KĨTHOOMO KĨA 18

Nĩatĩa Tũteethagia Ataana na Aarĩ ba Baaba Rĩrĩa Barĩ Mathĩĩnene?

Akũũjĩ ba Jehova bakĩejanaga ũteethio Dominica — Dominica

Airitĩri bagĩteethagĩĩria gwaka Nyomba ya Ũnene Japan — Japan

Ũmwe wa Akũũjĩ ba Jehova akĩbooragĩĩria muntũ ũmwe nyuma ya ũgwati naarĩa Haiti — Haiti

Rĩrĩa ũgwati bwaumĩra, Akũũjĩ ba Jehova nĩ babaanganagia o rĩo gũteethia ataana na aarĩ ba baaba barĩa baringĩkĩte. Gwiciũmia ta kũu nĩ kwonanagia wendo bwetũ bwa mma kĩrĩ muntũ na ũngĩ. (Johana 13:34, 35; 1 Johana 3:17, 18) Tũteethagia na njĩra irĩkũ?

Tũritaga ũteethio bwa kĩmbeca. Rĩrĩa kwagĩtĩre mpara ĩnene Judea, Akristũ ba mbere ba Antiokia nĩbaatũmĩre ũteethio bwa mbeca kĩrĩ ataana ba baaba ba Judea. (Mathithio 11:27-30) O ũu, rĩrĩa twamenya atĩ ataana na aarĩ ba baaba icigo bimwe bia nthĩgũrũ nĩ bagũkũrũkĩĩra mathĩĩna, nĩtũtũmaga ũteethio gũkũrũkĩĩra kĩũthũrano, nĩkenda barĩa barĩ na ũbatu bũbũnene boona into birĩa bakũbatara.—2 Akorintho 8:13-15.

Nĩtũbateethagia na into birĩa bakũbatara. Akũrũ barĩa bethagĩrwa gũntũ kũrĩa kũrĩ na ũgwati, nĩbaciũmagia gũcwaa o muntũ wonthe wa kĩũthũrano na kwona atĩ bonthe barĩ thĩĩria. Kamĩtĩ ya gũteetheria no ĩbaanganie weejani bwa irio, rũũjĩ rũrũtheru, nguũ, antũ a kũmaama, na ũteethio bwa ndawa. Akũũjĩ ba Jehova babaingĩ barĩa barĩ na ũtea, nĩbairitagĩra gwĩta nja cia ataana ba baaba bangĩ kũbateetheria batĩkũrĩgia, gwaka mĩciĩ na Nyomba cia Ũnene irĩa ithũkangĩtue. Ũrũmwe bũrĩa tũgwĩragĩrua tũrĩ ũthuranĩri bwa nthĩgũrũne yonthe, na ũtea bũrĩa tũrĩ nabu nĩũntũ bwa kũrita ngũgĩ amwe, nĩbitũteethagia kũbaanga mantũ na mpwĩ rĩrĩa ũgwati bwaumĩra. Kinya kethĩra nĩtũteethagia barĩa tũrĩ ba “muuru” jũmwe ‘witikione,’ nĩ tũteethagia bangĩ kinya bo rĩrĩa gũkũũmbĩka, kinya kethĩra nĩ ba ndini ingĩ.—Agalatia 6:10.

Nĩtũbabooragĩĩria gĩkĩrundu na kĩmathũgaanio. Barĩa bagwati nĩ mathĩĩna nĩbabataraga kũboorerua mono. Ĩgiita ta rĩu, twonaga inya kuuma kĩrĩ Jehova, “Murungu mwene mantu jonthe ja kuboraniria.” (2 Akorintho 1:3, 4) Nĩ tũgwĩragĩrua kwaria na barĩa barĩ mathĩĩnene, mawĩrane jarĩa jarĩ Bibiriene, na kũbaa wĩrĩgĩĩro bwa mma atĩ ĩgiita rĩtĩ kũraaja, Ũnene bwa Mũrungu bũkathiria moogwati jonthe jarĩa jaretaga ũrũrũ na mĩthangĩko.—Kugwurirwa 21:4.

Nĩkĩ Akũũjĩ ba Jehova boombaga gũteethia na mpwĩ rĩrĩa ũgwati bwaumĩra?
Nĩatĩa tũũmba kũbooreria gĩkĩrundu barĩa baringithĩtue nĩ mathĩĩna jau?