Pënaty kyäjpxtëbë ëxpëjkpajn yëˈë nyijawëyandëp
¿Nëjkxëbëdaa ntsipkaˈxëm mä jukyˈäjtënë xëmëkyëjxmbë?
▪ Biiblyë yˈawäˈänëbë jukyˈäjtënë winë xëë winë tiempë mä ja it lugäärë tsujpë yä Naxwiiny (Salmo 37:29; Lukʉs 23:43). Per ¿nëjkxëbëdaa jam ntsipkaˈxëm?
Oy ko duˈun nnayajtëˈëjëm. Të yaˈëxpëjkpëtsemy ko jäˈäy diˈib jantsy tsipkaˈxp, tuktëjkëbë mäˈäy täjën ets mëjwiin kajaa kyumon kyudukë, ets mbäät ti ttuny diˈib axëktunëdëp. Pënaty kyaj tnijawëdë tiko jyukyˈaty o të tmëtsipkaˈxnë ti xëmë tyuunkˈäjtypy, mbäät kyaj oy nyekynyayjawëdë. Per ¿waˈandaa nanëgoobë nëjkx njukyˈäjtëm mä ja it lugäärë tsujpë? ¿Nëjkxëbëdaa nmëtsijpënë diˈib nduˈunëm?
Nˈokmëdäjtëm winmäˈänyoty ko diˈib yˈawäˈänëbë jukyˈäjtën xëmëkyëjxmbë, yëˈë Jyobaa Dios, diˈib yajjääyë Biiblyë (Fwank 3:16; 2 Timotee 3:16). Diˈib mas mëj mä jyaˈayˈäjtën, yëˈë tsojkën (1 Fwank 4:8). Yëˈë xytsyojkëm mëjwiin kajaa ets xymyoˈoyëm tijaty ndukˈoyˈäjtëm (Santya̱ˈa̱gʉ 1:17).
Jyobaa nyijäˈäp ko parë nˈijtëm jotkujk, yëˈë tsojkëbë tuunk diˈib ndukxondakëm (Salmo 139:14-16; Eclesiastés 3:12). Mä ja it lugäärë tsujpë, nipën jeˈeyë kyatunäˈäny extëmë tuˈugë makinë. Tijaty tyunandëp, nëjkxëp ttukˈoyˈattë mëdë jiiky myëguˈuk (Isaías 65:22-24). ¿Mëtsipkaˈaxëbë tuunk diˈib jantsy oy o diˈib kyaj xytyimjawët wiˈix mët ja mxëë mtiempë xyajnaxët?
Jyobaa nan kyaj oynyapënëty dyajjukyˈatäˈäny winë xëë mä ja it lugäärë tsujpë, yëˈëyë pënaty nyiˈˈijxtuttëbë Jesus (Fwank 17:3). Ko Jesus jyukyˈajty yä Naxwiiny, tyukxondak ko ojts ttuunë Tyeetyë tsyojkën. Duˈun mëdë yˈää yˈayuk ets mët tijaty tyuun, ttukniˈˈijxë ja yˈëxpëjkpëty ko jotkujkˈäjtën ja myiny ko jäˈäy tijaty dyaky ets kyaj ko tˈaxäjë (Apostʉlʉty 20:35). Ko naty ja Naxwinyëdë të jyëmbity extëmë it lugäärë tsujpë, niˈamukë jäˈäy tpadunäˈändë tyäˈädë majtskpë anaˈamën diˈib ijtp mëj: ntsojkëmë Dios etsë nmëguˈukˈäjtëm (Matewʉ 22:36-40). Okpawinmay ko xitsoo yatsoo jäˈäy ak oyjyaˈay, ak mtsojkëdëp ets ak tyukxondaktëbë tyuunk. ¿Mëtsipkaˈaxëbë duˈumbë jäˈäy?
¿Wiˈix mas yˈixˈatäˈäny ja jukyˈäjtën mä ja it lugäärë tsujpë? Tuˈuk tuˈugë xëë niˈigyë njatäˈänëm tijaty mä Jyobaa. Kanäk peky tijaty të yaˈëxpëjkpëtsemy mä Jyobaa kyojy pyëjtaˈaky (Romanʉs 1:20). Per jeˈeyë yiˈinëm waanë yajnijawë. Job diˈib kyaj tmastutyë Dios, ojts tpawinmayë Diosë kyojy pyëjtaˈaky diˈibë naty yˈixyˈajtypy, ets ta jyënany extëm tyambäät tyëyˈäjtënëty: “Tyäˈädë yëˈë nyëˈëbäˈä tyuˈubäˈä, ¡ets jeˈeyë mëj mëj yajmëdoyˈaty mä pënën yëˈë! Per ko dyajnoky ja yˈanaa, ¿pën mbäät tjaygyukë?” (Job 26:14).
Oyxyëp njajukyˈäjtëmbë winë xëë, ninäˈä nëjkx nganijäˈäjëtyaˈayëm mä Jyobaa ets mä kyojy pyëjtaˈaky. Mä Biiblyë jyënaˈany ko Jyobaa të tpëjtaˈaky ja tsojkënë mä ngorasoonˈäjtëm ets njukyˈäjtëm winë xëë winë tiempë. Per nanduˈun jyënaˈany ko “naxwinyëdë jäˈäy ninäˈä tkanijawët tijatyë Dios tëyˈäjtënbë të ttuny mä tsyoneˈky tsyondaky axtë mä jyëjpkexy” (Eclesiastés 3:10, 11). ¿Nëjkxëbëdaa xymyëtsipkeˈexy ko tijaty xyjäjtˈadëˈëtsët mä Dios?
Pënaty tyam tyuundëp tijatyë myëguˈuk tyukˈoyˈatëp ets tijatyë Dios yajmëjpëtsëëmëp, tim näˈäty tsyipkaˈaxtë. Pën nyajtuˈunëm duˈunë tiempë, ta kyaj ntsipkaˈxëm duˈun tyam ets duˈun mä ja jukyˈäjtën diˈib itäämp winë xëë.
[Letrë diˈib miimp mä dibujë mä pajina 21]
Naxwinyëdë kyëxeˈeky: yëˈë yajkypyë Image Science and Analysis Laboratory, NASA-Johnson Space Center; galaxia: The Hubble Heritage Team (AURA/STScI/NASA)