diˈib yajjëjpwijtsëmbijtp (Éfes. 4:32; Kol. 3:12). Ko jäˈäy myëjjäˈäyënë, mbäät kyaj tˈokmëdäjnë maˈkxtujkën. Mët tëgokpë jeˈeyë kyaj nnayjyëjpkuwijtsëm këˈëm, mbäädë net nyajnimäˈtëm nuˈun jeky kujk nmëduˈunënë Jyobaa, pes nˈokjamyajtsëm wiˈix jyajtyë Moisés. Pääty, ¿ti mbäät nduˈunëm parë nyajnigëxëˈkëmë tyäˈädë jäˈäyˈäjtën diˈib jantsy jëjpˈam?

¿TI MBÄÄT NDUˈUNËM PARË NNAYJYËJPKUWIJTSËM KËˈËM?

Nˈokˈamdoˈowëmë Diosë myëjääw. ¿Tiko mbäät duˈun nduˈunëm? Yëˈko nnayjyëjpkuwijtsëm këˈëm, yëˈë tuˈugë jäˈäyˈäjtën diˈib yajkypyë Diosë myëjääw (Luk. 11:13). Mët ko xypyudëjkëmë espiritë santë, Jyobaa xymyoˈoyëmë jot mëjääw diˈib nyajtëgoyˈäjtëm parë nyaˈijxëmë tyäˈädë jäˈäyˈäjtën (Filip. 4:13, TNM). Nan mbäät xypyudëjkëm parë nyajnigëxëˈkëmë wiinkpë jäˈäyˈäjtën diˈib yajkypyë espiritë santë extëmë tsojkën, diˈib xypyudëkëyäˈänëm parë kyaj xytsyiptakxëm nnayjyëjpkuwijtsëm këˈëm (1 Kor. 13:5).

Nˈokjëjpkudijëm tijaty kyaj xypyudëkëyäˈänëm parë nnayjyëjpkuwijtsëm këˈëm. Extëm nˈokpëjtakëm, kyaj nˈëxtäˈäyëmë sitio mä Internet parë nˈijxëm mä jäˈäy axëëgë jyukyˈäjtën dyajnëjkxtë, nan kyaj nˈijxëmë ixy jawë diˈib yajmëjwindëjkëbë axëëkpë jäˈäyˈäjtën (Éfes. 5:3, 4). Tsojkëp netyë nmëjagamgakëm tukëˈëyë diˈib mbäät xytyuktuˈunëm diˈib kyaj yˈoyëty (Prov. 22:3; 1 Kor. 6:12). Extëm nˈokpëjtakëm, pën tuˈugë jäˈäy yajtëgoyanëp ja nyax nyiˈkx, oy ko kyaj tkäjpxëdë liibrë o tˈixëdë pelikula mä pyëtsëmyë yetyëjk etsë toxytyëjk diˈib naytsyojkëdëp.

Waˈan xytsyiptäˈägäˈänxëm nbanëjkxëmë tyäˈädë käjpxwijën (2 Peed. 1:5-8). Per pën nduˈunëmë mëjääw, Jyobaa xypyudëkëyäˈänëm parë kyaj xymyëmadakëm tijaty xyyajtëgoyäˈänëm. Xypyudëkëyäˈänëm parë njëjpkuwijtsëm ja jot winmäˈäny, ja ääw ayuk ets tijaty nduˈunëm. Ets mbäät nnayjyëjpkuwijtsëm këˈëm, duˈun extëm ttuundë Paul mëdë Marco, diˈib të yˈokˈyajmaytyakpëdë. Min nˈokˈijxëmë yˈijxpajtën tuˈugë nmëguˈukˈäjtëm diˈib ijty pojën jotˈambëjkp mä jam yajkarrëyoˈoy. Axtë nayˈooj nayaxëp mët ja jäˈäy diˈib nanduˈun yajkarrëyoˈoytyëp. ¿Ti pudëjkë parë dyajtëgäjtsyë jyaˈayˈäjtën? Yëˈë jyënaˈany: “Bom bomëtsë Jyobaa nmënuˈkxtaky winë ääw winë jot. Nˈëxpëjkëtsë artikulo diˈib myaytyakypy wiˈix mbäät nnayjyëjpkuwijtsëm këˈëm ets njäjtëtsë tekstë agëbajky diˈibëts mbäät xypyudëkë. Kanäk jëmëjtëts kujk xytsyiptakxëty, per duˈunyëmëts xypyudëkë kots njamyetsy jopy jopy ko kyaj tikots njotˈambëkët. Ets kots muum nyajjëjpˈixy, tsojkëts ntsoony parëts kyaj nëjkxët jäjt oˈkp”.

¿ETS PËN KYAJ NMADAKËM NNAYJYËJPKUWIJTSËM KËˈËM?

Näˈäty, mbäät kyaj nmadakëm nnayjyëjpkuwijtsëm këˈëm. Ko duˈun njäjtëm, mbäädë net nnayjyäˈäwëm ko kyaj xypyat xynyitëjkëm nmënuˈkxtakëmë Jyobaa. Per jaajën mä mas niˈigyë tsyokyëty nmënuˈkxtakëm. Nˈokpëjktsoˈowëmë Jyobaa parë xypyokymyaˈkxëm, nˈokˈanmäˈäyëm parë xypyudëjkëm ets nˈokpëjtakëmë jot winmäˈäny parë kyaj jatëgok nduˈunëmbijtëm diˈibë nety të xyyajtëgoˈoyëm (Sal. 51:9-11). Yëˈë myëdoowˈitaampy ja nnuˈkxtakënˈäjtëm pën amumduˈukjot nˈamdoˈowëm parë xypyaˈˈayoˈowëm (Sal. 102:17). Apostëlë Juan xytyukjamyajtsëm ko “Jesukristë nyeˈpyny xyajwatsëm mët tëgekyë nbojpëˈäjtëm” (1 Fwank 1:7; 2:1; Sal. 86:5). Nˈokjamyajtsëm ko Jyobaa xyˈanmäˈäyëm parë nmaˈkxëmë nmëguˈukˈäjtëm janääm jatsojk. Pääty, mbäät nˈijtëm seguurë ko yëˈë nanduˈun xymyaˈkxäˈänëm (Mat. 18:21, 22; Col. 3:13, TNM).

Jyobaa kyaj tˈoyjyäˈäwë ko Moisés tuk pojënë kyanayjyëjpkuwijtsë mä ja lugäärë äänëˈëk tëtsëˈëkpë, per myaˈkx. Pes mä Biiblyë yajmaytyaˈagyë Moisés extëm tuˈugë ijxpajtën mët ko dyaˈijxë mëbëjkën (Deut. 34:10; Eb. 11:24-28). Jyobaa kyaj tnasˈijxë etsë Moisés tyëkët mä ja Nax diˈib Yajtukwandaktë, per nyasˈixëyaampy parë jyukyˈatët winë xëëw winë tiempë mä ja it lugäärë tsujpë diˈib miimp këdakp. Ëtsäjtëm, nan nëjkxëp jam njukyˈäjtëm pën nduˈunëmë mëjääw parë nnayjyëjpkuwijtsëm këˈëm (1 Kor. 9:25).