Mikaeli Mũraĩka Ũrĩa Mũnene Nũũ?

Ũrĩa Bibiria yugaga

Mikaeli ũrĩa ndini imwe imwĩtaga “Mũthuure Mikaeli,” nĩ riĩtwa rĩa Jesũ rĩrĩa aaei mbere na nyuma ya kwĩja aja nthĩgũrũne.a Mikaeli nĩbatetere na Nkoma nyuma ya gĩkuũ kĩa Musa na natetherie mũraĩka gũkinyĩria kĩroria Danieli ntũmwa ya Mũrungu. (Danieli 10:13, 21; Juda 9) Mikaeli atũũraga kũringana na riĩtwa rĩawe rĩrĩa riugaga,‘Nũũ Ũkari ta Mũrungu?’ na njĩra ya gũteteera wathani bwa Mũrungu na kinya kũrwa na anthũ baawe.—Danieli 12:1; Kugwurirwa 12:7.

Cũnkũũna wone nĩkĩ tũkuuga atĩ Jesũ nĩwe Mikaeli mũraĩka ũrĩa mũnene.

• Mikaeli nĩwe “Mũraĩka Ũrĩa Mũnene.” (Juda 9) Riĩtwa “Mũraĩka Ũrĩa Mũnene,” rionekaga kĩrĩ mĩstaarĩ ĩĩrĩ akĩ ya Bibiria. Mĩstaarĩne ĩu yonthe riĩtwa rĩu rĩrĩonania mũraĩka ũu mũnene nĩ ũmwe akĩ. Kĩrĩ mũstaarĩ jũmwe, Bibiria yugaga Jesũ ũrĩa wariũkĩrue “akeenama aumite Iguru na kaju gakanene, na kaju ka muraika uria munene gakaigiigua.” (1 Athesalonike 4:16) Jesũ arĩna ‘kajũ ka mũraĩka ũrĩa mũnene’ tontũ nĩwe Mikaeli mũraĩka ũrĩa mũnene.

• Mikaeli atongangĩĩria njũũrĩ ĩnene ya araĩka. ‘Mikaeli na araĩka baawe bakĩrũjaga na nkũnga,ʼ tayo Nkoma. (Kugwurirwa 12:7) Tontũ Mikaeli arĩna wathani bũnene kĩrĩ biũmbe bia gĩkĩrundu, nĩkĩo gĩtũmi etagwa “umwe wa agambi-baria-anene,” na “mugambi.” (Danieli 10:13, 21; 12:1) Mariĩtwa jaja ja Mikaeli jarĩonania atĩ nĩwe “mũraĩka ũrĩa mũnene kĩrĩ araĩka bonthe,” o ta ũrĩa mũthomi ũmwe wa Wĩrane Bũbwerũ David E. Aune aaugĩre.

  Bibiria nĩgwetaga riĩtwa rĩngĩ kwonania ũnene kĩrĩ njũũrĩ ya araĩka. Yũgaga ũjũ “igiita riria Mwathani wetu Jesu akagwurwa, aumite Iguru amwe na araika ba inya yawe, beejite na mwanki juri na ndumuri.” (2 Athesalonike 1:7, 8; Mathayo 16:27) Jesũ “nawe neetire Iguru; niku akaraga ari munene wa araika, na mawathani, na kiri baria bari inya.” (1 Petero 3:21, 22) Jehova atĩngĩũmba gwĩka Jesũ na Mikaeli barĩ anene ba araĩka. Tontũ mariĩtwa jau jojaĩrĩ, Jesũ na Mikaeli, jonanagia nĩ muntũ ũmwe.

• Mikaeli “agookiira igita ria mithangiko.” (Danieli 12:1) Kĩrĩ iuku rĩa Danieli, kiugo “agookiira,” kaingĩ gĩtumagĩrwa kwonania mũnene ũrĩa ũrũngamaga nĩkenda ajũkia ĩtagaaria rĩa mwanya. (Danieli 11:2-4, 21) Jesũ Kristũ ũrĩa wĩtagwa, “Ruteto rwa Murungu,” akajũkia ĩtagaarĩa rĩa mwanya arĩ “Munene wa anene,” nĩkenda eenyangia anthũ bonthe ba Mũrungu na gũkarĩa antũ baawe. (Kugwurirwa 19:11-16) Akathithia ũu ĩgiita rĩa “ukia bubwingi, ta uria gutagia kairi kuuma kiambiriria kia nthiguru mwanka nandi.”—Mathayo 24:21, 42.