¿Wiˈixë jukyˈäjtën tsyondaky?

Biiblyë jyënaˈany: “[Dios] mijtsë dëˈën të xyajkojtäˈäy tëgekyë diˈibë ijtp” (Diˈibʉ Jatanʉp o Apocalipsis 4:11). ¿Mmëbëjkypy ko duˈunë Biiblyë jyënaˈany? Näägë jäˈäy jyënäˈändë ko duˈunyë jukyˈäjtën ojts kyëxëˈëky ets ko kyaj pën ojts dyajkojy. Pën jantsy duˈun, pes nanëgoobën yä njukyˈäjtëm. Per pën yëˈë Jyobaa ojts xyajkojëm, tam tiko yä xyajjukyˈäjtëm, ¿këdii?a Min nˈokˈijxëm wiˈixë Biiblyë tnimaytyaˈaky tsyonëˈky tsyondakyë jukyˈäjtën ets tiko mbäät xymyëbëky.

1. ¿Pën ojts dyajkojˈyë tsäjp etsë Naxwinyëdë?

Biiblyë jyënaˈany: “Ko tsyonëˈky tsyondaky, [...] Dios yëˈë ojts dyajkojy ëgäˈäny yëˈë tsäjp ets yëˈë naxwinyëdë” (Génesis 1:1, MNM). Mayë ëxpëkyjyaˈaytyëjk kyupëjktëp nanduˈun ko tsonëˈk tsondakë tsäjp etsë Naxwinyëdë. Per ¿wiˈixë Dios tijaty dyajkojtääy? Yëˈë yajtuunë yˈespiritë santë o ja myëjääw parë ojts dyajkojy tijaty jaˈäjtp yä Naxwiiny ets jam tsäjpotm, extëmë Xëëw, Poˈo etsë may myëtsäˈä (Génesis 1:2).

2. ¿Tiko Dios ojts dyajkojˈyë Naxwinyëdë?

Jyobaa “kyaj nanëgoobë të dyajkojy, yëˈë duˈun të dyajkojy parë yajtuktsëënët” (Isaías 45:18). Jantsy oy jantsy tsuj ojts dyajkojˈyë Naxwinyëdë, duˈun extëm mbäädë jäˈäy ttuktsëënëdë winë xëëw (käjpxë Isaías 40:28 etsë Apostʉlʉty o Hechos 17:24, 25). Ëxpëkyjyaˈay jyënäˈändë ko yäˈädë it Naxwinyëdë mëdiˈibë nduktsënäˈäyëm nëgooyë yˈoyˈäjnë, ets ko kyaj tpäättë wiinkpë planetë mä mbäädë naxwinyëdë jäˈäy jyukyˈaty.

3. ¿Tiko tyëgatsyëtyë naxwinyëdë jäˈäy mëdë jëyujk animal?

Ko Jyobaa dyajkojtääyë Naxwinyëdë, ta net ojts dyajkojy tijaty jaa jukyˈäjtp. Tim jawyiin yëˈë ojts dyajkojˈyë ääy ujts etsë jëyujk animal, ta net ojts dyajkojy ja naxwinyëdë jäˈäy duˈun “extëm yëˈë këˈëm yˈixëtyën” (käjpxë Génesis 1:27, MNM). ¿Tiko naxwinyëdë jäˈäy tyëgatsyëty mëdë jëyujk animal? Wenë, komë Dios duˈun ojts xyajkojëm extëm yëˈë këˈëm yˈixëtyën, mbäät njäˈäyˈäjtëm extëm yëˈë jyaˈayˈaty, nyaˈijxëmë tsojkën ets nduˈunëm tijaty tëyˈäjtën myëët. Ojts nanduˈun xyajkojëm extëm mbäät njäjtëm kanäägë ayuk, nˈijxëm wiˈix yˈoy tsyujjëtyë it lugäär ets ntsojkënyëˈäjtëmë ëy yaˈaxy. Mbäät nanduˈun nˈawdäjtëmë Dios mëdiˈibë kyaj mbäät ttundë jëyujk animal.

AK NIJAWË NIˈIGYË

Min nˈokˈijxëm tuk pëky majtsk pëky mëdiˈibë yajtëyˈäjtëndëjkëp ko Dios ojts dyajkojtäˈäy tijaty ja jukyˈäjtp, tiko mbäät nmëbëjkëm extëmë Biiblyë tnimaytyaˈaky, ets ti xytyukniˈˈijxëm mä Dios extëmë naxwinyëdë jäˈäy ojts dyajkojy.

4. Tukëˈëyë mëdiˈibë jukyˈäjtp tam pën ojts yajkojˈyëty

Naxwinyëdë jäˈäy yajmëjkumääytyëp ko tijaty dyajkojtë mëdiˈibë të tniˈˈijxtuˈuttë mä Diosë kyojy pyëjktaˈaky. Per ¿pënxyëp mbäät yajmëjkumay? Ixtë BIDEO ets nimaytyäˈäktë mëdiˈibë yä yajtëëpy:

BIDEO: ¿Tiko mbäät yajmëbëkyë Dios? (2:43)

• ¿Tijatyë naxwinyëdë jäˈäy të tniˈˈijxtuˈuttë mä Diosë kyojy pyëjktaˈaky?

Tukëˈëyë jëën tëjk, tam pën ojts tniˈˈixë ets tkojy. Per ¿pën yajkojë it lugäärë tsujjatypyë etsë jëyujk animal? Käjpxtë Ebreeʉsʉty 3:4 ets nimaytyäˈäktë mëdiˈibë yä yajtëëpy:

• Mä tukëˈëyë mëdiˈibë Dios të dyajkojy, ¿ti niˈigyë myajmonyˈijx myajmonyjäˈäwëp?

• ¿Mbäädëdaa nmëbëjkëm ko tam pën ojts dyajkojˈyë tsäjp etsë Nax? ¿Ets tiko duˈun mjënäˈäny?

¿Mˈaknijawëyaampy?

Mbäät xypyaaty kanäägë artikulo etsë bideo mä jw.org, mä jyënaˈany “¿Jam pën mëdiˈibë ojts yajkojˈyëty?” ets “Wiˈix näägë jäˈäy tnimaytyäˈäktë tsyonëˈky tsyondakyë jukyˈäjtën”.

‘Tukëˈëyë tëjk, tam pën të dyajkojy. Nanduˈun tukëˈëyë mëdiˈibë jaˈäjtp, Dios të dyajkojtäˈäy’.

5. Taaˈäjtp tiko mbäät nmëbëjkëm wiˈixë Biiblyë tmaytyaˈaky kyojtääy tijaty

BIDEO: ¿Jam pën mëdiˈibë ojts dyajkojˈyënë tsäjp etsë Nax? (jeˈeyë tuk pëky yaˈixy) (3:51)

• Biiblyë jyënaˈany ko yäˈädë Naxwinyëdë ojts kyojy 6 xëëw, ¿yëˈën myaytyäˈägaampy ko jantsy jeˈeyën 6 xëëw?

• Extëmë Biiblyë tmaytyaˈaky ojts kyojˈyë tsäjp etsë Nax, ¿mbäädëdaa njantsy myëbëjkëm? ¿Ets tiko duˈun mˈatsoy?

Käjpxtë Génesis 1:1 ets nimaytyäˈäktë mëdiˈibë yä yajtëëpy:

• Nimayë ëxpëkyjyaˈay jyënäˈändë ko tsäjp etsë Naxwinyëdë tsonëˈk tsondak, ¿tuˈugyëp mët ja tekstë mëdiˈibë jaa të ngäjpxtäˈäyëm?

Näägë jäˈäy nayajtëëwëdëp pënë Dios yëˈë jyantsy yajtuunë evolución parë jyaˈˈatyë jukyˈäjtën. Käjpxtë Génesis 1:21, 25, 27 ets nimaytyäˈäktë mëdiˈibë yä yajtëëpy:

• ¿Tukniˈˈijxëbë Biiblyë ko Dios yëˈë yajtuunë evolución parë ojts tijaty wanaty wanaty tyëgatsy ets ojts jyëmbijnë extëmë äjkx, jëyujk animal o axtë jäˈäy? ¿O yëˈë këˈëm ojts dyajkojtäˈäy këxy kaˈpxy tukëˈëyë mëdiˈibë jukyˈäjtp?

6. Mä tukëˈëyë mëdiˈibë Dios ojts dyajkojy, ëtsäjtëm mëdiˈibë tim tëgatsy ojts xyajkojëm

Ëtsäjtëm kyaj duˈunë Dios ojts xyajkojëm extëmë jëyujk animal. Käjpxtë Génesis 1:26 ets nimaytyäˈäktë mëdiˈibë yä yajtëëpy:

• Komë Dios duˈun ojts xyajkojëm extëm yëˈë, ta mbäät nyaˈijxëmë tsojkën etsë paˈˈayoˈowën. ¿Ti yäˈädë mdukniˈˈijxëp mä wiˈixë Jyobaa jyaˈayˈaty?

TI TË NJÄJTËM

Jyobaa yëˈë yajkojë tsäjp etsë Naxwinyëdë ets tukëˈëyë mëdiˈibë yä jukyˈäjtp.

Ajamyatsë

• ¿Wiˈixë Biiblyë tnimaytyaˈaky tsyonëˈky tsyondakyë tsäjp etsë Naxwinyëdë?

• ¿Yajtuunë Diosë evolución parë wiˈixëm jyaˈäjtyë jukyˈäjtën, o yëˈëjën këˈëm ojts dyajkojtäˈäy tijäty?

• ¿Tiko njënäˈänëm ko naxwinyëdë jäˈäy tëgatsy ojts kyojy?

AK PAYEˈEY

Ix tuˈuk majtskë ijxpajtënë mä yajnimaytyaˈagyë jëyujk animal ko tam pën ojts yajkojˈyëty.

“¿Ti xytyukniˈˈijxëm wiˈix të kyojˈyë jëyujk animal?” (¡Despertad!, septiembrë 2006)

Ix wiˈix tuˈugë uˈunkteety ttukmëtmaytyaˈagyë yˈuˈunk wiˈixë Biiblyë tnimaytyaˈaky kyojtääy tijaty.

Jyobaa yëˈë yajkojtääy tijaty jaˈäjtp (2:37)

Ix pënë evolución kijpxyëp mët extëmë Biiblyë jyënaˈany.

“¿Yëˈë Dios yajtuunë evolución parë ojts dyajkojy tukëˈëyë mëdiˈibë ja jukyˈäjtp?” (Myiny mä jw.org)

Ix pën ja jekywyaay jekypyäjk ets tijatyë ëxpëkyjyaˈay yˈëxpëjkpëtsëëmdëp, yajtëyˈäjtëndëjkëp pënë jukyˈäjtën duˈunyë të yajtukˈijxpäädëˈëky o pën Dios yajkoj.

El origen de la vida. Cinco cuestiones dignas de análisis (foyetë)