Yëˈë të xytyuknijäˈäyëm Diˈib wyoowˈyoˈoytyëbë Jyobaa tyestiigëty

“Taaxyëp miitsëty mjayaˈëxpëjknë mä wiinkpëty” (Eb. 5:12). ¡Okwinmay! Jyobaa diˈib mas oy Yaˈëxpëjkp, xyˈanmäˈäyëm parë ndukniˈˈijxëm ja wiinkpëty diˈib të nnijäˈäwëm. Jantsy oyë tyäˈädë tuunk diˈib të nyajtuknipëjkëm ets kyaj yˈoynyatiduungëty ko ndukniˈˈijxëmë wiinkpë mä pënën Jyobaa, duˈun mä familyë, mä tuˈukmujkën o mä nˈëwäˈkx ngäjpxwäˈkxëm. Per ¿ti mbäät nduˈunëm parë oyë jäˈäy nyaˈëxpëjkëm?

Tyäˈädë yaˈˈatsoowëmbity extëmë Pablo tˈanmääyë Timoteo: “Tukwingugäjxëdë es käjxwäˈx ja Diosë jyaaybyajtën, es xyaˈëxpëktë”. Ets ta tˈakˈanmääy: “Dëˈënyëmë dëˈën xytyunët, es dëˈën nëjx mnitseˈeky es nandëˈën diˈibaty mmëmëdoojëdëp” (1 Tim. 4:13, 16). Ko nˈëwäˈkx ngäjpxwäˈkxëm, mbäädë jäˈäy nyitsoˈoky. Pääty jëjpˈam ets nduˈunëmë mëjääw parë oy nekykyäjpxëm ets oyë jäˈäy nyaˈëxpëjkëm. Tyäˈädë foyetë yëˈë xypyudëkëyäˈänëm parë duˈun nduˈunëm. Min nˈokˈijxëm tuk pëky majtsk pëky wiˈix myiny.

Mä tuˈuk tuˈugë pajina myiny tuˈugë tekstë diˈib yajkypyë käjpxwijën o tmëminy tuˈugë ijxpajtën diˈib mëët nyaymyënëjkxyëty mä ti yajmaytyäˈägäämp.

Jyobaa yëˈë diˈib jantsy oy yaˈëxpëjkp (Is. 30:20). Tyäˈädë foyetë mbudëkëyanëp parë niˈigyë xyjatët mletrëkäjpxët ets myaˈëxpëkët, per jamyats ko diˈib nigäjpx nimaytyakëm jam tsyoony mä Jyobaa ets yëˈë diˈib myëjwoobyë jäˈäy (Fwank 6:44). Pääty, amdow janääm jatsojkë Diosë myëjääw. Yajtunë Biiblyë koogoo xyˈixët ko mbäät xyyajtuny. Yajmëjpëtsëm xëmë Jyobaa ets kyaj mijts mnayajmëjpëtsëmëdët. Pudëkë ja jäˈäy parë ttsoktët amumduˈukjotë Jyobaa.

Dios yëˈë të mëjwoyëty parë xytyunëdë tyäˈädë tuunk diˈib mas jëjpˈam ets diˈib ninäˈänëm duˈun kyayajtuny. Ijttëbëts seguurë ko pën mijts mdukˈijxpejtypy “ja mëkˈäjtën diˈibë Dios” yajkypy, nëjkxëp duˈun xytyuny (1 Peed. 4:11).

Yëˈë mëguˈuktëjkëty diˈib mëët mduunmuktë,

Diʼib wyoowʼyoʼoytyëbë Jyobaa tyestiigëty