Nĩ Ngũgĩ Irĩkũ Iritagwa Obicine ya Rwang’i?

Barĩa bakaraga Betheli, baritaga ngũgĩ mwanya mwanya, cia gwĩtithia mbere ngũgĩ ya gũtũmĩĩria nthĩ ĩmwe kana inyiingĩ. No batumĩke kĩrĩ ikundi bia ũtaũri, gũcaba mangacĩti, kũthithia mauku, nyomba cia gwĩĩka mauku, kũthithia vidio, kana kũmenyeera mantũ jangĩ jegie gĩcigo.

Ngũgĩ irũngamagĩĩrwa nĩ Kamĩtĩ ya Rwang’i. Kĩrĩ obici o yonthe ya rwang’i, Kĩama kĩrĩa Gĩtongagĩĩria nĩgĩĩkĩte Kamĩtĩ ya Rwang’i gwĩtithia ngũgĩ mbere, na kamĩtĩ ĩu, ĩthagĩrwa na akũrũ bathatũ kana nkũrũki barĩa bakwagĩra. Kamĩtĩ ĩu nĩkaraga ĩkĩmenyithagia Kĩama kĩrĩa Gĩtongagĩĩria, wĩti na mbere bwa ngũgĩ nthĩgũrũne irĩa barũngamĩrĩte, na kinya mathĩĩna jarĩa joomba kuumĩra. Riboti ta iu iteethagĩĩria Kĩama kĩrĩa Gĩtongagĩĩria gũtua mantũ jarĩa jabuĩri kwarĩĩrua maukune, mĩcemanione na igomanone ĩgiita rĩĩjĩte. Barĩa bariũngagĩra obici cia ndwang’i antũũne a Kĩama kĩrĩa Gĩtongagĩĩria, batũmagwa jamaingĩ kũriũngĩra ndwang’i, na kwaa Kamĩtĩ cia Ndwang’i ũtongeeria bwa kũbateetheria kĩrĩ ngũgĩ ciao. (Njuno 11:14) Nĩ kwĩthagĩrwa na programu ya mwanya ĩrĩ na rwaria rwa Bibiria rwa ũrĩa ũriũngĩrĩte rwang’i kuuma obicine ĩnene ya nthĩgũrũ, rwa gwĩkĩra inya barĩa bakaraga gĩcigone kĩa rwang’i rũu ariũngĩrĩte.

Biũthũrano nĩ biĩkagĩrwa inya. Ataana ba baaba barĩa barũngamĩĩrĩte obici ya rwang’i nĩbo betĩkagĩĩria kwaambĩrĩrua kwa biũthũrano bibierũ. Kinya nĩbo batongagĩĩria ngũgĩ ya mapainia, ya amĩsonarĩ, na ya ategeeri ba mĩthiũrũũnko, barĩa batumĩkaga gĩcigone kĩa obici ĩu ya rwang’i. Nĩ babaanganagia igomano, waaki bwa Nyomba cia Ũnene injerũ, na kwona atĩ biũthũrano bigũtũmĩrwa mauku jarĩa bikũbatara. Ngũgĩ cionthe irĩa iritagwa obicine ya rwang’i nĩ iretaga ũrũmwe kĩrĩ kũũjũria ngũgĩ ya gũtũmĩĩria.—1 Akorintho 14:33, 40.

• Nĩatĩa Kamĩtĩ cia Rwang’i iteethagĩĩria Kĩama kĩrĩa Gĩtongagĩĩria?

• Nĩ ngũgĩ irĩkũ iritagwa obicine ya rwang’i?