KĨTHOOMO KĨA 10
Nĩatĩa Ũũmba Kũmenya Ũthaathayia bwa Mma?
1.Ndini ya mma rĩ, nĩ ĩmwe akĩ?
“Imenyagiireni untu bwa iroria bia urongo.”—MATHAYO 7:15.
Jesũ aritanĩre athingati baawe ndini ĩmwe akĩ, ndini ya mma. Ĩkari ta njĩra ĩrĩa ĩĩtaga mwoyone jwa kenya na kenya. Jesũ augĩre: “Antu baria bamionaga ni baakai.” (Mathayo 7:14) Mũrungu etĩkagĩra ũthaathayia bũrĩa akĩ, buumanĩtie na Rũteto rwawe rwa mma. Athaathayia ba mma bonthe, bagwatithanĩtue nĩ wĩtĩkio bũmwe.—Thooma Johana 4:23, 24; 14:6; Aefeso 4:4, 5.
Tega vidio ĩjĩ Ndini ya mma rĩ, nĩ ĩmwe akĩ?
2.Nĩatĩa Jesũ augĩre bwĩgiĩ Akristũ ba ũrongo?
“Baugaga mma ati nibaiji Murungu, indi mantu jao jaria bathithagia ijoonanagia ati ibamuregete.”—TITO 1:16.
Jesũ augĩre iroria bia ũrongo bikathũũkia Ũkristũ. Bikĩonewa, bikaraga ta athaathayia ba mma. Makanisa jaao jaugaga nĩ ja Gĩkristũ. Ĩndĩ no ũmenye bungwa ũrĩa bakari. Atĩa? Nĩ ũthaathayia bwa mma akĩ, bũteethagia antũ kwaa Akristũ ba mma barĩna mĩĩtĩre ĩmĩagĩru na ĩkwonekana bwega.—Thooma Mathayo 7:13-23.
3.Nĩatĩa ũũmba kũmenya athaathayia ba mma?
Thũgaanĩria mantũ jaja jatano ja gũgũteethia kũbamenya:
Athaathayia ba mma nĩbatĩĩaga Bibiria ĩrĩ, Rũteto rwa Mũrungu. Nĩbaciũmagia gũtũũra kũringana na ũrĩa Bibiria ĩritanaga. Kwou, ndini ya mma nĩ mwanya mono na ndini irĩa iritanaga nkuagaya cia antũ. (Mathayo 15:7-9) Athaathayia ba mma batũũraga kũri ngana na mantũ jarĩa baritanaga. —Thooma Johana 17:17; 2 Timotheo 3:16, 17.
Athingati ba mma ba Jesũ nĩbatĩĩaga riĩtwa rĩa Mũrungu, Jehova. Jesũ naakumagia riĩtwa rĩa Mũrungu na njĩra ya kũrĩmenyithia kĩrĩ bangĩ. Naateethagia antũ kũmenya Mũrungu na kũbaritana kũromba riĩtwa rĩa Mũrungu rĩathũrwe. (Mathayo 6:9) Kũrĩa ũkaraga rĩ, nĩ ndini ĩrĩkũ ĩmenyithagia antũ riĩtwa rĩa Mũrungu? —Thooma Johana 17:26; Aroma 10:13, 14.
Akristũ ba mma nĩbatũmagĩĩria Ũnene bwa Mũrungu. Mũrungu aatũmĩre Jesũ nthĩgũrũne gũtũmĩĩria nkuma ĩnjega ya Ũnene. Ũnene bwa Mũrungu nĩbu bunka wĩrĩgĩĩro bwa antũ. Jesũ aatũmĩĩrĩrie Ũnene bwa Mũrungu mwanka rĩrĩa aakuĩre. (Luka 4:43; 8:1; 23:42, 43) Augĩre atĩ athingati baawe bagatũmĩĩria Ũnene bũu. Muntũ akeeja kwaria naagwe mantũ ja Ũnene bwa Mũrungu, ũũmba kũthũgaania nĩ wa ndini ĩrĩkũ? —Thooma Mathayo 24:14.
Athingati ba Jesũ batiigwatithanagia na mantũ jamaaĩ ja nthĩgũrũ. No ũũmbe kũbamenya tontũ batiitonyithanagia na mantũ ja gĩciaca na kũgwatanĩra na mwingĩ kĩrĩ ũregani bwa waatho. (Johana 17:16; 18:36) Nkũrũki, batĩcierekanagia na mĩerekera na mĩĩtĩre ĩmĩthũũku ya nthĩgũrũ ĩjĩ.—Thooma Jakubu 4:4.
Akristũ ba mma nĩbendeene mono. Nĩbairitanĩte kuuma kĩrĩ Rũteto rwa Mũrungu gũtĩĩaga antũ ba mĩgongo yonthe. Kinya kethĩra kaingĩ ndini cia ũrongo nigwataga mbaru ndwaa cia mĩgongo, athaathayia ba mma batĩthithagia ũntũ ta bũu. (Mika 4:1-3) Ĩndĩ, Akristũ ba mma nĩbatumagĩra ĩgiita na into biao gũteethia bangĩ na kũbeekĩra inya.—Thooma Johana 13:34, 35; 1 Johana 4:20.
4.No ũũmbe kũmenya ndini ya mma?
Nĩ ndini ĩrĩkũ mooritani jaayo jonthe jaumaga ndeene ya Rũteto rwa Mũrungu, ĩtĩĩaga riĩtwa rĩa Mũrungu na gũtũmĩĩria atĩ, Ũnene bwa Mũrungu nĩbu bunka wĩrĩgĩĩro bwa antũ? Nĩ gĩkundi kĩrĩkũ kĩonanagia wendo na gĩkarega ndwaa? Ũrĩona atĩa?—Thooma 1 Johana 3:10-12.