Nĩatĩa Mauku Jeetũ Jaandĩkagwa na Jagataũrwa?

Nĩkenda tũũmba gũtũmĩĩria “nkuma iria njega” kĩrĩ antũ ba “migongo yonthe, migambo yonthe, na miiriga yonthe,” nĩtũritĩte mauku na mĩgambo nkũrũki ya 750. (Kugwurirwa 14:6) Nĩatĩa tũũmbaga kwiingia ngũgĩ ĩndito ũu? Tũthithagia ũu tũgĩteethagua nĩ aandĩki kuuma nthĩgũrũne yonthe na gĩkundi kĩa ataũri bairitanĩrĩtie—bonthe nĩ Akũũjĩ ba Jehova.

Mantũ jambagĩĩria kwaandĩkwa na Gĩcũũnkũ. Kĩama kĩrĩa Gĩtongagĩĩria kĩrũngamagĩĩra ngũgĩ ya Rwang’i rwa Waandĩki, kĩrĩ obici yeetũ ĩrĩa nene nthĩgũrũne yonthe. Rwang’i rwa waandĩki, nĩ rũrũngamagĩĩra ngũgĩ ya aandĩki barĩa batumĩkaga obicine ĩrĩa nene, na obici imwe cia ndwang’ĩ. Kwĩthĩrwa tũrĩ na aandĩki kuuma gũntũ mwanya mwanya, nĩgũtũmaga twandĩka mantũ jakũringithia antũ ba mĩtũũrĩre mwanya mwanya, na kwou mauku jeetũ nĩjakũcagĩĩria antũ ba nthĩgũrũ inyiingĩ.

Mantũ jacookaga jagatũmĩrwa ataũri. Mantũ jarĩĩkia kwaandĩkwa na gwĩtĩkĩĩrua, jatũmagwa kĩrĩ ikundi bia ataũri nthĩgũrũne yonthe gũkũrũkĩĩra mĩtambo ya kompiuta, bakajataũra, bagatega kethĩra jatĩatĩtie na nĩjakũthoomeka bwega. Baciũmagia kũthuura biugo kana “nteto cia mma” irĩa ikaumĩria ĩthũgaanio o ũrĩa rĩkari kĩrĩ Gĩcũũnkũ gwĩta kĩrĩ mũgambo jwao.—Mutumiiria 12:10.

Kompiuta nĩ itũmaga ngũgĩ iritwa na mpwĩ. Kompiuta ĩtĩũmba kũjũkia kaanya ka mwandĩki na mũtaũri. Ĩndĩ boomba kũrita ngũgĩ yaao na mpwĩ bagĩtumagĩra kompuita gũcwaa biugo na kũthithia ũcũnkũũni. Akũũjĩ ba Jehova nĩbathithĩtie programu ya kompiuta ĩĩtagwa Multilanguage Electronic Publishing System (MEPS), ĩrĩa ĩjũkagia mantũ jaandĩki na mĩgambo ĩmiingĩ amwe na mbica, jathuranĩrĩtwe gũcabwa.

Nĩkĩ tontũ tũciũmagia kũrita ngũgĩ ĩjĩ yonthe, kinya kĩrĩ mĩgambo ĩrĩa yaragua nĩ antũ baakai akĩ? Tontũ wendi bwa Jehova nĩ atĩ, “antu bonthe boonokue bacoke kumenya mantu jaria jari ja mma.”—1 Timotheo 2:3, 4.

• Nĩatĩa mauku jeetũ jandĩkagwa?

• Nĩkĩ tontũ tũtaũraga mauku jeetũ na mĩgambo ĩmiingĩ?